ស្ពានហាលប្រាសាទបេងមាលា ដែលទ្រុឌទ្រោមស្ទើរបាត់រូបរាង ប្រែមកសភាពរឹងមាំវិញហើយ

ស្ពានហាលខាងកើតប្រាសាទបេងមាលា និងចម្លាក់បង្កាន់ដៃនាគ មានសភាពរឹងមាំឡើងវិញ និងមានសោភណភាពគួរឱ្យទាក់ទាញ។ នេះបើតាមការឱ្យដឹងពីអ្នកជំនាញការនៃអាជ្ញាធរជាតិអប្សរា កាលពីពេល ថ្មីៗ នេះ។

ស្ពានហាលនៃប្រាសាទបេងមាលា ដែលរងការខូចខាតនិងទ្រុឌទ្រោមជាខ្លាំងស្ទើរតែបាត់រូបរាង ពេលនេះត្រូវបានជួសជុលសង្គ្រោះ និងបានប្រែក្លាយជាមានសភាពរឹងមាំ និងមានសោភណភាពឡើងវិញហើយ។ តាមការឱ្យដឹងបន្ថែម ស្ពានហាលខាងកើត និងបង្កាន់ដៃចម្លាក់នាគសងខាងចំនួន ៤ កម្រាល ធ្នឹម និងសសរនៃប្រាសាទបេងមាលា ត្រូវបានជួសជុលសង្គ្រោះ និងបានយកទៅដាក់នៅទីតាំងដើម ហើយរន្ធតាដែវក៏អាចឱ្យទឹកហូរឆ្លងកាត់បានឡើងវិញដែរ។ ជាមួយគ្នា អាជ្ញាធរជាតិអប្សរាបានយកចិត្តទុកដាក់ថែទាំត្រួតពិនិត្យជាប្រចាំ សម្អាតស្មៅ ឬរុក្ខជាតិ ចៀសវាងការបង្កការខូចខាតដល់រចនាសម្ពន្ធស្ពានហាលជាបន្តទៀត។

បច្ចុប្បន្ន សាធារណជនអាចមើលឃើញពីរចនាសម្ពន្ធយ៉ាងពេញលេញនៃស្ពានហាលមួយនេះ ជាពិសេសចម្លាក់នាគទាំងសងខាងឈរយាមស្ពានយ៉ាងអង់អាច និងរឹងមាំ ដែលទិដ្ឋភាពនេះបានបាត់បង់ជាច្រើនរយឆ្នាំកន្លងមកហើយ៕

រូបភាព ៖ អាជ្ញាធរជាតិអប្សរា

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។

ក្រសួងស្ថាប័ន
រដ្ឋបាលថ្នាក់ក្រោមជាតិ
វិស័យឯកជន