ត្រៀមហើយនៅ? រត់ជាមួយ អេនណា ដើម្បីផ្សព្វផ្សាយទេសចរណ៍រដូវកាលបៃតង និងជួយកុមារកម្ពុជា

ត្រៀមខ្លួនហើយឬនៅ? ចូលរួមរត់ជាមួយបវរកញ្ញាស្រអែមស្រស់ កុយ អេនណា លើកំពូលភ្នំគិរីរម្យ នៅក្នុងព្រឹត្តិការណ៍រត់ដើម្បីផ្សព្វផ្សាយទេសចរណ៍ក្នុងរដូវកាលបៃតង និងរត់ដើម្បីជួយដល់កុមារកម្ពុជា។

នាថ្ងៃទី ២៨ ខែ មិថុនា ឆ្នាំ ២០២៦ ខាងមុខ ក្រសួងទេសចរណ៍នឹងមានព្រឹត្តិការណ៍រត់ចម្ងាយ ៥ គីឡូម៉ែត្រ លើកំពូលភ្នំគិរីរម្យ ចាប់ពីម៉ោង ៦ នាទីព្រឹកតទៅ។ ព្រឹត្តិការណ៍នេះរៀបចំឡើងក្នុងគោលបំណងធំៗចំនួន២ រួមមាន៖ ទី១. ផ្សព្វផ្សាយទេសចរណ៍ធម្មជាតិ និងជំរុញការធ្វើដំណើរកម្សាន្តក្នុងរដូវកាលបៃតង និងទី២. ប្រមូលថវិកាជួយដល់កុមារកម្ពុជា។

តាមរយៈការជូនដំណឹងលើផេកផ្លូវការខាងលើ ប្រាក់ចំណេញពីការលក់សំបុត្រទាំងអស់នឹងត្រូវបរិច្ចាគទៅកាន់សាលារៀន គាំទ្រសុខុមាលភាពកុមារ និងការអប់រំនៅតំបន់ដាច់ស្រយាល។ ជាមួយគ្នា បណ្ដាអ្នកចូលរួមក្នុងព្រឹត្តិការណ៍ខាងលើនឹងទទួលបានបទពិសោធន៍មួយប្លែកគឺការរត់លើផ្លូវបេតុងចុះឡើងភ្នំ ដែលអាចឱ្យខ្លួនប្រាណរបស់អ្នកបានផ្សារភ្ជាប់ជាមួយធម្មជាតិបៃតងដ៏បរិសុទ្ធ។

ខាងក្រោមជាព័ត៌មានលម្អិតអំពីតម្លៃសំបុត្រចូលរួម៖

សំបុត្រ 𝗘𝗮𝗿𝗹𝘆 𝗕𝗶𝗿𝗱: ២០ ដុល្លារ

សំបុត្រធម្មតា: ២៥ ដុល្លារ

ចុះឈ្មោះរត់ជាក្រុម ៥ នាក់៖ ១០០ ដុល្លារ

កញ្ចប់រង្វាន់ដែលទទួលបាន រួមមាន៖ អាវយឺតរត់ , ស្លាកលេខ, មេដាយ , វិញ្ញាបនបត្រអេឡិចត្រូនិច , ភេសជ្ជៈ និងអាហារសម្រន់ , រង្វាន់សម្រាប់ TOP3 និងការចាប់រង្វាន់ផ្សងសំណាងជាច្រើន។ កាន់ពិសេសទៀតនេះ ព្រឹត្តិការណ៍រត់ឡើងភ្នំលើកនេះ ក៏មានការចូលរួមពីសំណាក់បវរកញ្ញាកម្ពុជា កញ្ញា កុយ អេនណា ផងដែរ។ គួរឱ្យដឹងថា បវរកញ្ញារបស់មហាជនរូបនេះ ធ្លាប់បានបំពេញបេសកកម្ម ដោយការដើរថ្មើរជើង ទៅកាន់ខេត្តសៀមរាប យ៉ាងជោគជ័យ កាលឆ្នាំទៅមិញ ដោយបានរៃអង្គាសថវិកាយ៉ាងច្រើនជួយដល់កុមារ និងជនមានពិការភាពនៅកម្ពុជាផងដែរ៕

រូបភាព ៖ ក្រសួងទេសចរណ៍

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។