បើទោះជារឿង “ភ្លើងឆេះក្លឹបក្រោមដី” របស់ផលិតកម្ម LD បញ្ចប់ការចាក់បញ្ចាំងតាំងពីឆ្នាំមុនយ៉ាងណាក៏ដោយ តែរឿងខ្មែរមួយនេះ បន្តមានកេរ្តិ៍ឈ្មោះ និងត្រូវបានអ្នកទស្សនាកុនសរសើរមិនដាច់ពីមាត់ រហូតទទួលបានពានរង្វាន់ផ្សេងៗ។
“ភ្លើងឆេះក្លឹបក្រោមដី” មិនត្រឹមល្បីក្នុងស្រុកឡើយ ពេលនេះ “ភ្លើងឆេះក្លឹបក្រោមដី” ក៏បានជាប់ពានរង្វាន់នៅក្រៅប្រទេសផងដែរ។ ថ្មីៗនេះរឿងដែលផលិតកម្ម LD មួយនោះ ជាប់ជា shortlisted សម្រាប់ពានរង្វាន់ Golden Petrel នៅមហោស្រពភាពយន្តសិល្បៈអាស៊ី លើកទី២ ឆ្នាំ ២០២៦ ដែលនឹងធ្វើឡើងនៅទីក្រុងម៉ាកាវនៅខែឧសភា ខាងមុននេះ។
មហោស្រពភាពយន្តសិល្បៈអាស៊ីលើកទី២ ឆ្នាំ ២០២៦ គឺជាព្រឹត្តិការណ៍សិល្បៈភាពយន្តអន្តរជាតិមួយ ដែលនឹងធ្វើឡើងនៅទីក្រុងម៉ាកាវ ប្រទេសចិននៅខែ ៥ ឆ្នាំ ២០២៦។ មហោស្រពភាពយន្តនេះ គឺប្រមូលផ្តុំដោយភាពយន្តរបស់អាស៊ី ផ្តោតលើការផលិតភាពយន្តដោយឯករាជ្យ វប្បធម៌ មានតម្លៃសិល្បៈយូរអង្វែង និងភាពច្នៃប្រតិដ្ឋ។
គួរបញ្ជាក់ថា រឿង “ភ្លើងឆេះក្លឹបក្រោមដី” ផលិតចេញពីព្រឹត្តិការណ៍ពិតមួយ កាលពីចុងឆ្នាំ ២០២១ បន្ទាប់ពីមានហេតុការណ៍ភ្លើងឆេះក្លឹបក្រោមដីមួយកន្លែងនៅខេត្តសៀមរាប ហើយបានចាក់បញ្ចាំងតាមរោងកុននៅថ្ងៃ ២០ ខែមីនា ឆ្នាំ ២០២៥។ គ្រានោះ មានទស្សនិកជនច្រើនកក់សំបុត្រដើម្បីបានទស្សនា “ភ្លើងឆេះក្លឹបក្រោមដី”៕
រូបភាព៖ LD
