ក្នុងគ្រាចូលរួមកម្មវិធីផតខាស Therapuss របស់ Jake Shane ដើម្បីផ្សព្វផ្សាយអាល់ប៊ុមថ្មី Dinner Party  ដែល ចេញផ្សាយកាលពីថ្ងៃទី៥ ខែមិថុនា កន្លងទៅ Niall Horan បាននិយាយពីភាពខុសគ្នារវាងក្រុមចម្រៀងបុរសក្នុងសម័យមុន និងសម័យបច្ចុប្បន្ន បន្ថែមដោយការកោតសរសើរទៅលើក្រុមខេប៉ុប BTS។

តារាចម្រៀងវ័យ ៣២ឆ្នាំ បាននិយាយថា៖ “កាលពីពេលនោះ ពួកយើងមិនមានក្បាច់រាំដែលបង្កើតឡើងយ៉ាងហ្មត់ចត់ បត់ឆ្វេងបត់ស្តាំ ឬអ្វីបែបនោះទេ។ ដូច្នេះវាមានភាពខុសគ្នាខ្លាំងណាស់។ នៅក្នុងសម័យកាលនីមួយៗ យើងតែងតែមាន Boy Band ប៉ុន្តែក្រុមទាំងនោះមានលក្ខណៈខុសៗគ្នា”។

Niall Horan បានលើកតួយ៉ាងរបស់ក្រុមខ្លួនថា៖ “ដូចជាពួកយើង គឺមិនបានស្លៀកសម្លៀកបំពាក់ពណ៌សសុទ្ធ ហើយធ្វើអ្វីៗក្នុងទម្រង់ដូចគ្នាទាំងស្រុងដូចជាក្រុម *NSYNC ឬ Backstreet Boys នោះឡើយ។ ពួកយើងគ្រាន់តែដើរទៅជុំវិញឆាកតែប៉ុណ្ណោះ។ ប៉ុន្តែខ្ញុំគិតថាសម្រាប់ក្រុម K-Pop វិញ ពួកគេមានក្បួនខ្នាតច្បាស់លាស់ជាង ហើយពួកគេមើលទៅដូចជាកីឡាករអ៊ីចឹង”។

បន្ទាប់មក លោកបានលើកយកក្រុម BTS មកប្រៀបធៀបថា៖ “នៅពេលដែលអ្នកមើលក្រុម BTS រាំ អ្នកច្បាស់ជានិយាយថា អូខេ ខ្ញុំមិនអាចធ្វើអ្វីដូចដែលពួកគេកំពុងតែធ្វើនោះទេ គឺវាអស្ចារ្យខ្លាំង។ វាមើលទៅពិបាក តែវាអស្ចារ្យខ្លាំង”។

ដ្បិត ជាក្រុមដែលមិនមានក្បាច់រាំច្រើន តែចាប់តាំងពីចូលប្រឡូកក្នុងវិស័យចម្រៀង កាលពីឆ្នាំ ២០១០ One Direction បានបង្កើតប្រជាប្រិយភាព ទាញយកបេះដូងអ្នកស្ដាប់ពីជុំវិញសកល។ លុះមកដល់ឆ្នាំ ២០១៦ ក្រុមចម្រៀងប៉ុបមួយនេះបានសម្រេចចិត្តផ្អាកសកម្មភាពក្រុម ដោយបែរទៅផ្ដោតលើការងារផ្ទាល់ខ្លួន៕