Joshua សមាជិកក្រុមខេប៉ុបបុរស Seventeen នឹងថ្លែងសុន្ទរកថានៅទីស្នាក់ការកណ្តាលរបស់អង្គការ UNESCO នៅទីក្រុងប៉ារីស នាថ្ងៃ ២៥ ខែមិថុនា ឆ្នាំ ២០២៦ ខាងមុខ ក្នុងនាមជាទូតសុឆន្ទៈយុវជន។

ផ្អែកតាមការឱ្យដឹងរបស់ Pledis Entertainment វត្តមានចូលរួមនេះ គឺជាផ្នែកមួយនៃកម្មវិធី “Going Together — For Youth Creativity & Well-Being” ដែលជាគំនិតផ្តួចផ្តើមយុវជនជាសកល ក្រោមកិច្ចសហការរួមគ្នារវាងក្រុម Seventeen និងអង្គការ UNESCO។

តារាចម្រៀងសញ្ជាតិអាមេរិកដើមកំណើតកូរ៉េរូបនេះ នឹងតំណាងឱ្យក្រុម ដើម្បីផ្ញើសារគាំទ្រ និងលើកទឹកចិត្តដល់យុវជនទូទាំងពិភពលោក។ កម្មវិធីនេះនឹងមានការចូលរួមពីអគ្គនាយកអង្គការ UNESCO លោក Khaled El-Enany ហើយនឹងមានការផ្សាយបន្តផ្ទាល់ នៅលើបណ្តាញ YouTube ផ្លូវការរបស់អង្គការផងដែរ។

គួរឱ្យដឹងថា UNESCO បានតែងតាំង Seventeen ជាទូតសុឆន្ទៈតំណាងយុវជនប្រចាំអង្គការនេះ កាលពីឆ្នាំ ២០២៤ ខណៈក្រុមបានបរិច្ចាគថវិកា ១ លានដុល្លារ ដើម្បីបង្កើតមូលនិធិយុវជនសកល។ មូលនិធិនេះមានគោលបំណងគាំទ្រដល់គម្រោងនានាដើម្បីពង្រឹងទំនុកចិត្តរបស់យុវជនតាមរយៈតន្ត្រី សិល្បៈ និងកីឡា ព្រមទាំងការបង្កើតសហគមន៍យុវជនច្នៃប្រតិដ្ឋ និងលើកកម្ពស់សុខភាពផ្លូវចិត្ត៕