N.John ហោះទៅកូរ៉េ ដើម្បីសម្ដែងក្នុងកម្មវិធីមួយ ដែលរៀបចំដោយ Error nyc

តារាចម្រៀងដែលមានឈាមជ័រខ្មែរ តែប្រកបអាជីពនៅអាមេរិក N.John មានប្រជាប្រិយភាពកាន់តែខ្លាំងឡើងពីមួយថ្ងៃទៅមួយថ្ងៃ ហើយបន្តិចទៀតនេះ កូនប្រុសទី ២ របស់កំពូលតារាចម្រៀង ព្រាប សុវត្ថិ នឹងត្រូវចូលរួមសម្ដែងនៅប្រទេសកូរ៉េខាងត្បូង។

បន្ទាប់ពីបទ «Pop Out» ល្បីល្បាញរហូតដល់ក្រុមតារា K-Pop ប្រុសស្រីល្បីៗយកទៅរាំ challenge កេរ្តិ៍ឈ្មោះរបស់ N.John បានហក់ឡើងមួយកម្រិតថែមទៀត។ តាំងពីពេលនោះមកមិនត្រឹមតែតារា K-Pop ឡើយក្លឹបរាំ ក៏ដូចជាអ្នកហាត់រៀនរាំ និងគ្រូបង្ហាត់រាំដទៃទៀត ក៏បានចាប់អារម្មណ៍ ក៏ដូចជា cover បទចម្រៀងដែលច្រៀងដោយកូនខ្មែររូបនេះ។

បទ «Pop Out» ល្បីគ្រប់ Platform ពិសេសអ្នកនិយមរាំបង្ហោះលើបណ្ដាញសង្គម។ អ្នកគាំទ្រគ្រាន់តែឮដំណឹងថា សុវត្ថិ មុនីនាគ ត្រៀមការសម្ដែងភ្លាម ម្នាក់ៗពិតជារំភើប។ សម្រាប់ Error គឺជាប្រេនសម្លៀកបំពាក់ក្នុងស្រុករបស់ប្រទេសកូរ៉េ ដែលមានច្រើនសាខា ហើយក្នុងនោះក៏មាននៅអាមេរិកដែរ។

សម្រាប់ព្រឹត្តិការណ៍ដែល N.John នឹងទៅសម្ដែងធ្វើឡើងថ្ងៃ ២៨ ខែឧសភា ឆ្នាំ ២០២៦ នៅ courte cafeនិងមាន artist របស់កូរ៉េផងដែរ ហើយនេះជាលើកដំបូង ដែល N.John នឹងសម្ដែងនាក្រៅប្រទេស បន្ទាប់ពីចេញទៅប្រកបអាជីពជាតារាចម្រៀងលើទឹកដីអាមេរិក។ ងាកទៅមើលបណ្ដាញសង្គមលោក ព្រាប សុវត្ថិ វិញ ក៏បង្ហាញសកម្មភាពធ្វើដំណើរទៅកាន់ទឹកដីកូរ៉េខាងត្បូងទាំងគ្រួសារដើម្បីគាំទ្រកូនប្រុសបណ្ដូលចិត្តដែរ ដោយមានម្ចាស់បទ «sweet Love» ទៅជាមួយផងដែរ។

Error nycគឺជាម៉ាកសម្លៀកបំពាក់បុរស ដែលបង្កើតឡើងដោយអ្នករចនា PUL Sheen ដែលត្រូវបានគេស្គាល់ដោយសាររូបរាងដ៏ពិសេស។ ម៉ាកនេះដំណើរការជាចម្បងតាមអ៊ីនធឺណិត ហើយត្រូវបានទទួលស្គាល់សម្រាប់ទំនិញដូចជា សម្លៀកបំពាក់ខាងក្រៅធ្វើពីស្បែកផ្ទាល់ខ្លួន ខោខូវប៊យដែលមានស្នាមប្រេះ និងមួកល្បីៗ៕

រូបភាព៖ N.John និង Preap Sovath

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត