ពេជ្រ ពិសី ទទួលបានបណ្ណាការមាស ៥ គីឡូក្រាម ស្មើនឹងទឹកប្រាក់ជាង ៨០ ម៉ឺនដុល្លារ

មង្គលការអ្នកជំនួញស្រីវ័យក្មេងល្បាញល្បី ពេជ្រ ពិសី កក្រើកអស់បុគ្គលមានមុខមាត់លើវិថីអនឡាញ មានអ្នកបង្កើតមាតិកា, អ្នកសិល្បៈ និងអ្នកជំនួញតូចធំជាច្រើនរូបផ្សេងទៀត។ ម្ចាស់ផលិតផល ផ្កា មិនត្រឹមរៀបចំកម្មវិធីបានយ៉ាងប្រណីតឡើយ ប្រវត្តិស្នេហា និងការតស៊ូ រឹតតែធ្វើឲ្យកម្មវិធីទទួលបានការចាប់អារម្មណ៍ខ្លាំងមួយកម្រិតទៀត។

កាន់តែពិសេសផ្អើលអស់អ៊ីនធឺណិត កាលពីម្សិលមិញថ្ងៃ ២២ ខែ កុម្ភៈ ឆ្នាំ ២០២៦ គឺបណ្ណាការ របស់ ពេជ្រ ពិសី ដែលទទួលបានពីកូនកំលោះ ហេង ឡុងឆាយ មាស ៥ គីឡូក្រាមឯណោះ ដែលសរុបជាទឹកប្រាក់ប្រមាណ ៨០ ម៉ឺនដុល្លារឯណោះ។ នេះបើគិតតាមហាងឆេងមាសនៅពេលបច្ចុប្បន្នជាង ៦០០ ដុល្លារ ក្នុង១ជី។ សម្រាប់មាស ១ គីឡូក្រាម បើគិតតាមខ្នាតខ្មែរស្មើនឹង ២៦.៦៦ តម្លឹង។

មិនត្រឹមជាមង្គលការដែលរៀបចំតុបតែងយ៉ាងប្រណីតប្រៀបដូចក្នុងរឿងព្រេងនិទានឡើយ តែកម្មវិធី ២ យប់ ៣ ថ្ងៃ រវាង ហេង ឡុងឆាយ និង ពេជ្រ ពិសី គឺជាសក្ខីកម្មនៃការស្រលាញ់ស្មោះស្ម័គ្រ តស៊ូ ជឿជាក់គ្នា ទុកចិត្តគ្នានៃមនុស្ស ២ នាក់ ដែលមានចិត្តចង់កសាងគ្រួសារមួយ ជាមួយគ្នា។

ទម្រាំអាចដឹកដៃគ្នាចូលរោងជ័យនេះបាន ពេជ្រ ពីសី និងស្វាមី ស្រលាញ់គ្នា និងខិតខំបង្កើតគ្រប់យ៉ាងរួមគ្នាមក ៩ ឆ្នាំហើយមិនថាមុខរបរ ឡាន ផ្ទះវីឡា សម្ភារមានតម្លៃព្រមទាំងគ្រប់យ៉ាងក្នុងជីវិត សុទ្ធតែជាបានមកពីការប្រឹងប្រែង ចេះរកទុកដាក់ សន្សំទាំងអស់គ្នា។

មហាជនបានស្ញប់ស្ញែង និងសរសើរពីស្នេហានៃម្ចាស់ផលិតផល «ផ្កា» គឺ ពេជ្រ ពិសី និងស្វាមី ដ្បិតថានៅក្មេងខ្ចី តែអ្នកទាំង ២ បានបង្ហាញឲ្យឃើញថា ការស្រលាញ់គ្នា និងតស៊ូ ដើម្បីអនាគត ពិតជាសំខាន់៕

រូបភាព៖ One Memory

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត

ក្រសួងស្ថាប័ន
រដ្ឋបាលថ្នាក់ក្រោមជាតិ
វិស័យឯកជន