ហ៊ូអ៊ីន ហ្វាង់ បេក្ខភាពលេចធ្លោ The Voice Cambodia រដូវកាលទី ៣ ក្លាយជាសិល្បករ K've Entertainment

ផលិតកម្ម K’ve Entertainment បានប្រកាសនៅថ្ងៃនេះ ពីការទទួលបានសមាជិកថ្មីចូលក្រុមហ៊ុន នោះគឺ ហ៊ូអ៊ីន ហ្វាង់ ដែលជាជនជាតិកូរ៉េខាងត្បូង និងជាបេក្ខភាពលេចធ្លោរបស់ The Voice Cambodia រដូវកាលទី ៣ ហើយកំពុងរស់នៅស្រុកខ្មែរ។

CEO Na Yoon Jung របស់ K’ve Entertainment បានបង្ហាញស្នាមញញឹមស្វាគមន៍ កញ្ញា ហ៊ូអ៊ីន ហ្វាង់ ក្នុងការចូលរួមជាសិល្បករពេញសិទ្ធិរបស់ផលិតកម្មដែលមានជនជាតិកូរ៉េរូបនេះជាអគ្គនាយិកា ហើយកូនក្រុមតារាចម្រៀង ពេជ្រ សោភា រូបនេះ ក៏ជាជនជាតិកូរ៉េដូចគ្នាផងដែរនោះ។

ហ៊ូអ៊ីន ហ្វាង់ មិនត្រឹមប្រកបអាជីពជាតារាចម្រៀងនៅក្នុងប្រទេសកម្ពុជានោះទេ កញ្ញាក៏មានហាងកាហ្វេ និងនំខេក ដ៏ទំនើបតូចមួយនៅក្នុងរាជធានីភ្នំពេញផងដែរ។ កេរ្តិ៍ឈ្មោះ ហ៊ូអ៊ីន ទទួលបានភាពល្បាញល្បី មិនត្រឹមការបកស្រាយចម្រៀងអំឡុងប្រកួត The Voice Cambodia រដូវកាលទី ៣ តែរូបសម្រស់ស្រស់ស្អាត និងការចេះនិយាយភាសាខ្មែរខ្លះ គួរឲ្យស្រលាញ់ ក៏កាន់តែជួយឲ្យមហាជនពេញចិត្ត។

បើទោះជា ហ៊ូអ៊ីន ហ្វាង់ មិនទទួលបានជ័យជម្នះ តែនាងក៏ទទួលបានការស្រលាញ់ចូលចិត្តច្រើន ហើយក៏មានការប្រម៉ូតផលិតផល និងចេញច្រៀងតាមកម្មវិធីផ្សេងៗមិនដាច់។ ហេតុនេះក៏ជាពេលធ្វើឲ្យ K’ve Entertainment មើលឃើញពីសក្តានុពលរបស់ ហ៊ូអ៊ីន ហ្វាង់ និងឈានដល់ការចុះហេត្ថលេខា ជាសិល្បករពេញលេញនៃ K’ve Entertainment តែម្ដង។

ផលិតកម្ម K’ve ក៏ជាផ្នែកមួយជួយជំរុញសិល្បករខ្មែរ ឈានទៅរការផ្លាស់ប្ដូរបទពិសោធន៍នានាជាមួយឧស្សាហកម្ម K-Pop ផងដែរ។ មួយវិញទៀត K’ve Entertainment ក៏មានសិល្បករខ្មែរជាច្រើន បានរួមសហការគ្នាចេញចម្រៀងជាច្រើន ដែលរសនិយមបែប K-Popនេះផងដែរ៕

រូបភាព៖ Hooin Whang និង K’ve entertainment

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត