ក្រុមចម្រៀងខេប៉ុប Stray Kids បានជាប់ចំណាត់ថ្នាក់លេខ ២ លើតារាង Global Artist Chart ដែលបង្ហាញពីសិល្បករលក់ចម្រៀងដាច់បំផុតលើពិភពលោកឆ្នាំ ២០២៥ របស់សហព័ន្ធអន្តរជាតិនៃឧស្សាហកម្មថតសំឡេង IFPI ដោយនៅពីក្រោយកំពូលតារាចម្រៀងប៉ុប Taylor Swift តែម្នាក់ប៉ុណ្ណោះ។ ក្រុមចម្រៀងដែលមានសមាជិក ៨នាក់រួមមាន Bang Chan, Lee Know, Changbin, Hyunjin, Han, Felix, Seungmin, I.N. គឺជាសិល្បករ K-pop តែមួយគត់ដែលជាប់ក្នុងចំណោមសិល្បករកំពូលទាំង ១០ ក្នុងបញ្ជីនេះ។

ផលិតកម្ម JYP Entertainment បានឱ្យដឹងនៅថ្ងៃទី ១៩ ខែកុម្ភៈនេះថា ក្រុម Stray Kids បានដណ្តើមតំណែងលេខ ២ លើតារាង Global Artist Chart ឆ្នាំ ២០២៥។ IFPI ដែលតំណាងឱ្យក្រុមហ៊ុនថតសំឡេងជាង ៨០០០ នៅទូទាំងពិភពលោក តែងធ្វើការចាត់ចំណាត់ថ្នាក់តារាងមួយនេះជារៀងរាល់ឆ្នាំ ដោយផ្អែកលើការលក់អាល់ប៊ុមស៊ីឌី (Physical album) ការទាញយក (Digital downloads) និងទិន្នន័យនៃការស្តាប់តាមអនឡាញ (Streaming) ដែលចេញផ្សាយទូទាំងពិភពលោក។

ក្រុម Stray Kids បានចូលក្នុងតារាង Global Artist Chart ជាលើកដំបូងនៅឆ្នាំ ២០២២ ក្នុងចំណាត់ថ្នាក់លេខ ៧ ហើយពេលនេះពួកគេបានជាប់ក្នុង Top 10 រយៈពេល ៤ ឆ្នាំជាប់ៗគ្នា ដោយសម្រេចបានចំណាត់ថ្នាក់ខ្ពស់បំផុតរហូតមកដល់បច្ចុប្បន្ន។

នៅលើតារាងនេះ ក្រុម Stray Kids បានឈរឈ្មោះក្បែរតារាប៉ុបល្បីៗ រួមមាន Taylor Swift, Drake, The Weeknd, និង Bad Bunny ដែលបញ្ជាក់ថាពួកគេជាសិល្បករ K-pop តែមួយគត់ក្នុងចំណោម Top 10 និងបង្ហាញឱ្យឃើញពីឥទ្ធិពលជាសកលរបស់ពួកគេ។

បន្ទាប់ពី Stray Kids ក្រុមចម្រៀងកូរ៉េមួយទៀតដែលបានជាប់ក្នុងបញ្ជីឆ្នាំចុងក្រោយនេះគឺ Seventeen ដែលស្ថិតនៅចំណាត់ថ្នាក់លេខ ១៤។ តារាចម្រៀងអាមេរិក Taylor Swift បានដណ្តើមតំណែងលេខ ១ ជាលើកទី ៦ ដោយអាចរក្សាតំណែងកំពូលនេះរយៈពេល ៤ ឆ្នាំជាប់ៗគ្នា ចាប់តាំងពីឆ្នាំ ២០២២ មក។

ក្រុមចម្រៀង Stray Kids នឹងបន្តសន្ទុះជាសកលរបស់ពួកគេក្នុងនាមជាតារាឯក (Headliners) នៃមហោស្រពតន្ត្រីធំៗជាច្រើននៅឆ្នាំនេះ។ ជាក់ស្ដែង ពួកគេនឹងសម្តែងនៅមហោស្រពតន្ត្រី The Governors Ball ក្នុងទីក្រុងញូវយ៉ក នៅថ្ងៃទី ៦ ខែមិថុនា និងកម្មវិធី Rock in Rio នៅប្រទេសប្រេស៊ីល នៅថ្ងៃទី ១១ ខែកញ្ញា តាមម៉ោងក្នុងស្រុក ៕