ផលិតករ Min Hee Jin បានឈ្នះក្តីសម្រាប់បណ្ដឹងដ៏ធំមួយប្រឆាំងនឹងក្រុមហ៊ុន HYBE។
នៅថ្ងៃទី ១២ ខែកុម្ភៈនេះ តុលាការកណ្តាលសេអ៊ូលបានសម្រេចក្តីឱ្យអតីតនាយកប្រតិបត្តិ ក្រុមហ៊ុន ADOR រូបនេះឈ្នះលើបណ្តឹងចំនួនពីរ ដែលត្រូវបានគេតាមដានយ៉ាងដិតដល់ ពាក់ព័ន្ធនឹងកិច្ចព្រមព្រៀងភាគហ៊ុន និងការអនុវត្តសិទ្ធិលក់ភាគហ៊ុនរបស់នាង។ តុលាការបានច្រានចោលការទាមទាររបស់ HYBE ដែលសុំការបញ្ជាក់ថា កិច្ចព្រមព្រៀងត្រូវបានបញ្ចប់ ហើយបានបញ្ជាឱ្យក្រុមហ៊ុនបង់ប្រាក់ឱ្យ Min ប្រហែល ២៥.៥ ពាន់លានវ៉ុន (ប្រហែល ១៧.៧ លានដុល្លារ) សម្រាប់ភាគហ៊ុនរបស់នាង។
តុលាការក៏បានសម្រេចឱ្យ HYBE បង់ប្រាក់ ១.៧ ពាន់លានវ៉ុន (ប្រហែល ១.២ លានដុល្លារ) ជូនដល់នាយកប្រតិបត្តិ Shin និង ១.៤ ពាន់លានវ៉ុន ជូនដល់នាយកប្រតិបត្តិម្នាក់ទៀតគឺ Kim ។ ថ្លៃចំណាយផ្លូវច្បាប់ទាំងអស់នឹងត្រូវទទួលបន្ទុកដោយក្រុមហ៊ុន HYBE ។
គួររម្លឹកថា Min Hee Jin បានជូនដំណឹងទៅ HYBE កាលពីខែវិច្ឆិកា ឆ្នាំ ២០២៤ អំពីចេតនារបស់នាងក្នុងការអនុវត្តសិទ្ធិលក់ភាគហ៊ុនខ្លួននៅ ADOR ។ ដោយផ្អែកលើរបាយការណ៍សវនកម្មរបស់ ADOR នៅពេលនោះ ទឹកប្រាក់ដែលនាងគួរទទួលបានត្រូវបានប៉ាន់ប្រមាណថាមានចំនួនប្រហែល ២៦ ពាន់លានវ៉ុន។ ទោះជាយ៉ាងណាក៏ដោយ HYBE បានអះអាងថា ពួកគេបានបញ្ចប់កិច្ចព្រមព្រៀងរួចហើយកាលពីខែកក្កដា ឆ្នាំ ២០២៤ ដោយអះអាងថាការបញ្ចប់នោះធ្វើឱ្យសិទ្ធិលក់ភាគហ៊ុនលែងមានសុពលភាព។
នៅក្នុងសាលក្រម តុលាការបានទទួលស្គាល់ថាផលិតករ Min ពិតជាបានស្វែងរកវិធីដើម្បីគ្រប់គ្រង ADOR ដោយឯករាជ្យ ហើយហាក់ដូចជាបានរំពឹងទុកនូវការបរាជ័យចំពោះការចរចាលើកិច្ចព្រមព្រៀងភាគហ៊ុន។ ទោះជាយ៉ាងណាក៏ដោយ តុលាការបានបញ្ជាក់ថា សកម្មភាពទាំងនេះតែមួយមុខមិនបង្កើតជាការរំលោភកិច្ចសន្យាយ៉ាងធ្ងន់ធ្ងរនោះទេ។
យោងតាមលក្ខខណ្ឌនៃកិច្ចព្រមព្រៀង ការបញ្ចប់កិច្ចសន្យាតម្រូវឱ្យមានការរំលោភបំពានយ៉ាងសំខាន់ និងច្បាស់លាស់។ តុលាការបានរកឃើញថា ការរំលោភបំពានបែបនេះមិនត្រូវបានបង្ហាញឱ្យឃើញច្បាស់លាស់គ្រប់គ្រាន់ឡើយ។
ចៅក្រមបានលើកឡើងផងដែរអំពីសារ KakaoTalk ដែលត្រូវបាន HYBE ដកហូតបានក្នុងអំឡុងពេលជម្លោះ ដោយបានបញ្ជាក់ថា ខ្លឹមសារនៃការសន្ទនាទាំងនោះ គឺដាច់ដោយឡែកពីគ្នា មិនអាចចាត់ទុកថាជាការរំលោភកិច្ចព្រមព្រៀងភាគហ៊ុនយ៉ាងធ្ងន់ធ្ងរនោះទេ។
Min Hee Jin និង HYBE បានជាប់ក្នុងជម្លោះផ្លូវច្បាប់យ៉ាងខ្លាំងក្លាអស់រយៈពេលជាច្រើនខែ។ Min បានអះអាងថាការបញ្ចប់កិច្ចសន្យាមិនមានមូលដ្ឋានច្បាស់លាស់ ហើយបានបដិសេធការអះអាងរបស់ HYBE។ ក្នុងអំឡុងពេលនីតិវិធី នាងបានបង្ហាញខ្លួនដោយផ្ទាល់នៅតុលាការចំនួនបីដងសម្រាប់ការសាកសួរជាសាក្សី និងបានបដិសេធការចោទប្រកាន់ទាក់ទងនឹងការគ្រប់គ្រង និងអ្វីដែលគេហៅថាការជ្រៀតជ្រែកពាក់ព័ន្ធនឹងក្រុម NewJeans ។
តាមរយៈសាលក្រមដែលបានប្រកាសនេះ អាចនិយាយបានថា Min Hee Jin បានទទួលជ័យជម្នះផ្លូវច្បាប់ដ៏គួរឱ្យកត់សម្គាល់នៅក្នុងជម្លោះកម្រិតខ្ពស់បំផុតមួយនៅក្នុងឧស្សាហកម្ម K-pop ៕
