Rise Women Music Festival ប្រមូលផ្ដុំទៅតារាចម្រៀងស្រីល្បីៗប្រចាំស្រុកខ្មែរ ជួបជុំគ្នាអបអរទិវាសិទ្ធិនារី

ឆាប់ៗនេះការប្រគំតន្ត្រីដ៏អស្ចារ្យមួយនឹងកើតមានឡើង ដែលប្រមូលផ្ដុំទៅដោយតារាចម្រៀងស្រីល្បីៗនៅក្នុងប្រទេសកម្ពុជា នៅលើឆាក Rise Women Music Festival ថ្ងៃ ៧មីនា ឆ្នាំ ២០២៦ ខាងមុខ ដើម្បីអបអរទិវាសិទ្ធិនារីអន្តរជាតិ។

ឆាកតន្រ្តីដ៏ធំ នឹងលេចឡើងនៅសាលមហោស្រពកោះពេជ្រ ដែលមានតារាស្រីជួរមុខ និងតារាស្រីកំពុងទទួលបានការស្រលាញ់ចូលចិត្តពីសំណាក់មហាជននាពេលបច្ចុប្បន្ន ដូចជា ឱក សុគន្ធកញ្ញា, ព្រះនាង នរោត្តម ជេនណា, ទេព បូព្រឹក្ស, ហ៊ូអ៊ីន ហ្វាង់, កេសរ, ចិត្ត កញ្ចនា, មីណា , Vis ព្រមទាំងអ្នកវាយស្គរស្ត្រីនៃ MeDha ថែមទៀតផង។

សម្រាប់ការចូលរួមទស្សនា អ្នកគាំទ្រអាចជាវសំបុត្រទៅតាមតម្លៃនៃកន្លែងអង្គុយ ៤ តំបន់ផ្សេងគ្នាតាមរយៈ BookMe+។ Rise Women Music Festival មិនត្រឹមជាការលើកកម្ពស់សក្ដានុពលស្ត្រី ជាមួយក្ដីស្រលាញ់នៃតន្ត្រីប៉ុណ្ណោះទេ ថវិកាដែលបានមកពីការលក់សំបុត្រ នឹងចំណាយចំណែកមួយក្នុងការទិញម៉ូតូ ដើម្បីឧបត្ថម្ភជូនដល់ទាហានជួរមុខ។

តារាចម្រៀងស្រី ចិត្ត កញ្ចនា ដែលជាអ្នករៀបចំកម្មវិធីនេះឡើង បានឲ្យដឹងថា Rise Women Music Festival នឹងត្រូវចំណាយថវិកា ៦ ម៉ឺនដុល្លារ។ បើទោះជាបែបនេះ ក្ដីក៏ម្ចាស់បទ «ដង្ហើមស្នេហ៍» នៅតែប្រឹងពុះពារ រៀបចំកម្មវិធី Rise Women Music Festival នេះឡើងដើម្បីបង្ហាញពីសមត្ថភាពរបស់តារាចម្រៀងម្នាក់ៗ តាមរយៈតន្ត្រីរៀងខ្លួន។

តារាចម្រៀងទាំងអស់នឹងរៀបចំការសម្ដែងយ៉ាងពិសេសៗ ដើម្បីឲ្យអ្នកគាំទ្រដែលបានចូលរួមទស្សនា សប្បាយរីករាយ និងអាចឲ្យខ្លួនឯងបញ្ចេញពីភាពអស្ចារ្យរបស់ខ្លួន ចេញមក ដោយគ្មានការលាក់បាំង៕

រូបភាព៖ Risekh Music Festival

អ្នកនាង ទ្រី រ៉ាវី | Ms. Try Ravy

ប្រឡូកក្នុងវិស័យសារព័ត៌មានជាច្រើន រ៉ាវី មានបទពិសោធន៍ជាអ្នករាយការណ៍ អ្នកផលិតមាតិកា និងការីនិពន្ធនៅស្ថាប័នក្នុងស្រុកជាច្រើន ជាពិសេសផ្នែកអត្ថបទសុខភាព និងជីវិតកម្សាន្ត