ស្វាគមន៍! វត្ថុបុរាណ ៧៤ រូប សម្រាប់ការវិលត្រឡប់មកកាន់មាតុភូមិកំណើតវិញ

មុននេះបន្តិច ក្រសួងវប្បធម៌ និងវិចិត្រសិល្បៈបានប្រកាសស្វាគមន៍ការវិលត្រឡប់មកកាន់មាតុភូមិកំណើតនៃវត្ថុបុរាណខ្មែរចំនួន ៧៤ រូប ដែលទាមទារបានពីការកាន់កាប់របស់លោក ឌូគ្លាស ឡាចហ្វដ មកកាន់ប្រទេសកម្ពុជា។

ទីបំផុត វត្ថុបុរាណខ្មែរទាំង ៧៤ រូប ដែលបានឃ្លាតចាកពីមាតុប្រទេសអស់ពេលជាច្រើនឆ្នាំ ពេលនេះត្រូវបានបញ្ជូនត្រឡប់មកកម្ពុជាវិញហើយ ដោយអនុលោមតាមកិច្ចព្រមព្រាងឆ្នាំ ២០២០ រវាងក្រសួងវប្បធម៌និងវិចិត្រសិល្បៈ និង គ្រួសារលោក ឡាចហ្វដ។

វត្ថុសិល្បៈទាំងនោះមានអាយុកាលតាំងពីសម័យមុនអង្គរ រហូតដល់សម័យរុងរឿងនៃចក្រភពអង្គរ មានជាអាទ៍ បដិមាដ៏ល្អឯកសាងពីថ្មភក់ និងលោហធាតុ ព្រមទាំងវត្ថុប្រើប្រាស់ក្នុងកិច្ចពិធីផ្សេងៗ។ ក្នុងចំណោមវត្ថុសំខាន់ទាំងនោះមាន បដិមាដ៏ពិចិត្រចំនួន២ សាងពីថ្មភក់នាដើមសម័យអង្គរ ស្ថិតក្នុងរវាង ៥០ឆ្នាំដំបូងនៃសតវត្សទី៩ ក្នុងរាជ្យព្រះបាទជ័យវរ្ម័នទី២ , បដិមាទេពប្រុសនិងទេពស្រីមួយគូ , ព្រះសិរ្សព្រះព្រហ្ម សាងពីថ្មភក់ និងបដិមាយក្ស (រាក្ស័ស) មកពីតំបន់កោះកេរ្ត៍ , ព្រះសិរ្សព្រះព្រហ្មដែលមានទម្រង់ព្រះភក្ត្រស្ងប់និងពោរពេញដោយអំណាច , វត្ថុពិចិត្រមួយទៀតនោះគឺបដិមាសំរឹទ្ធរចនាបថបាខែង ដែលជាស្នាដៃឯកបង្ហាញពីការវិវត្តផ្នែកមដិមាសាស្ត្រនាដើមសម័យអង្គរ។ គួរឱ្យដឹងថា វត្ថុបុរាណទាំង ៧៤ នេះពុំមែនគ្រាន់តែជាស្នាដៃ តែជាសាក្សីរស់នៃបញ្ញាញាណ និងទេពកោសល្យរបស់បុព្វបុរស និងដួងព្រលឹងនៃអារ្យធម៌ខ្មែរ៕

រូបភាព ៖ ក្រសួងវប្បធម៌

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។