ប៉េកាំង ៖ ប្រទេសចិនបានអះអាងថា យន្តហោះចម្បាំង J-10CE របស់ខ្លួន មានសមត្ថភាពមិនចាញ់យន្តហោះចម្បាំង Eurofighter Typhoon ឡើយ ក្នុងអំឡុងពេលសមយុទ្ធប្រយុទ្ធតាមអាកាសសាកល្បងចំនួន ៩ លើក ក្នុងឆ្នាំ ២០២៤ ។

យោងតាមប្រព័ន្ធផ្សព្វផ្សាយរដ្ឋចិន និងប៉ាគីស្ថាន, យន្តហោះ J-10CE បានយកឈ្នះយន្តហោះ Eurofighter Typhoon ជាមួយនឹងលទ្ធផល ៩ទល់នឹង០ ក្នុងអំឡុងសមយុទ្ធយោធារួមគ្នាមួយ មានឈ្មោះថា “Zilzal-II” កាលពីខែមករា ឆ្នាំ២០២៤ នៅប្រទេសកាតា ។

បើតាម South China Morning Post, យន្តហោះចម្បាំង J-10CE របស់កងទ័ពអាកាសប៉ាគីស្ថាន ផលិតដោយប្រទេសចិន បានប្រឈមមុខនឹងយន្តហោះ Eurofighter Typhoon របស់កងទ័ពអាកាសកាតា ។

ក្នុងអំឡុងសមយុទ្ធសាកល្បងនោះ ចំពោះការប្រយុទ្ធចម្ងាយជិត យន្តហោះ J-10CE ឈ្នះយន្តហោះ Eurofighter Typhoon ៥ដងដាច់ ខណៈការប្រយុទ្ធចម្ងាយឆ្ងាយវិញ យន្តហោះ J-10CE ក៏បានយកឈ្នះយន្តហោះ Eurofighter Typhoon ៤ដងដាច់ផងដែរ ។ មកទល់ពេលនេះ ប្រទេសលោកខាងលិចនៅពុំទាន់ធ្វើការឆ្លើយតបចំពោះព័ត៌មាននេះនៅឡើយទេ ។

យ៉ាងណា ការបញ្ចេញព័ត៌មាននេះ បានជួយបង្កើនកេរ្តិ៍ឈ្មោះយន្តហោះចម្បាំងរបស់មហាយក្សចិនយ៉ាងខ្លាំងនៅលើទីផ្សារអាវុធអន្តរជាតិ ជាពិសេសសម្រាប់បណ្តាប្រទេសនៅមជ្ឈិមបូព៌ា និងអាស៊ីអាគ្នេយ៍ ដែលកំពុងស្វែងរកជម្រើសជំនួសយន្តហោះចម្បាំងលោកខាងលិច ៕

ប្រភព ៖ South China Morning Post ប្រែសម្រួល ៖ ឈឹម ទីណា