ក្រុមអ្នកគាំទ្រ Engene ជាង ១.៥ លាននាក់ ទាមទារឱ្យ BELIFT LAB បកស្រាយឱ្យច្បាស់លាស់អំពីការលាលែងតំណែងជាសមាជិកក្រុម ENHYPEN របស់ Heeseung ទោះបីជាមានលិខិតសរសេរដោយដៃពីតារាចម្រៀងរូបនេះទៅហើយក្ដី។

ការប្រកាសថា Heeseung សមាជិកក្រុមតារាប្រុសខេប៉ុប ENHYPEN នឹងចាកចេញពីក្រុមដើម្បីបន្តអាជីពជាតារាចម្រៀងទោល បានបង្កឱ្យមានការភ្ញាក់ផ្អើលយ៉ាងខ្លាំង។ អ្នកគាំទ្របានបង្ហាញពីការសោកស្ដាយ និងស្រពេចស្រពិល ខណៈពេលដែលមានការប៉ាន់ស្មានផ្សេងៗអំពីអត្ថន័យនៃសេចក្ដីសម្រេចចិត្តនេះ។

ក្រុមហ៊ុន Belift Lab ដែលជាក្រុមហ៊ុនបុត្រសម្ព័ន្ធរបស់ HYBE Labels និងជាអ្នកគ្រប់គ្រងក្រុម ENHYPEN បានប្រកាសកាលពីថ្ងៃ១០ ខែមីនា ថា តារាចម្រៀងរូបនេះនឹងចាកចេញពីក្រុម ប៉ុន្តែនឹងនៅបន្តស្ថិតក្រោមការគ្រប់គ្រងរបស់ក្រុមហ៊ុនដដែលក្នុងនាមជាសិល្បករទោល។

ចាប់តាំងពីការបង្ហាញខ្លួនដំបូងក្នុងខែវិច្ឆិកា ឆ្នាំ ២០២០ តាមរយៈកម្មវិធី “I-LAND” ក្រុម ENHYPEN បានកសាងប្រជាប្រិយភាពយ៉ាងខ្លាំងទូទាំងពិភពលោក ខណៈក្រុមអ្នកគាំទ្រ ENGENE បានទទួលស្គាល់ថា Heeseung គឺជាអ្នកចម្រៀងគោល ដែលជាផ្នែកមួយដ៏សំខាន់ប្រចាំក្រុម។

នៅក្នុងលិខិតសរសេរដោយដៃដែលបានចែករំលែកជាមួយអ្នកគាំទ្រក្នុងថ្ងៃតែមួយ តារាចម្រៀងរូបនេះបានរៀបរាប់ថា សេចក្ដីសម្រេចចិត្តនេះគឺជាលទ្ធផលនៃ “ការពិភាក្សាយ៉ាងស៊ីជម្រៅ” ជាមួយទីភ្នាក់ងារ។

តារាប្រុសវ័យ ២៤ឆ្នាំបានសរសេរថា៖ “រយៈពេល ៦ ឆ្នាំដែលខ្ញុំបានចំណាយកន្លងមក គឺពោរពេញទៅដោយគ្រាដ៏មានតម្លៃដែលមិនអាចរៀបរាប់បាន។ បន្ទាប់ពីបានចែករំលែកលទ្ធផលនៃស្នាដៃផ្ទាល់ខ្លួនរបស់ខ្ញុំជាមួយក្រុមហ៊ុន និងពិភាក្សាអំពីវិធីល្អបំផុតដើម្បីបង្ហាញទៅសាធារណជន ខ្ញុំបានធ្វើការសម្រេចចិត្តដ៏ធំមួយក្នុងការដើរតាមទិសដៅដែលក្រុមហ៊ុនបានស្នើ ដើម្បីឱ្យខ្ញុំអាចចូលទៅរក ENGENE ជាមួយនឹងរូបភាពរបស់ខ្លួនឯងដែលកាន់តែប្រសើរជាងមុន”។

ព័ត៌មាននេះបានក្លាយជាការភ្ញាក់ផ្អើលសម្រាប់អ្នកគាំទ្រជាច្រើន ហើយបានរីករាលដាលយ៉ាងលឿននៅលើបណ្តាញសង្គម។ ការពិភាក្សាបានផ្ទុះឡើងនៅលើបណ្ដញសង្គម ដូចជា X ​និង Weverse ដោយអ្នកគាំទ្រមួយចំនួនក៏បានរៀបចំយុទ្ធនាការតាមអ៊ីនធឺណិត ដើម្បីទាមទារឱ្យមានការបកស្រាយច្បាស់លាស់បន្ថែមទៀតអំពីសេចក្ដីសម្រេចនេះ។

យោងតាមសារព័ត៌មាន The Korea Times គិតត្រឹមម៉ោង ថ្ងៃទី ១៣ ខែមីនា មនុស្សប្រហែល ១.៥ លាននាក់ បានចុះហត្ថលេខាលើញត្តិក្នុងគេហទំព័រ Change.org ដើម្បីជំរុញឱ្យ BELIFT LAB និង HYBE ពិចារណាឡើងវិញនូវការសម្រេចចិត្តនេះ។

ញត្តិខាងលើបានរៀបរាប់ពីគោលបំណងថា៖ “យើងដែលជាអ្នកគាំទ្រ ENHYPEN មានការព្រួយបារម្ភយ៉ាងខ្លាំងចំពោះការប្រកាសថា Heeseung នឹងចាកចេញពីក្រុមដើម្បីចេញអាល់ប៊ុមទោល។ ខណៈពេលដែលយើងគាំទ្រយ៉ាងពេញទំហឹងចំពោះការរីកចម្រើនផ្នែកសិល្បៈរបស់ Heeseung យើងជឿជាក់យ៉ាងមុតមាំថា អាជីពទោលមិនគួរតម្រូវឱ្យចាកចេញពីក្រុម ENHYPEN នោះទេ”។

វិធីសាស្រ្ត និងពេលវេលាអំពីការចាកចេញនេះក៏ជាផ្នែកមួយនៃការិះគន់ផងដែរ ដោយសារសេចក្ដីប្រកាសនេះបានកើតឡើងបន្ទាប់ពី ENHYPEN បានចេញអាល់ប៊ុមខ្នាតតូចទី ៧ “The Sin: Vanish” កាលពីខែមករា និងកំពុងតែទទួលបានការគាំទ្រខ្លាំង តែជាមានការបាត់បង់សមាជិកភ្លាមៗដោយមិនអាចស្មានទុកបាន។

កង្វះការពន្យល់លម្អិតនេះ ក៏បានធ្វើឱ្យអ្នកគាំទ្រមួយចំនួនបានដាក់ការសង្ស័យថា Heeseung អាចនឹងត្រូវបានគេដាក់សម្ពាធឱ្យចាកចេញ ទោះបីជាមិនទាន់មានភស្តុតាងណាមួយដែលអាចយកមកគាំទ្រការអះអាងនេះក៏ដោយ។

ទន្ទឹមគ្នានេះ ទោះបីជាក្រុមហ៊ុន និងសិល្បករមិនបានភ្ជាប់ការចាកចេញនេះទៅនឹងបញ្ហាសុខភាពក្ដី តែការព្រួយបារម្ភអំពីសុខុមាលភាពរបស់តារាចម្រៀងរូបនេះបានក្លាយជាប្រធានបទក្ដៅមួយក្នុងចំណោមអ្នកគាំទ្រ។

ជាក់ស្ដែង នៅក្នុងវីដេអូ Fan cheer guide សម្រាប់បទ Big Girls Don’t Cry បានបង្ហាញថា Heeseung ហាក់ដូចជាងងុយគេងមួយភាំងក្នុងពេលថតវីដេអូ ដែលធ្វើឱ្យមានការពិភាក្សាឡើងវិញអំពីសម្ពាធផ្លូវកាយ និងផ្លូវចិត្តដែលលោកអាចនឹងជួបប្រទះនៅពីក្រោយឆាក។

ពេលវេលាបន្ទាប់ពីនេះ គឺជាពេលដែល ENHYPEN ត្រូវសម្របខ្លួននឹងក្រុមដែលនៅសល់សមាជិកត្រឹម ៦នាក់ ក៏ដូចជាពេលវេលាដែលបញ្ជាក់ថា តើពួកគេនឹងនៅតែអាចរក្សាប្រជាប្រិយភាពដូចដើម ឬយ៉ាងណា។ ចំពោះ Heeseung វិញ គឺជាពេលវេលាដែលោកត្រូវដកពិសោធន៍ខ្លួនឯងក្នុងនាមជាសិល្បករទោល៕