តារាសម្ដែងតៃវ៉ាន់ Ruby Lin បានទម្លាយឱ្យដឹងថា នាងបានស្ម័គ្រចិត្តផ្ដាច់ជាតិស្រវឹងអស់រយៈពេលជិត ៣ ឆ្នាំមកហើយ ដើម្បីអាចផ្ដល់ការគាំទ្រដល់កូនស្រីបានកាន់តែល្អប្រសើរ ក្នុងអំឡុងពេលដែលកូនកំពុងស្ថិតក្នុងវ័យកុមារភាព និងការលូតលាស់ផ្នែកអារម្មណ៍។

យោងតាមសម្តីរបស់តារាស្រីវ័យ ៥០ ឆ្នាំរូបនេះ ការក្លាយជាម្ដាយបានផ្លាស់ប្ដូរអាទិភាពប្រចាំថ្ងៃ និងទម្លាប់រស់នៅរបស់នាងទាំងស្រុង។ កាលពីមុន Ruby Lin ជារឿយៗតែងតែសម្រាកលម្ហែកាយជាមួយជាតិស្រវឹងមួយកែវ បន្ទាប់ពីកូនស្រីចូលគេង ដើម្បីរីករាយនឹងពេលវេលាផ្ទាល់ខ្លួនដ៏ស្ងប់ស្ងាត់នៅពេលយប់។ ទោះជាយ៉ាងណាក៏ដោយ ក្រោយមកនាងបានសម្រេចចិត្តឈប់ផឹកស្រាទាំងស្រុង ដើម្បីអាចផ្ដោតអារម្មណ៍បានពេញលេញលើការចិញ្ចឹមកូន និងការថែរក្សាសុខភាពរបស់នាង។

បច្ចុប្បន្ន តារាសម្ដែងរូបនេះចំណាយពេលពេលល្ងាចនៅក្បែរកូនស្រី ស្តាប់រឿងរ៉ាវផ្សេងៗអំពីសាលារៀន និងជីវិតប្រចាំថ្ងៃ។ នាងបានចែករំលែកថា ពេលខ្លះនាងថែមទាំងគេងលក់មុនកូន​ទៀតផង។

Ruby Lin ក៏បានបង្ហើបផងដែរថា នាងតែងតែភ្ញាក់ពីគេងនៅម៉ោង ៧ ព្រឹកជារៀងរាល់ថ្ងៃ ដើម្បីជូនកូនស្រីទៅសាលារៀន មុននឹងទទួលទានអាហារពេលព្រឹក និងកាហ្វេជាក្រោយ។

តារាស្រីរូបនេះបានរក្សារបបថែរក្សាសុខភាពយ៉ាងតឹងរ៉ឹងបំផុតក្នុងរយៈពេលប៉ុន្មានឆ្នាំចុងក្រោយ ដោយមានសេចក្តីរាយការណ៍ថា នាងហាត់ប្រាណ ៥ ថ្ងៃក្នុងមួយសប្តាហ៍ តាមរយៈការហាត់លើកទម្ងន់ ប្រដាល់ និង Yoga ព្រមទាំងគ្រប់គ្រងរបបអាហារយ៉ាងហ្មត់ចត់។ Ruby Lin អនុវត្តតាមតុល្យភាពអាហារ រួមមាន ប្រូតេអ៊ីន ១ ភាគ បន្លែ ២ ភាគ និងកាបូអ៊ីដ្រាត ៣ ភាគ។ នាងក៏បានទម្លាយដែរថា នាងបានតមជាតិស្ករអស់រយៈពេលជិត ២០ ឆ្នាំមកហើយ និងមិនទទួលទានអាហារក្រោយម៉ោង ៦ ល្ងាចឡើយ។

យោងតាមសម្តី Ruby Lin ភាពជាម្ដាយបានធ្វើឱ្យនាងយល់ដឹងកាន់តែច្បាស់អំពីសុខភាពរាងកាយ និងអាយុយឺនយូរ។

នាងបានពន្យល់ថា៖ «ខ្ញុំបានបង្វែរសម្ពាធនៃការក្លាយជាម្ដាយនៅវ័យជ្រេ ឱ្យទៅជាកម្លាំងចិត្តសម្រាប់វិន័យលើខ្លួនឯង» ដោយបន្ថែមថា បំណងប្រាថ្នាដ៏ធំបំផុតរបស់នាង គឺការចំណាយពេលឱ្យបានច្រើនបំផុតតាមដែលអាចធ្វើទៅបានជាមួយកូនស្រី។

តារាសម្ដែងរឿង “ព្រះនាងយេយេ” ក៏បានចែករំលែករឿងរ៉ាវដ៏ផ្អែមល្ហែមអំពីការស្រឡាញ់ និងការចេះដឹងរបស់កូនស្រីនាងផងដែរ។ នាងបានពិពណ៌នាថា កូនរបស់នាងគឺជាក្មេងដែលចេះគិត ចេះយល់ពីអារម្មណ៍អ្នកដទៃ និងថែមទាំង «មានភាពរ៉ូមែនទិកជាងឪពុករបស់នាងទៅទៀត»។ មានពេលមួយដែលបានធ្វើឱ្យ Ruby Lin រំភើបចិត្តយ៉ាងខ្លាំង គឺនៅពេលដែលកូនស្រីរបស់នាងបានហុចកន្សែងជូតមាត់ឱ្យនាងស្ងាត់ៗ បន្ទាប់ពីឃើញនាងកំពុងប្រើថ្នាំបន្តក់ភ្នែក។

ក្មេងស្រីរូបនេះក៏បានលួចរៀបចំកាតទិវាអ្នកម្ដាយ (Mother’s Day) ដែលធ្វើដោយដៃ និងបានបង្ហើបអំពីកាដូដ៏ពិសេសមួយ ដែល Ruby Lin និយាយថាបានធ្វើឱ្យនាងមានសេចក្តីសុខជាខ្លាំង។

ទន្ទឹមនឹងនេះ Ruby Lin បានបញ្ជាក់ថា នាងមានគម្រោងចាប់ផ្ដើមថតរឿងភាគទូរទស្សន៍ថ្មីមួយក្នុងអំឡុងឆមាសទីពីរនៃឆ្នាំ២០២៦នេះ។ គម្រោងនេះត្រូវបានគេរាយការណ៍ថា នឹងមានវត្តមាននាងទាំងជាអ្នកដឹកនាំរឿង និងជាតួឯកស្រី។

សូមរម្លឹកថា Ruby Lin ទទួលបានភាពល្បីល្បាញតាមរយៈរឿងភាគល្បីៗជាច្រើនតួយ៉ាងដូចជារឿង «ព្រះនាងយេយេ» (My Fair Princess) រឿង «សាមកុក» និងរឿង «ជម្រៅស្នេហ៍ក្រោមភ្លៀងរលឹម» (Romance in the Rain)។ ក្នុងរយៈពេលប៉ុន្មានឆ្នាំចុងក្រោយនេះ នាងបានផ្ដោតសំខាន់លើការដឹកនាំរឿង និងការផលិតភាពយន្តនៅក្នុងតំបន់តៃវ៉ាន់។

Ruby Lin បានរៀបការជាមួយតារាសម្ដែង Wallace Huo ក្នុងឆ្នាំ ២០១៦ ហើយពួកគេបានស្វាគមន៍កូនស្រីម្នាក់ក្នុងខែមករា ឆ្នាំ ២០១៧ ៕