មានថ្ងៃខ្លះ អ្នកត្រូវធ្វើការហត់នឿយពេញមួយថ្ងៃ ស្ទើរគ្មានពេលសម្រាក។ លុះដល់ពេលចូលគេង អ្នករំពឹងថា នឹងបានគេងលក់ស្កប់ស្កល់ដើម្បីបញ្ចូលថាមពលឱ្យរាងកាយវិញ។ តែការពិតជាក់ស្ដែង ពេលអ្នកដាក់ខ្លួនគេង ភ្នែកបែរជាត្រូវបញ្ឈរចោល ខួរក្បាលនៅតែវិលវល់ រហូតត្រូវប្រែខ្លួនចុះឡើងស្ទើរពេញមួយយប់។  

ផ្អែកតាម The Standard ស្ថានភាពនេះមិនមែនត្រឹមតែជារឿងស្ត្រេសទូទៅនោះទេ ប៉ុន្តែវាគឺជាសញ្ញាព្រមានដែលកំពុងប្រាប់ថា រាងកាយរបស់អ្នកកំពុងបាត់បង់តុល្យភាព។

១. ភាពហត់នឿយសន្សំទុក

នៅពេលដែលរឿងកាយបន្តជួបនឹងភាពហត់នឿយក្នុងរយៈពេលយូរជាប់ៗគ្នា រាងកាយរបស់អ្នកនឹងធ្លាក់ចូលក្នុងដំណើរការ Survival Mode។ ហេតុនេះហើយ ទើបធ្វើឱ្យ ប្រព័ន្ធប្រសាទសូម៉ាទិចត្រូវធ្វើការធ្ងន់ រហូតធ្វើឱ្យអរម៉ូនស្ត្រេស Cortisol ហក់ឡើងខ្ពស់ក្នុងពេលដែលមិនគួរកើតឡើង។

ជាធម្មតា អរម៉ូននេះគួរធ្លាក់ចុះទាបនៅពេលយប់ ដើម្បីឱ្យរាងកាយបានសម្រាក តែនៅពេលអរម៉ូននេះហក់ឡើងខ្ពស់ អ្នកនឹងមានអារម្មណ៍ថាអស់កម្លាំង តែបែរជាមិនអាចគេងលក់បាន។

២. នាឡិកាជីវសាស្ត្រដំណើរការខុសធម្មតា

រាងកាយមនុស្សតែងមាននាឡិកាជីវសាស្ត្រ ឬហៅថា Circadian Rhythm ដែលចាំជូនដំណឹងដល់រាងកាយពីវេលាដែលត្រូវសម្រាក និងពេលវេលាដែលត្រូវភ្ញាក់។ ប៉ុន្តែការធ្វើការធ្ងន់ច្រើនពេក ឬក៏ទទួលបានពន្លឺពណ៌ខៀវពីអេក្រង់ច្រើនពេក ធ្វើឱ្យដំណើរការនៃការបញ្ចេញអរម៉ូនមេឡាតូនីនមានភាពខុសប្រក្រតី។ ហេតុដូច្នេះហើយ ទើបរាងកាយមានភាពច្របូកច្របល់ទាក់ទងនឹងពេលវេលាថា ពេលណាជាពេលថ្ងៃ ពេលណាជាពេលយប់។

៣. ខួរក្បាលមិនអាចផ្អាកដំណើរការ

ភាពហត់នឿយមិនមែនកើតឡើងតែចំពោះរាងកាយប៉ុណ្ណោះទេ​ ប៉ុន្តែវាក៏កើតឡើងចំពោះខួរក្បាលដូចគ្នា។ នៅពេលដែលអ្នកត្រូវប្រើប្រាស់ខួរក្បាលដោះស្រាយបញ្ហាពេញមួយថ្ងៃ នោះខួរក្បាលរបស់អ្នកនឹងបន្តគិតគូរស្វែងរកដំណោះស្រាយទៅលើបញ្ហាមួយចំនួនដែលអ្នកនៅមិនទាន់អាចរកផ្លូវចេញបាននៅឡើយ។ ដូច្នេះហើយ ខួរក្បាលរបស់អ្នកនៅតែបន្តដំណើរការមិនឈប់ ជាហេតុរំខានដល់ដំណេក។

វិធីសាស្រ្តដោះស្រាយ

ដើម្បីអាចឱ្យរាងកាយ និងខួរក្បាលត្រឡប់មកដំណើរការប្រក្រតីដូចដើមជាថ្មី អ្នកគួរសាកល្បងអនុវត្តតាមវិធីសាស្រ្តខាងក្រោម៖

បង្កើត Buffer Zone៖ ក្នុងរយៈពេលចន្លោះពី ៣០ ទៅ ៦០នាទីមុនគេង អ្នកត្រូវអនុញ្ញាតឱ្យរាងកាយ និងខួរក្បាលបានសម្រាក ដោយធ្វើសកម្មភាពណាដែលមិនធ្វើឱ្យខួរក្បាលធ្វើការធ្ងន់ ដូចជាការស្ដាប់ចម្រៀង ឬសម្រួលសាច់ដុំជាដើម។ ការធ្វើបែបនេះ ប្រៀបដូចជាការបញ្ជូនដំណឹងទៅកាន់ប្រព័ន្ធប្រសាទថា ដល់ពេលវេលាសម្រាកហើយ។

បំពេញជាតិម៉ាញេស្យូម៖ ជួនកាល អាការៈគេងមិនលក់នៅពេលហត់នឿយខ្លាំង កើតចេញពីការខ្វះជាតិរ៉ែដូចជា ម៉ាញេស្យូម ដែលមានមុខងារជួយសម្រួលសាច់ដុំ និងប្រព័ន្ធប្រសាទ។ ការទទួលទានអាហារដែលសម្បូរទៅដោយម៉ាញេស្យូម ដូចជា គ្រាប់ផ្កាឈូករ័ត្ន ឬគ្រាប់ស្វាយចន្ទី ក៏ជួយឱ្យរាងកាយកាត់បន្ថយភាពតានតឹងបានដែរ។

ធ្វើ Digital Sunset៖ អ្នកគួរកំណត់ពេលវេលាសម្រាកពីការប្រើប្រាស់ឧបករណ៍ឌីជីថល ដើម្បីឱ្យខួរក្បាលបានសម្រាក កាត់បន្ថយការទទួលព័ត៌មានថ្មី និងការទទួលពន្លឺពណ៌ខៀវ ដែលជាមូលហេតុមួយរំខានដល់ដំណេក៕