កូនផ្សោតទើបកើត ១ក្បាលបង្ហាញខ្លួននៅតំបន់អភិរក្សអន្លង់ផ្សោតកាំពី

ថ្មីៗនេះកូនផ្សោតទើបកើត ១ក្បាល ដែលមានអាយុប្រមាណ ៤ថ្ងៃ បានបង្ហាញខ្លួននៅតំបន់អភិរក្សអន្លង់ផ្សោតកាំពី ខេត្តក្រចេះ ហើយត្រូវបានក្រុមការងាររដ្ឋបាលជលផលនិងអង្គការ WWF ប្រទះឃើញ ហើយថតបានសកម្មភាពទាំងស្រុងរបស់វា។

កូនផ្សោតថ្មីដែលទើបកើតកាលពីថ្ងៃ ១៤ កុម្ភៈ កន្លងទៅ និងមានអាយុប្រមាណ ៤ ថ្ងៃ បានបណ្ដែតខ្លួនលេងលើផ្ទៃទឹកក្នុងតំបន់អភិរក្សអន្លង់ផ្សោតកាំពី ស្រុកចិត្របុរី ខេត្តក្រចេះ។ សកម្មភាពរបស់កូនផ្សោតដ៏គួរឱ្យស្រលាញ់មួយក្បាលនេះត្រូវបានក្រុមការងាររដ្ឋបាលជលផល និងអង្គការ WWF ថតបានទាំងវីដេអូ ព្រមទាំងរូបសន្លឹក។

តាមរយៈការថតបង្ហាញសកម្មភាពហែលឆ្វែលក្នុងទឹកយ៉ាងរីករាយរបស់កូនផ្សោតថ្មី ព្រមជាមួយរូបរាងដ៏គួរឱ្យស្រលាញ់របស់វាបានអន្ទង់ចិត្ត ឆក់បេះដូងមហាជន និងអ្នកប្រើប្រាស់បណ្ដាញសង្គមឱ្យចង់ទៅលេងកម្សាន្តនៅខេត្តក្រចេះ ក្នុងតំបន់អភិរក្សខាងលើ ដ្បិតចង់ឃើញកូនផ្សោតនោះដោយផ្ទាល់ភ្នែក។

គួរឱ្យដឹងថា បច្ចុប្បន្នសត្វផ្សោតនៅកម្ពុជាមានចំនួនរហូតដល់ ១១៣ ក្បាល (គិតត្រឹម ៥ ឆ្នាំចុងក្រោយ) ហើយផ្សោតថ្មីមួយក្បាលដែលក្រុមការងារបានប្រទះឃើញជាផ្សោតដំបូងដែលកើតក្នុងដើមឆ្នាំ ២០២៦ នេះ៕

ចុចទីនេះ ដើម្បីទស្សនា វីដេអូ ៖ https://www.facebook.com/100064879260244/videos/pcb.1382689500570346/1599901131134860

រូបភាព ៖ ក្រសួងកសិកម្ម រុក្ខាប្រមាញ់ និងនេសាទ

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។

ក្រសួងស្ថាប័ន
រដ្ឋបាលថ្នាក់ក្រោមជាតិ
វិស័យឯកជន