ពលរដ្ឋខ្មែរនៅក្រៅប្រទេសបង្កើនការនាំយកផលិតផលខ្មែរទៅលក់នៅតំបន់អឺរ៉ុប អាម៉េរិក និងកាណាដា

ភ្នំពេញ ៖ ប្រជាពលរដ្ឋខ្មែរដែលកំពុងរស់នៅក្រៅប្រទេស បានបង្កើនការនាំយក អង្ករ គ្រឿងទេស គ្រាប់ស្វាយចន្ទី និងរបស់ប្រើប្រាស់ប្រចាំថ្ងៃមួយចំនួនទៀតទៅលក់នៅតំបន់អឺរ៉ុប អាម៉េរិក និងកាណាដា។

ឯកឧត្តមបណ្ឌិត សួង ណយ អនុប្រធានគណៈកម្មាធិការជាតិជំរុញចលនាភូមិមួយផលិតផលមួយ បានលើកឡើងថា និន្នាការនេះធ្វើឡើងដើម្បីគាំទ្រដល់ការធ្វើពហិការទំនិញរបស់ប្រទេសថៃក្នុងចំណោមសហគមន៍ខ្មែរនៅបរទេស។

ឯកឧត្តមបានបញ្ជាក់យ៉ាងដូច្នេះថា ៖

«នៅកាណាដា ថ្ងៃមុនយើងនាំ១៦នាក់ មិនមែនម្នាក់ ពីរនាក់ទេ នៅបារាំង នៅអឺរ៉ុបនឹងជាង១០នាក់ដែរ ហើយនៅអាម៉េរិកជាង១០នាក់ដែរ។ ទី១ គាត់នាំយកទៅលក់នៅផ្សាររបស់គាត់ ទី២គាត់បោះដុំចែកចាយបន្ត។ ការនាំយកផលិតផលខ្មែរទៅកាន់ទីផ្សារអន្តរជាតិនេះ មិនត្រឹមតែជាឆន្ទៈធ្វើពហិការទំនិញពីប្រទេសថៃសម្រាប់សហគមន៍ខ្មែរប៉ុណ្ណោះទេ ប៉ុន្តែគឺជាការលើកទឹកចិត្ត និងជំរុញការគាំទ្រផលិតផលខ្មែរ និងចូលរួមផ្សព្វផ្សាយនូវផលិតខ្មែរផងដែរ»។

អ្នកស្រី គឹមស័ង ឆាបពុយស៍ ជាពលរដ្ឋខ្មែរម្នាក់កំពុងរស់នៅប្រទេសបារាំង នាំយកទំនិញពីកម្ពុជាសម្រាប់ផ្គត់ផ្គង់ម៉ាតផ្ទាល់ខ្លួនចំនួន២ និងលក់បន្តទៅឲ្យម៉ាតចំនួន ៤ផ្សេងទៀត ព្រមទាំងផ្សព្វផ្សាយលក់ចែកចាយបន្តក្នុងបណ្ដាញសង្គមសម្រាប់ពលរដ្ឋខ្មែរក្នុងតំបន់អឺរ៉ុបផងដែរ។

ផលិតផលដែល អ្នកស្រី គឹមស័ង ឆាបពុយស៍ នាំចេញពីប្រទេសកម្ពុជារួមមាន ត្រីងៀត ប្រហុក ផ្អក កាពិ អង្ករ ស្ករត្នោត គ្រាប់ស្វាយចន្ទី ទឹកត្រី ទឹកស៊ីអ៊ីវ និងប្រេងខ្យង ជាដើម។

អ្នកស្រីបានបញ្ជាក់ថា ៖

«ឥលូវនេះនៅតាមផ្សារស៊ុបភើម៉ាខីតធំៗរបស់អាស៊ីយើង នៅស្រុកបារាំងនេះ គេចាប់ផ្ដើមទៅធ្វើផលិតផលខ្មែរយើងនាំចេញមកហើយ យើងមានតំណាប់ស្វាយ យើងមាននំបញ្ចុក យើងមានស្វាយចន្ទី ជាពិសេសគឺអង្ករ មិនថាស៊ុបភើម៉ាខីតរបស់អាស៊ីដែលនៅស្រុកបារាំង ឬក៏របស់បារាំងដូចជាសាខាហ្វួ លីក្លែអីនឹង ក៏មានអង្ករយើងលក់ដែរនៅនឹង»។

អ្នកស្រីបានកត់សម្គាល់ឃើញថា សន្ទុះនៃការគាំទ្រផលិតផលខ្មែរនៅបារាំងគឺកើនឡើងច្រើន ជាពិសេស ក្រោយពេលពលរដ្ឋខ្មែរទាំងនៅក្នុងស្រុក និងនៅក្រៅស្រុកបានពហិកាផលិតផលរបស់ប្រទេសថៃ បន្តាប់ពីភាគីថៃបានឈ្លានពានទឹកដីកម្ពុជា៕ ដោយ ៖ សេង បារាំង AMS

លោក អ៊ា សុវណ្ណារ៉ា | Mr. Ea Sovannara

ជីវប្រវត្តិ: លោកមានបទពិសោធន៍ជាង ១០ឆ្នាំក្នុងប្រព័ន្ធផ្សព្វផ្សាយផ្នែកសេដ្ឋកិច្ច អប់រំ សង្គម និងកម្សាន្ត។ បច្ចុប្បន្នលោកជាការីនិពន្ធនៃសារព័ត៌មាន AMS Economy។

ក្រសួងស្ថាប័ន
រដ្ឋបាលថ្នាក់ក្រោមជាតិ
វិស័យឯកជន