វាលស្មៅពណ៌មាសនៃតំបន់ភ្នំខ្នងផ្សារចាប់ផ្ដើមបញ្ចេញសម្រស់ទាក់ចិត្តទេសចរឱ្យចង់ទៅលេងកម្សាន្តម្ដងទៀត ដើម្បីផ្ដិតយកទិដ្ឋភាពដ៏ស្រស់ស្អាតប្រៀបបានកម្រាលព្រំពណ៌មាសដែលក្រាលគ្របលើភ្នំធម្មជាតិមួយនេះ។
ភ្នំខ្នងផ្សារ បានក្លាយជាឋានសួគ៌ធម្មជាតិនៃភាគនិរតីនៃប្រទេសកម្ពុជាដែលប្រសព្វមុំបីនៃខេត្តកំពង់ស្ពឺ កោះកុង និងពោធិ៍សាត់។ តំបន់មួយនេះមានវាលស្មៅដ៏ស្រស់ស្អាត និងទេសភាពដ៏ស្រស់ត្រកាលទៅតាមរដូវកាល។ ជាក់ស្ដែង នៅរដូវប្រាំងវាលស្មៅបានប្រែក្លាយជាពណ៌មាស ប្រៀបបីដូចជាកម្រាលពណ៌មាស ដែលគ្របដណ្ដប់លើផ្ទៃនៃដែនដីរបស់ភ្នំខ្នងផ្សារ នៅពេលដែលមានពន្លឺចាំងមកប៉ះ។
ក្រៅពីវាលស្មៅពណ៌មាស ទីនោះក៏មានព្រៃព្រឹក្សាក្រាស់ សំឡេងសត្វតូចៗ បក្សាបក្សីខ្ញៀវខ្ញារ អឺងកង ប្រៀបបានតន្ត្រីបំពេឱ្យអារម្មណ៍បានស្រាកស្រាន្ត រំសាយអស់ទុក្ខកង្វល់នានា ជាមួយបរិយាកាសធម្មជាតិដ៏បរិសុទ្ធ និងខ្យល់ដែលបក់មកប៉ះរាងកាយ ហើយបើសម្លឹងទៅឆ្ងាយបន្តិច អ្នកនឹងបានឃើញពពកហោះកាត់ព្រៃយ៉ាងក្រាស់ ជារសជាតិថ្មីមួយលើតំបន់ធម្មជាតិមួយនេះរហូតត្រូវបានអ្នកទេសចរប្រសិទ្ធិនាមទីនោះថា ឋានសួគ៍ក្រោមមេឃ។
សម្រាប់អ្នកដែលមានបំណងចង់ឡើងទៅកាន់ភ្នំខ្នងផ្សារដំបូងត្រូវធ្វើដំណើរតាមផ្លូវជាតិលេខ៤ ទៅកាន់ទីរួមខេត្តកំពង់ស្ពឺ រួចបត់តាមស្តុប (ច្បារមន) ទៅស្ដាំ ប្រមាណ ១ គីឡូម៉ែត្រ យើងនឹងបានដល់រង្វង់មូលឱរ៉ាល់ (រង្វង់មូលផ្សារកន្ទួត) រួចបន្តដំណើរទៅមុខតាផ្លូវលំ ប្រមាណ ៣៥ គីឡូម៉ែត្រ ដោយជិះកាត់តំបន់ ទេរទឹកពុះ និងទំនប់តាសាល នោះយើងនិងបានដល់លម្ហែបៃតង (ដំណាក់ដំរី) ដែលជាមាត់ច្រកឡើងទៅកាន់កំពូលភ្នំខ្នងផ្សារ៕
រូបភាព ៖ មន្ទីរទេសចរណ៍ ខេត្តកំពង់ស្ពឺ
