ភ្នំពេញ៖អណ្តើកបិទមុខគឺជាប្រភេទសត្វកម្រមួយលើលោក។វាក៏​មានសមត្ថភាពពិសេសក្នុងការលឹបក្បាល និង ជើងដោយរួញ​ចូល​ទៅក្នុងស្នូករបស់ពួកវា។

លក្ខណៈយ៉ាងពិសេសរបស់សត្វអណ្តើកបិទមុខ គឺ​វាមានចលនា​អាចបិទដោយខ្លួនឯងដោយសារសន្ទះស្នូកទ្រូង​របស់ពួកវាអាចបត់​បានដូចត្រចៀកទ្វារ។ការបន្ស៊ាំ ឬការសម្របខ្លួននេះគឺមានចំពោះ​តែពពួកអណ្តើកបិទមុខប៉ុណ្ណោះ ក្នុង​នោះចំណោមអណ្ដើកជិត ២០ ប្រភេទនៅទូទាំងពិភពលោក ។ដោយឡែកប្រភេទអណ្តើកទឹក និងអណ្តើកគោកផ្សេងៗទៀតសន្ទះស្នូកទ្រូងមិនអាចបត់បែនបានឡើយ។

ក្នុងការផ្សាយកាលពីថ្ងៃទី១៩ ខែ កុម្ភៈ ឆ្នាំ២០២៦មជ្ឈមណ្ឌលអង្គរសម្រាប់​ការ​អភិរក្សជីវៈចម្រុះ(ACCB)បានបង្ហាញពីរបក​គំហើញ​ថា លក្ខណៈ​ពិសេសនៃការសម្របខ្លួនរបស់អណ្ដើកបិទមុខបានជួយឱ្យពួកវាអាចការពារខ្លួនពីសត្វរំពានានា ដោយ​មិនអាចបើកស្នូកដើម្បីចូលទៅកាន់សរីរាង្គ ឬអវយវៈដែលនៅខាងក្នុងរបស់ពួកវាបានឡើយ។

ប៉ុន្តែមជ្ឈមណ្ឌលអង្គរសម្រាប់ការអភិរក្សជីវៈចម្រុះបានបន្តថា ទោះបី​យ៉ាងណាជាអកុសល ដោយស្នូកវាមិនអាចការពារពួកវាបាន​ពីមនុស្ស ដែលជាកត្តាគំរាមកំហែងដ៏ធំបំផុតចំពោះពួកវានៅទូទាំងពិភពលោក។ អណ្តើកបិទមុខ ដូចជាប្រភេទរង​អណ្តើកបិទមុខ (Malayan) ដែរ គឺមានតម្រូវការខ្ពស់ ដោយការជួញដូរយកធ្វើជាអាហារប្រណីតរបស់​មនុស្សនៅ​ទូទាំងអាស៊ីអាគ្នេយ៍។

គួរជម្រាបថាមជ្ឈមណ្ឌលអង្គរសម្រាប់ការអភិរក្សជីវៈចម្រុះ បាន​និង​កំពុងដំណើរការកម្មវិធីបង្កាត់ពូជដោយជោគជ័យសម្រាប់​ប្រភេទដែលរង​គ្រោះជិតផុតពូជនេះ។ជាមួយគ្នាអ្នកទេសចរក៏អាចចូលទៅទស្សនា​មជ្ឈមណ្ឌលអង្គរសម្រាប់ការ​អភិរក្សជីវៈចម្រុះ​ចំពោះប្រភេទអណ្តើកដ៏​អស្ចារ្យ​នេះផងដែរ៕

ដោយ៖ម៉ាដេប៉ូ