កម្ពុជា ទទួលបានសមុច្ច័យ ២០ រូបពីអ្នកកាន់កាប់ឯកជននៅតំបន់អាស៊ី

មុននេះក្រសួងវប្បធម៌និងវិចិត្រសិល្បៈ បានបង្ហោះជូនដំណឹងលើផេកផ្លូវការ ពីការវិលត្រឡប់នៃវត្ថុបុរាណខ្មែរចំនួន ២០ រូបមកកាន់មាតុភូមិកំណើត ពោលគឺប្រទេសកម្ពុជា ក្រោយឃ្លាតចាកអស់រយៈពេលជាច្រើនឆ្នាំមកនេះ។

សមុច្ច័យដែលបានប្រគល់មកវិញមានលក្ខណៈចម្រុះ សាងពីថ្មភក់ និងសំរឹទ្ធ រូបបដិមាសម័យបាយ័ន ដែលត្រូវបានជឿយ៉ាងមុតមាំថាមានប្រភពដើមមកពីក្រុងអង្គរធំ។ វត្ថុបុរាណទាំង ២០ រូប ត្រូវបានទាមទារពីអ្នកកាន់កាប់សមុច្ច័យឯកជនមួយនៅតំបន់អាស៊ី ហើយដំណើរការទាមទារនេះ អាចសម្រេចទៅបាន ដោយមានការចូលរួមជ្រោមជ្រែងពីអ្នកជំនាញនៃក្រុមការងារស្រាវជ្រាវក្រៅប្រទេសផងដែរ។

ជាមួយគ្នា ក្រសួងក៏បានអំពាវនាវនិងលើកទឹកចិត្តដល់សារមន្ទីរ និងអ្នកប្រមូលសមុច្ច័យឯកជននានាដែលកំពុងកាន់កាប់វត្ថុបុរាណខ្មែរ សូមទាក់ទងមកក្រសួង និងចូលរួមពិភាក្សាប្រកបដោយវិជ្ជាជីវៈ ក្នុងការប្រគល់វត្ថុបុរាណខ្មែរមកកាន់កម្ពុជាវិញ៕

រូបភាព ៖ ក្រសួងវប្បធម៌

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។