បវរកញ្ញាខ្មែរកូនកាត់អ៊ីតាលី Angelia Dougherty កំពុងក្រសោបបានប្រជាប្រិយភាពពីអ្នកគាំទ្រនៅកម្ពុជា

Angelia Dougherty ដែលជាកូនខ្មែរកាត់អ៊ីតាលី និងបានធំធាត់ឡើងនៅសហរដ្ឋអាមេរិក តែកញ្ញាមានចិត្តចង់ថែរក្សាវប្បធម៌ខ្មែរ បើទោះរស់នៅនាយសមុទ្រក៏ដោយ ក៏នាងចេះរាំរបាំខ្មែរយ៉ាងស្ទាត់ជំនាញ និងបង្កើតក្រុមរបាំប្រពៃណីខ្មែរថែមទៀតផង។

Angelia មានរូបសម្រស់ស្រស់ស្អាត និងមានភាពឈ្លាសវៃ និងសមត្ថភាពទាំងក្នុងការរាំរបាំប្រពៃណីខ្មែរនិងរាំសម័យហ៊ីបហប។ ថ្មីៗនេះ Angelia Chanthy បានមកកម្ពុជា ហើយក៏បានថតរូប និងវីដេអូផងដែរដោយមានគ្រងឈុតអប្សរារាំនៅប្រាសាទអង្គរវត្តធ្វើឲ្យអ្នកលេងបណ្ដាញសង្គមភ្ញាក់ផ្អើលជាមួយភាពប៉ិនប្រសព្វ។

ស្ថិតក្នុងឈុតបុរាណខ្មែរ សម្រស់ Angelia ស្រស់ស្រទន់ គយគន់មិនចេះណាយ ហើយបើទោះជាធំធាត់លើទឹកដីអាមេរិក តែកញ្ញាបានប្រើប្រាស់ភាសាខ្មែរ លើបណ្ដាញសង្គម និងការសន្ទនាផ្សេងៗ។

ស្ថិតក្នុងវ័យ ២០ ឆ្នាំ Angelia ធ្វើឲ្យមហាជនអត់ទ្រាំមិនកោតសរសើរនាងមិនបានឡើយ ទាំងសម្រស់ និងទឹកចិត្ត។ ហេតុដូច្នេះហើយម្នាក់ៗពិតជាចង់ឃើញនាង ទៅចូលរួមប្រកួតប្រជែងសម្រស់ដែលតំណាងឲ្យខ្មែរផងដែរ។ នៅអាមេរិក Angelia Chanthy Dougherty ក៏តែងតែត្រូវបានគោរពអញ្ជើញឲ្យចូលរួមសម្ដែងជាមួយក្រុម Apsara Angels Dance Inc ដោយរាំរបាំអប្សរា។

គួរបញ្ជាក់ផងដែរថា Angelia Chanthy Dougherty កាលពីអាយុ ១៦ ឆ្នាំ នាងបានបង្កើតសាលារបាំផ្ទាល់ខ្លួន ដែលមានឈ្មោះថា Apsara Angel Dance Inc.។ នាងមានម្ដាយជាជនជាតិខ្មែរ និងឪពុកជាជនជាតិអ៊ីតាលី ហើយនាងបានបញ្ចប់ការសិក្សាសាកលវិទ្យាល័យ Thomas Jefferson និងម្ចាស់មកុដ Pacific Miss Asian American 2023៕