ការប្រើជីវិតនៅលីវមកយូរ ធ្វើឱ្យយើងទម្លាប់នឹងការរស់នៅម្នាក់ឯង ទៅណាមកណាដោយខ្លួនឯងបានយ៉ាងស្រួល។ ប៉ុន្តែជួនកាល ក៏មិនអាចហាមចិត្តមិនឱ្យមានអារម្មណ៍ឯកាបានដែរ នៅពេលឃើញអ្នកដទៃមានគូក្បែរកាយ ជាពិសេស ដូចជាក្នុងថ្ងៃបុណ្យនៃសេចក្តីស្រលាញ់ជាដើម។

សម្រាប់អ្នកណាដែលកំពុងមានអារម្មណ៍ថាសោកសៅជាមួយនឹងភាពឯកា រហូតចាប់ផ្តើមបន្ទោសខ្លួនឯងថា “យើងមិនល្អគ្រប់គ្រាន់ដើម្បីឱ្យអ្នកណាម្នាក់មកស្រលាញ់” សូមចងចាំថា វាមិនចម្លែកទេដែលអ្នកមានអារម្មណ៍បែបនេះ។ តែសូមកុំឱ្យគំនិតនេះជះផលអវិជ្ជមានមកលើអ្នក ព្រោះតម្លៃនៃជីវិតអ្នកមិនអាស្រ័យទៅលើ ការមានគូ ឬអត់គូទេ។

ថ្ងៃនេះ AMS សូមណែនាំអត្ថប្រយោជន៍ ៥ ចំណុចពីការនៅលីវ ព្រោះការអត់គូ គឺជា “Privilege” ជាចំណុចពិសេស ដែលមិនមែនមនុស្សគ្រប់គ្នាអាចមានដូច។

១. នៅលីវដើម្បីបានធ្វើអ្វីដែលខ្លួនចង់ធ្វើ  

ការនៅលីវនេះហើយ​ គឺជាដំណាក់កាលជីវិតដែលអ្នកអាច “ផ្តល់ពេលវេលាឱ្យខ្លួនឯង” ល្អបំផុត។ សាកសួរខ្លួនឯងមើលថា តើថ្ងៃនេះមានអ្វីដែលអ្នកចង់ធ្វើតែមិនទាន់មានឱកាសបានធ្វើដែរឬទេ? កត់ត្រាវាទុក ហើយចាប់ផ្ដើមធ្វើវាឱ្យហើយ។ ពេលខ្លះអ្នកមានគូ មិនប្រាកដថា មានពេលទំនេរមកធ្វើរឿងទាំងនេះទេ។

២. នៅលីវដើម្បីអភិវឌ្ឍខ្លួនឯង

ឧស្សាហ៍អភិវឌ្ឍខ្លួនឯងឱ្យបានច្រើន មិនថាជាការបន្ថែមជំនាញថ្មី ចំណេះដឹង ឬភាពរីកចម្រើនក្នុងការងារនោះទេ។ តែពូកែ និងឆ្លាត មន្តស្នេហ៍នឹងកើនឡើងដោយខ្លួនឯង។

៣. នៅលីវដើម្បីបំពេញចន្លោះខ្វះខាត

ចាំបាច់រង់ចាំមនុស្សម្នាក់ទៀតចូលមកបំពេញចន្លោះខ្វះខាតរបស់ខ្លួនឯងធ្វើអ្វី? ចាប់ផ្ដើមបំពេញចន្លោះខ្វះខាតរបស់ខ្លួន​ ដោយខ្លួនឯង ព្រោះមានតែអ្នកទេដែលស្គាល់ខ្លួនឯងច្បាស់បំផុត។ នៅពេលដែលអ្នកធ្វើឱ្យខ្លួនឯងពេញលេញ ១០០ភាគរយ ការមានគូគឺជាជម្រើស មិនមែនដើម្បីយកមកបំពេញចន្លោះឱ្យគ្រប់ ១០០ភាគរយនោះទេ។

៤. នៅលីវដើម្បីស្រឡាញ់ខ្លួនឯង

ការស្រលាញ់ខ្លួនឯង គឺជារឿងសំខាន់ក្នុងជីវិត។ បើអ្នកមិនទាន់ចេះស្រឡាញ់ខ្លួនឯង អ្នកក៏មិនអាចស្រឡាញ់អ្នកដទៃបានដែរ។ មើលថែខ្លួនឯងឱ្យបានល្អ ដូចដែលអ្នកចង់ឱ្យអ្នកដទៃមកមើលថែអ្នក។ ធ្វើម្ហូបល្អៗញ៉ាំ ទិញរបស់ដែលខ្លួនឯងចង់បាន ចូលហាងធ្វើក្រចក ម៉ាស្សាមុខ ដរាបណាអ្វីដែលអ្នកចង់ធ្វើមិនប៉ះពាល់អ្នកដទៃ ធ្វើវាចុះ។

៥. នៅលីវដើម្បីរក្សាស្ដង់ដារខ្លួនឯង

មិនបាច់ខ្វល់ខ្វាយបន្ទាបស្ដង់ដារខ្លួនឯង ដើម្បីចង់បានអ្នកណាម្នាក់ មកបំបាត់ភាពឯកាទេ។ Right Person នឹងចូលមករកអ្នកក្នុងពេលវេលាដែលស័ក្តិសម ដោយអ្នកមិនចាំបាច់ខំប្រឹងឱ្យហត់នឿយនោះទេ៕