នៅថ្ងៃ ១៦ ខែកុម្ភៈ ឆ្នាំ ២០២៦ នេះ ក្រុមអ្នកគាំទ្ររបស់តារាសម្តែង Kim Soo Hyun ទាំងក្នុងប្រទេសកូរ៉េខាងត្បូង និងនៅជុំវិញពិភពលោក បានរួមគ្នាបរិច្ចាគថវិកា ១០០ លានវ៉ុន ឬប្រហែល ៧៥ ០០០ ដុល្លារអាមេរិក ទៅកាន់«មូលនិធិបេះដូងកូរ៉េ» (Korea Heart Foundation) ដើម្បីអបអរសាទរថ្ងៃខួបកំណើតរបស់តារាប្រុសរូបនេះ។
តំណាងអ្នកគាំទ្រដែលបានស្ម័គ្រចិត្តរៀបចំការបរិច្ចាគ បានឲ្យដឹងពីគោលបំណងបន្តវប្បធម៌ចែករំលែក តាមគំរូរបស់ Kim Soo Hyun ដែលតែងតែធ្វើការងារសប្បុរសធម៌រហូតមក។ ថវិកាទាំងអស់នេះ នឹងយកទៅប្រើប្រាស់សម្រាប់ជួយដល់ការចំណាយលើការវះកាត់ សម្រាប់កុមារដែលកើតជំងឺបេះដូង និងកំពុងជួបការលំបាកផ្នែកជីវភាព។
ជាក់ស្ដែង ការបរិច្ចាគនេះក៏មានអត្ថន័យចំពោះតារាប្រុសវ័យ ៣៨ ឆ្នាំរូបនេះ ដោយលោកធ្លាប់មានប្រវត្តិកើតជំងឺបេះដូងកម្រិត ៤ មុននឹងវះកាត់ព្យាបាលមកត្រឹមកម្រិត ១ វិញ កាលពីក្នុងឆ្នាំ ២០១៧។
តំណាងក្រុមអ្នកគាំទ្របានឱ្យដឹងថា៖ “អ្នកគាំទ្រមកពីជុំវិញពិភពលោកបានរួមគ្នា ដើម្បីធ្វើឱ្យថ្ងៃកំណើតរបស់ Kim Soo Hyun កាន់តែមានអត្ថន័យ។ យើងសង្ឃឹមថា ការបរិច្ចាគនេះ នឹងនាំមកក្តីសង្ឃឹមដល់អ្នកជំងឺជាច្រើនដែលកំពុងទទួលការព្យាបាលជំងឺបេះដូង”។
តំណាងរូបនោះបានបន្ថែមថា៖ “យើងមានគម្រោងបន្តគាំទ្រ Kim Soo Hyun ព្រមទាំង បន្តសកម្មភាពដែលផ្សព្វផ្សាយឥទ្ធិពលវិជ្ជមាននៅក្នុងសង្គមផងដែរ”។
គួរឱ្យដឹងថា បច្ចុប្បន្បនេះ Kim Soo Hyun កំពុងតែជាប់គាំងក្នុងរឿងអាស្រូវ ក្រោយពីតារាស្រី Kim Sae Ron បានទទួលមរណភាពកាលពីថ្ងៃ១៦ ខែកុម្ភៈ ឆ្នាំ ២០២៥ កន្លងទៅ។ លុះមកដល់ខែមីនា គណនី YouTube Garo Sero Institute បានផ្សព្វផ្សាយថា ក្រុមគ្រួសាររបស់តារាស្រីបានអះអាងថា Kim Soo Hyun បានទាក់ទងនឹង Kim Sae Ron តាំងតែពីនាងនៅជាអនីតិជន។ នៅក្នុងសន្និសីទសារព័ត៌មានផ្ទាល់ខ្លួន Kim Soo Hyun បានចេញមកបដិសេធយ៉ាងដាច់អហង្ការចំពោះការចោទប្រកាន់ទាំងនេះ ខណៈពេលដែលភាគីទាំងសងខាងបានបង្ហាញភស្តុតាងរៀងៗខ្លួនជាបន្តបន្ទាប់។ យ៉ាងណាមិញ អស់ពេលជាង ១ ឆ្នាំមកហើយ បញ្ហាជម្លោះផ្លូវច្បាប់នៅតែបន្តរហូតមកដល់ពេលបច្ចុប្បន្ននេះ។
ក្រោយមានរឿងអាស្រូវ Kim Soo Hyun បានទទួលផលប៉ះពាល់លើអាជីពការងារ រួមមានការសម្ដែងភាពយន្តភាគរបស់ Disney+ ក៏ដូចជាការបញ្ចប់កុងត្រាផ្សព្វផ្សាយផលិតផល និងការប្ដឹងទារសំណងពីយីហោនានា។
ដូចសកម្មភាពគ្រានេះ អ្នកគាំទ្រក៏បានចូលរួមការពារលោកជាបន្តបន្ទាប់មិនថានៅលើបណ្ដាញសង្គម និងតាមរយៈផ្ទាំងផ្សព្វផ្សាយតាមរថយន្តនានានោះទេ៕
