នាយកប្រតិបត្តិធនាគារ J Trust Royal លើកឡើងពីហេតុផលដែលបន្តបរិច្ចាគ បន្តគាំទ្រ ដល់សមាគមសិល្បករខ្មែរ

នៅរសៀលថ្ងៃ ២ ខែកក្កដា ឆ្នាំ ២០២៦ នេះសមាគមសិល្បករខ្មែរ ដែលដឹកនាំដោយលោកជំទាវអ្នកឧកញ៉ា ម៉ៅ ចំណាន បានចូលរួមក្នុងវិធីប្រគល់-ទទួលឧបត្ថម្ភប្រចាំឆ្នាំ ១០ ម៉ឺនដុល្លារពី J Trust Royal Bank ហើយក៏ជាឆ្នាំទី ៣ ផងដែរ ដែលធនាគារនេះ ទ្រទ្រង់ដល់សមាគម។

ពិធីនេះប្រព្រឹត្តទៅនៅការិយាល័យធនាគារ J Trust Royal Bank ក្រោមវត្តមានរបស់លោក Toru Myochin នាយកប្រតិបត្តិធនាគារ J Trust Royal និងលោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ ព្រមទាំងសិល្បករ និងបុគ្គលិកជាន់ខ្ពស់របស់ធនាគារJ Trust ។

ថ្លែងក្នុងកម្មវិធីនាយកប្រតិបត្តិធនាគារ J Trust Royal លោក Toru Myochin ថាក្នុងនាមជាជនជាតិជប៉ុនរស់នៅ និងបំពេញការងារនៅកម្ពុជា លោកបានកោតសរសើរយ៉ាងជ្រាលជ្រៅចំពោះតម្លៃនៃអរិយធម៌ និងវប្បធម៌ដ៏សម្បូរបែបរបស់កម្ពុជា។ លោកបន្តថាភាពរឹងមាំរបស់ប្រទេសមួយ មិនត្រូវបានវាស់ស្ទង់ត្រឹមកំណើនសេដ្ឋកិច្ចប៉ុណ្ណោះទេ ប៉ុន្តែជាការរួមបញ្ចូលនូវសមត្ថភាពក្នុងការអភិរក្ស និងលើកតម្កើងអត្តសញ្ញាណវប្បធម៌របស់ខ្លួនផងដែរ។

លោក Toru Myochin បានបន្តទៀតថា លោកមានមោទនភាពដែលបានរួមចំណែកគាំទ្រការអភិរក្ស និងផ្សព្វផ្សាយមរតកសិល្បៈវប្បធម៌ខ្មែរ និងអំពាវនាវឲ្យគ្រប់ភាគីបន្តសហការគ្នា ដើម្បីធានាថាសិល្បៈខ្មែរនឹងបន្តរីកចម្រើន និងបំផុសគំនិតដល់មនុស្សជំនាន់ក្រោយ។

ក្រោយស្ដាប់ការថ្លែងសាររបស់លោក Toru Myochin ជាខេមរភាសា ទាំងដែលលោកជាជនជាតិជប៉ុន ធ្វើឲ្យប្រធានសមាគមសិល្បករខ្មែររំភើបជាខ្លាំង ព្រោះនាយកប្រតិបត្តិធនាគារ J Trust Royal និយាយខ្មែរជាលើកដំបូង ដោយជាការថ្លែងសន្ទរកថាយ៉ាងវែងប្រកបដោយអត្ថន័យល្អ និងមានចក្ខុវិស័យច្បាស់លាស់ជាមួយសមាគមសិល្បករខ្មែរ។

ជាការឆ្លើយតប ប្រធានសមាគមសិល្បករខ្មែរលោកជំទាវអ្នកឧកញ៉ា ម៉ៅ ចំណាន បានរៀបរាប់ពីសមិទ្ធផលជាង ២ ឆ្នាំដែលបានឡើងកាន់តំណែង និងរៀបរាប់ពីសមាសភាពថ្នាក់ដឹកនាំដែលជួយឲ្យសមាគមសិល្បករខ្មែរ ដំណើរការទៅមុខជាលំដាប់។

ការឧបត្ថម្ភនេះបានឆ្លុះបញ្ចាំងពីទំនួលខុសត្រូវសង្គម និងចក្ខុវិស័យវែងឆ្ងាយរបស់វិស័យឯកជន ក្នុងការចូលរួមអភិរក្ស និងលើកកម្ពស់មរតកវប្បធម៌ជាតិ។ លោកជំទាវអ្នកឧកញ៉ា ម៉ៅ ចំណាន បានបញ្ជាក់ថា ថវិកាឧបត្ថម្ភដែលសមាគមទទួលបាន នឹងត្រូវប្រើប្រាស់ដោយតម្លាភាព និងប្រសិទ្ធភាព សម្រាប់គាំទ្រសកម្មភាពអភិរក្ស និងអភិវឌ្ឍន៍សិល្បៈ វប្បធម៌ ជួយដល់សិល្បករ និងសិល្បការិនីដែលជួបការលំបាក បណ្ដុះបណ្ដាលយុវជនជំនាន់ក្រោយ និងផ្សព្វផ្សាយតម្លៃសិល្បៈវប្បធម៌ខ្មែរ ទាំងក្នុង និងក្រៅប្រទេស៕

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត