ក្រុមគ្រួសាររបស់តារាសម្តែងតៃវ៉ាន់ដ៏ល្បីល្បាញ Barbie Hsu ឬតួ សាន់ឆាយ ក្នុងរឿង F4 បានចេញមុខបដិសេធជាសាធារណៈចំពោះសេចក្តីរាយការណ៍ដែលថាពួកគេកំពុងមានជម្លោះជាមួយស្វាមីរបស់តារាស្រីដែលបានទទួលមរណភាពរូបនេះ គឺតារាចម្រៀងកូរ៉េខាងត្បូង DJ Koo (Koo Jun-yup) ជុំវិញរឿងមរតក ដោយហៅការលើកឡើងទាំងនោះថាជាការទស្សន៍ទាយដែលបង្កគ្រោះថ្នាក់។

រយៈពេលជិតមួយឆ្នាំបន្ទាប់ពីមរណភាពរបស់ សាន់ឆាយ ប្រព័ន្ធផ្សព្វផ្សាយតៃវ៉ាន់បានរាយការណ៍កាលពីថ្ងៃទី១០ ខែកុម្ភៈថា DJ Koo កំពុងរៀបចំនីតិវិធីផ្លូវច្បាប់ប្រឆាំងនឹងម្តាយរបស់ នាងជុំវិញការបែងចែកទ្រព្យសម្បត្តិរបស់តារាស្រីរូបនេះ ដោយបានពិពណ៌នាអំពីភាពតានតឹងដែលត្រូវបានគេសង្ស័យនៅពីក្រោយការបង្ហាញខ្លួនរបស់ក្រុមគ្រួសារនៅឯពិធីសម្ពោធរូបសំណាកអនុស្សាវរីយ៍របស់ សាន់ឆាយ នាពេលថ្មីៗនេះ ក្នុងឱកាសរម្លឹកខួបមួយឆ្នាំនៃការស្លាប់របស់នាង។

សេចក្តីរាយការណ៍បន្ថែមបានអះអាងថា ម្តាយរបស់ Barbie Hsu បានចាត់តាំងមេធាវីដើម្បីឆ្លើយតបនឹងរឿងនេះ។

ទោះជាយ៉ាងណា ចុងក្រោយនេះម្តាយរបស់ Barbie Hsu បានបដិសេធការអះអាងទាំងអស់នេះទាំងស្រុង ដោយបានសង្កត់ធ្ងន់លើទំនាក់ទំនងរបស់គាត់ជាមួយ DJ Koo ថា៖ «ខ្ញុំស្អប់ការប្ដឹងផ្ដល់ណាស់។ វាជាការខ្ជះខ្ជាយទាំងកម្លាំងមនុស្ស និងលុយកាក់ … ឥឡូវនេះខ្ញុំហៅ Koo ថាជាកូនប្រុសរបស់ខ្ញុំ។ គាត់ស្រឡាញ់កូនស្រីខ្ញុំយ៉ាងជ្រាលជ្រៅ ហើយគោរពខ្ញុំណាស់។ គាត់គឺជាសមាជិកនៃគ្រួសាររបស់យើង»។

Dee Hsu ដែលជាប្អូនស្រីរបស់ Hsu ក៏បានឆ្លើយតបទៅនឹងសេចក្ដីរាយការណ៍ទាំងនេះផងដែរ។

«អ្នកណាដែលបង្កើតពាក្យចចាមអារ៉ាមប្រភេទនេះ គឺមានចិត្តអាក្រក់ និងមានបំណងមិនល្អ។ Koo បានផ្តល់សេចក្តីស្រឡាញ់ដ៏បរិសុទ្ធ និងសុភមង្គលពិតប្រាកដដល់បងស្រីរបស់ខ្ញុំ។ គ្រួសាររបស់យើងដឹងគុណគាត់។ គាត់គឺជាគ្រួសាររបស់យើង។ យើងនឹងការពារគាត់» នាងបាននិយាយ។

Dee Hsu បានសម្តែងក្តីសង្ឃឹមថា ការទស្សន៍ទាយជុំវិញជម្លោះគ្រួសារនឹងត្រូវបញ្ចប់។

គួររម្លឹកថា តារាសម្តែងតៃវ៉ាន់ Barbie Hsu និងស្វាមីជាតារាចម្រៀងកូរ៉េ បានទាក់ទងគ្នាដំបូងនៅឆ្នាំ ១៩៩៨ មុនពេលបែកគ្នានៅពេលក្រោយមក។ ពួកគេបានជួបជុំគ្នាម្តងទៀតបន្ទាប់ពីជាងពីរទសវត្សរ៍ ហើយបានរៀបការនៅឆ្នាំ ២០២២ ដោយទទួលបានការចាប់អារម្មណ៍យ៉ាងខ្លាំងនៅក្នុងរង្វង់កម្សាន្តអាស៊ី។ Barbie Hsu បានទទួលមរណភាពនៅខែកុម្ភៈ ឆ្នាំ ២០២៥ ដោយសារជំងឺរលាកសួតស្រួចស្រាវ ខណៈពេលកំពុងធ្វើដំណើរកម្សាន្តជាគ្រួសារទៅកាន់ប្រទេសជប៉ុន។

បន្ទាប់ពីមរណភាពរបស់នាង ប្រព័ន្ធផ្សព្វផ្សាយក្នុងស្រុកបានរាយការណ៍ថា ទ្រព្យសម្បត្តិដែល Barbie Hsu បានបន្សល់ទុកត្រូវបានប៉ាន់ប្រមាណថាមិនតិចជាង ១ ពាន់លានដុល្លារតៃវ៉ាន់ (ប្រហែល ៣២ លានដុល្លារ) ឡើយ។ យោងតាមច្បាប់មរតករបស់តៃវ៉ាន់ កូនតូចពីរនាក់របស់ Hsu និង DJ Koo ត្រូវបានរំពឹងថានឹងទទួលបានមរតកម្នាក់មួយភាគបីនៃទ្រព្យសម្បត្តិសរុប។

DJ Koo ធ្លាប់បានចេញសេចក្តីថ្លែងការណ៍ជាសាធារណៈ ខណៈពេលដែលមានអត្ថបទព័ត៌មានទស្សន៍ទាយអំពីមរតកបានលេចឡើង៖ «ខ្ញុំកំពុងរងទុក្ខវេទនា និងសោកសៅយ៉ាងខ្លាំង ហើយខ្ញុំមិនមានកម្លាំង ឬឆន្ទៈក្នុងការនិយាយអ្វីទាំងអស់។ មរតកនេះតំណាងឱ្យលទ្ធផលនៃកិច្ចខិតខំប្រឹងប្រែងពេញមួយជីវិតរបស់ Hsu ដើម្បីការពារគ្រួសាររបស់នាង។ ខ្ញុំមានបំណងផ្ទេរសិទ្ធិអំណាចទាំងអស់ទាក់ទងនឹងចំណែករបស់ខ្ញុំទៅឱ្យម្តាយក្មេករបស់ខ្ញុំ» ៕