ក្រោយចាកចេញពីក្រុម ENHYPEN តារាខេប៉ុបប្រុស Heeseung បានចាប់ផ្ដើមជំពូកថ្មីក្នុងអាជីពដដែលនេះ ដោយណែនាំខ្លួនជាសិល្បករទោល ក្រោមឈ្មោះថា EVAN។

កាលពីថ្ងៃទី៨​ ខែមេសា នេះ EVAN បានបើកដំណើរការគណនីបណ្ដាញសង្គមផ្លូវការរបស់ខ្លួន និងបានទម្លាយរូបភាព Profile ដំបូង ដែលជាសញ្ញានៃការចាប់ផ្ដើមជាថ្មី បន្ទាប់ពីការចាកចេញពីក្រុម។ នៅក្នុងរូបភាពទាំងនោះ តារាប្រុសវ័យ ២៥ឆ្នាំ បានបង្ហាញខ្លួនជាមួយម៉ូដសក់បែបធម្មជាតិ និងការតុបតែងមុខតិចតួចបំផុត។

ក្នុងគោលគំនិតបែបនេះ ទីភ្នាក់ងារ Belift Lab បានពិពណ៌នាថា នេះគឺជាទម្រង់មុខមាត់ដ៏ “ពិតប្រាកដ” និង “បរិសុទ្ធ” របស់តារាប្រុសរូបនេះ ខណៈផ្តោតសំខាន់ទៅលើអត្តសញ្ញាណបែបធម្មជាតិ ដែលជាទម្រង់ដើមរបស់លោកមុនពេលកែច្នៃ ឬប្រែប្រួលទៅតាមឧស្សាហកម្មកម្សាន្ត និងមុនពេលដែលមជ្ឈដ្ឋានខាងក្រៅមានការយល់ឃើញបែបណាមួយមកលើលោក។  

តារាប្រុសដែលទើបតែប្ដូរឈ្មោះនេះ បាននិយាយថា ឈ្មោះ EVAN មានអត្ថន័យសំខាន់សម្រាប់ខ្លួនលើសពីការប្តូរឈ្មោះធម្មតា។ លោកបាននិយាយថា៖ “EVAN គឺជាឈ្មោះដែលខ្ញុំបានប្រើតាំងពីក្មេង។ វាពោរពេញទៅដោយការចងចាំដ៏មានតម្លៃ។ ខ្ញុំចង់យកឈ្មោះដែលខ្ញុំបានបង្កើតកាលពីនៅតូចមកប្រើវិញ ហើយបង្ហាញខ្លួនជា EVAN ជាមួយផ្នត់គំនិតថ្មី”។

លោកបានឱ្យដឹងបន្ថែមទៀតថា៖ “ខ្ញុំនឹងឈានជើងចូលទៅរកអ្នកគាំទ្របន្តិចម្តងៗ ជាមួយតន្ត្រីដែលឆ្លុះបញ្ចាំងពីភាពស្មោះត្រង់ និងដ៏ធម្មជាតិបំផុតរបស់ខ្ញុំ”។

គួរឱ្យដឹងផងដែរថា EVAN បានបង្ហាញខ្លួនជាលើកដំបូងជាមួយក្រុម ENHYPEN ក្នុងឆ្នាំ ២០២០ ក្រោមឈ្មោះថា Heeseung ហើយទទួលបានការចាប់អារម្មណ៍យ៉ាងឆាប់រហ័សតាមរយៈទេពកោសល្យដ៏សម្បូរបែប រួមមានសមត្ថភាពច្រៀង បច្ចេកទេសរ៉េប និងការសម្តែងលើឆាកតន្រ្តីនានា។

លោកក៏បានសាងកេរ្តិ៍ឈ្មោះជាអ្នកនិពន្ធបទចម្រៀងផងដែរ ដោយបានរួមចំណែកក្នុងបទចម្រៀងដូចជា Highway 1009 និង Dial Tragedy ដែលបង្ហាញពីជំនាញក្នុងការសរសេរទំនុកច្រៀង បង្កើតបទភ្លេង និងការផលិតបទចម្រៀង។

លុះមកដល់ថ្ងៃទី១០ ខែមីនា កន្លងទៅ Belift Lab បានប្រកាសពីព័ត៌មាននៃការចាកចេញរបស់ Heeseung តាមរយៈកម្មវិធី Weverse ដោយបានពន្យល់ថា ក្រោយមានការពិភាក្សាជាច្រើនទាក់ទងនឹងទិសដៅ និងគោលដៅអនាគតរបស់ក្រុម លទ្ធផលបានបង្ហាញថា Heeseung មានចក្ខុវិស័យចង់បន្តធ្វើតន្ត្រីផ្ទាល់ខ្លួន ជាសិល្បករទោល៕