គ្រូ ១ថ្ងៃ គ្រូ ១ ជីវិត! OG ហ្គូលឌិន ធ្វើចម្រៀងជូនពរខួបកំណើត Ruth Ko បង្កប់ក្ដីនឹករឭក

ម្ចាស់ពាន Rapper Fighter រដូវកាលទី១ OGGolden – អូជីហ្គូលឌិន ធ្វើបទចម្រៀងជូនពរ COACH Ruth Ko ក្នុងថ្ងៃកំណើត អមដោយការនឹករលឹកជាពន់ពេក ដ្បិតមិនអាចជួប មិនអាចសូម្បីជជែកជាមួយមនុស្សដែលខ្លួនហៅថា គ្រូ ។

ការចាកចេញទាំងមិនបានលាគ្នារបស់ Ruth Ko បានបន្សល់ទុកការចងចាំ និងការនឹករឭកជាពន់ពេកដល់ក្រុមគ្រួសារ មិត្តភ័ក្ដិ បណ្ដា Rapper ក្នុងស្រុក និងអ្នកគាំទ្ររបស់លោក។ ថ្ងៃនេះដែរ ជាថ្ងៃកំណើតម្ចាស់បទ «បងមកពីលិច» រូបនេះ ជាមួយគ្នា OG ហ្គូលឌិន ម្ចាស់ពាន Rapper Fighter រដូវកាលទី១ និងជាកូនក្រុមរបស់ Ruth Ko បានតាក់តែងចម្រៀងជូនពរខួបកំណើតមនុស្សដែលខ្លួនហៅថា គ្រូ អមដោយក្ដីនឹករឭក និងការដង្ហោយហៅ ជាមួយក្ដីសង្ឃឹមថា អាចបានជួបមុខគ្នាម្ដងទៀត ទោះក្នុងសុបិន។

ក្នុងនាមជាកូនក្រុម និងជាសិស្ស ដែលធ្លាប់ទទួលបានការបង្វឹកដោយផ្ទាល់ផងនោះ OG ហ្គូលឌិន បានសរសេរភ្ជាប់ពាក្យពេចន៍បង្ហាញការនឹករឭកដល់តារារ៉េប Ruth Ko យ៉ាងដូច្នេះថា៖ « HAPPY BIRTHDAY MY កវីគោព្រៃ រីករាយថ្ងៃកំណើតរបស់លោកគ្រូនេះជាចម្រៀងដែលខ្ញុំចង់និយាយទៅកាន់បង ប៉ុន្តែបងអត់នៅទីនេះជាមួយប្អូន ថ្ងៃមួយខ្ញុំនឹងធ្វើអោយឈ្មោះសិស្សរបស់ កវីគោព្រៃ អស្ចារ្យគ្មានអ្វីអាចកាត់ថ្លៃបាន។ ចុងក្រោយខ្ញុំចង់អគុណបងសម្រាប់ការបង្រៀនអោយក្មេងម្នាក់នេះ អោយបានឃើញពីអ្វីដែលក្មេងម្នាក់នេះចង់បាន អគុណបងខ្លាំងណាស់ ចម្រៀងមួយបទនេះខ្ញុំធ្វើជូនបងទាំងទឹកភ្នែក ខ្ញុំពិតជាចង់ជួបបងណាស់ បើជាតិក្រោយមានសំណាងខ្ញុំសូមធ្វើជា សិស្សរបស់បងម្ដងទៀត I LOVE YOU BONG RUTHKO»។

គួរឱ្យដឹងថា តារាចម្រៀងរ៉េប Ruth Ko បានជួបគ្រោះថ្នាក់ចរាចរណ៍កាលពីយប់ថ្ងៃទី ៥ ខែមករា ឆ្នាំ ២០២៥ ដែលបណ្ដាលឱ្យបាត់បង់ជីវិតភ្លាមៗ នៅកន្លែងកើតហេតុ លើផ្លូវ ៦០ ម៉ែត្រ៕

ចុចទីនេះដើម្បីទស្សនាបទចម្រៀង៖ facebook.com/reel/1481817526728287/?s=single_unit

រូបភាព៖ OG ហ្គូលឌិន & Rapper fighter

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។