ប្រជាប្រិយភាពរបស់តារាសម្ដែងចិនលំដាប់ជួរមុខ និងជាតួឯកប្រុសក្នុងរឿង “Pursuit of Jade”  Zhang Linghe កំពុងតែហក់ឡើងយ៉ាងខ្លាំងនៅលើឆាកអន្តរជាតិ។ ជាក់ស្ដែងកាលពីថ្ងៃពុធ ទី៤ ខែមិថុនា ឆ្នាំ២០២៦ កន្លងទៅលោក Jing Quan ឯកអគ្គរដ្ឋទូតចិនប្រចាំប្រទេសហ្វីលីពីនបានប្រកាសថា តារាសម្ដែងវ័យ ២៨ ឆ្នាំរូបនេះត្រូវបានអញ្ជើញជាផ្លូវការឱ្យមកបំពេញទស្សនកិច្ចនៅទីក្រុងម៉ានីឡា។

ប៉ុន្តែសម្រាប់ព័ត៌មានលម្អិត និងកាលវិភាគពិតប្រាកដនៃការធ្វើដំណើរនេះមិនទាន់ត្រូវបានបង្ហាញនៅឡើយទេ។ យោងតាម Philstar.com បានទាក់ទងទៅកាន់ស្ថានទូតចិនប្រចាំទីក្រុងម៉ានីឡា ដើម្បីសុំការបញ្ជាក់បន្ថែម ប៉ុន្តែមិនទាន់ទទួលបានការឆ្លើយតបវិញនៅឡើយទេ យ៉ាងណាដំណឹងដែលទទួលបានគឺសំបុត្រអញ្ជើញផ្លូវការមួយនេះបានទៅដល់ដៃក្រុមការងារ និងតារាប្រុសហើយ។

តារាសម្ដែង Zhang Linghe បានអង្រួនចិត្តអ្នកគាំទ្រទូទាំងពិភពលោក បន្ទាប់ពីបានដើរតួជាវីរបុរសលើសមរភូមិ Xie Zheng នៅក្នុងរឿងភាគមនោសញ្ចេតនានយោបាយចិនដ៏ល្បីល្បាញប្រចាំឆ្នាំ ២០២៦ គឺរឿង “Pursuit of Jade” ដោយសម្តែងរួមគ្នាជាមួយតារាស្រី Tian Xiwei ដើរតួជា Fan Changyu។ ទោះបីជារឿងភាគនេះបានបញ្ចប់ទៅជាច្រើនខែហើយក្ដីក៏សន្ទុះនៃការគាំទ្រនៅតែបន្តកើនឡើងយ៉ាងខ្លាំងដែលធ្វើឱ្យលោកទទួលបានអ្នកតាមដាននៅលើគណនី Instagram ផ្ទាល់ខ្លួនរហូតដល់ ៥.១ លាននាក់។

ក្រៅពីស្នាដៃដ៏លេចធ្លោមួយនេះតួឯកប្រុសវ័យ ២៨ ឆ្នាំរូបនេះក៏ធ្លាប់បានកសាងកេរ្តិ៍ឈ្មោះក្នុងរឿងភាគល្បីៗជាច្រើនហូរហែដូចជា Sparkle Love (2020), Love Crossed & Flourish in Time (2021), Love Between Fairy and Devil (2022), My Journey to You (2023), The Princess Royal (2024) និង The Best Thing & Our Generation (2025)។

ចំពោះគម្រោងបន្ទាប់ លោកបានត្រៀមនឹងបង្ហាញខ្លួនក្នុងរឿងភាគធំៗចំនួនពីរទៀត គឺរឿង Overdo សម្តែងជាមួយ Wang Churan និងរឿង The Road to Glory សម្តែងជាមួយ Lin Yun ដែលនឹងត្រូវចាក់ផ្សាយនៅលើទម្រង់ iQIYI និង Tencent Video៕