ទេព បូព្រឹក្ស ថានេះជាការរួមចំណែកចុងក្រោយរបស់ខ្លួន ក្នុងការនាំយកសិល្បៈវប្បធម៌ខ្មែរលើឆាកអន្តរជាតិ

ទេព បូព្រឹក្ស ទុកការរិះគន់បែបងងឹតងងុលរបស់ជនឆ្លៀតឱកាសមួយឡែក បន្តនាំយកវប្បធម៌ខ្មែរទៅបង្ហាញលើឆាកតន្ត្រីដ៏ធំក្នុងប្រទេសហ្វីលីពីន ដើម្បីឱ្យអន្តរជាតិបានឃើញនិងយល់ជ្រាបកាន់តែច្បាស់ពីវប្បធម៌ដ៏ស្រស់ស្អាត និងអស្ចារ្យរបស់ខ្មែរ។

នាថ្ងៃទី ១៩ ខែ មេសា ឆ្នាំ ២០២៦ ខាងមុខនេះ អ្នកនាង ទេព បូព្រឹក្ស នឹងនាំយកសិល្បៈវប្បធម៌ខ្មែរទៅបង្ហាញលើឆាកអន្តរជាតិ នៅមុខទស្សនិកជនដែលមានចំនួនដល់ទៅជាង ២ ម៉ឺននាក់សម្រាប់ការសម្ដែងនៅទីក្រុង ម៉ានីឡា ប្រទេសហ្វីលីពីន ក្នុងកម្មវិធី ROUND FESTIVAL។

នេះជាបេសកកម្មនៃការនាំយកអត្តសញ្ញាណខ្មែរឡើងឆាកអន្តរជាតិ ហើយលើកនេះក៏មិនខុសពីលើកមុន ព្រោះជាការដាក់ឈ្មោះប្រទេស លើវេទិកាអន្តរជាតិ ជាឱកាសបើកបង្ហាញភាពល្បីរន្ទឺរបស់ខ្មែរឱ្យពិភពលោកបានស្គាល់។ ការពាំនាំយកនូវសិល្បៈវប្បធម៌ខ្មែរដាក់បញ្ចូលក្នុងចម្រៀង ហើយសម្ដែងលើវេទិកាអន្តរជាតិដែលមានអ្នកទស្សនារាប់ម៉ឺននាក់ គិតទៅថាអស្ចារ្យកម្រិតណា។

រាល់ការរៀបចំឈុតឆាកសម្ដែងរបស់តារាស្រីរូបនេះ មិនថាក្នុងស្រុក ឬក្រៅស្រុក តែងបានធ្វើឱ្យមនុស្សមិនតិចនាក់លាន់មាត់កោតសរសើរពីគំនិតនៃការច្នៃប្រតិដ្ឋ ការលះបង់ទាំងកម្លាំងកាយ កម្លាំងចិត្ត ពេលវេលា និងលុយកាក់ ដ្បិតចង់បង្ហាញសិល្បៈនៃវប្បធម៌របស់ខ្មែរឱ្យបានល្អបំផុត។ ការលះបង់របស់អ្នកនាង គួរទទួលបានការកោតសរសើរ មិនមែនជាការរិះគន់ បន្ទុះបង្អាប់បែបអវិជ្ជមាន ក្នុងន័យជាន់ពន្លិចណាមួយនោះទេ។

ជាមួយគ្នា អ្នកនាង ទេព បូព្រឹក្ស បានធ្វើការចែករំលែក និងបង្ហោះសារដូច្នេះថា៖ «សង្ឃឹមថានេះជាការរួមចំណែក ចុងក្រោយរបស់ខ្ញុំហើយ ខ្ញុំនឹងធ្វើឲ្យបានល្អបំផុត ខ្ញុំនឹងនាំអ្នកទៅលើឆាកអន្តរជាតិជាមួយខ្ញុំយើងនឹងរួមគ្នាបង្ហាញអ្វីជាភាពខ្លាំង នឹង ភាពជាម្ចាស់ដើមយ៉ាងពិតប្រាកដ ដំណើរបន្ទាប់ពីនេះខ្ញុំនឹងប្រគល់ភារកិច្ចនេះជូនអ្នកវិញ សូមអរគុណ»។

គួរឱ្យដឹងថា អ្នកនាង ទេព បូព្រឹក្ស ជាតារាចម្រៀងមួយរូបដែលតែងបញ្ចូលសិល្បៈខ្មែរ និងសហសម័យបែបច្នៃប្រតិដ្ឋ ហើយបទចម្រៀងអ្នកនាងធ្លាប់ធ្វើ និងទទួលបានជោគជ័យក្រាស់ក្រែលមានដូចជា ៖ បទ ទេវរាជ យុទ្ធសង្គ្រាម និង វីរនារី ជាដើម ហើយនៅពីក្រោយភាពជោគជ័យរបស់តារាស្រីរូបនេះគឺមានការជ្រោមជ្រែងពីលោក ជី ដេវីត ដែលជាស្វាមី៕

រូបភាព ៖ ទេព បូព្រឹក្ស

កញ្ញា កែវ សុខអាត | Ms. KEO SOK ART

ជីវប្រវត្តិ: មានបទពិសោធន៍ជាអ្នកបង្កើតមាតិការសង្គម និងជំនួញ ក្នុងស្រុក-ក្រៅស្រុក និងជាអ្នកសរសេររឿងប្រលោមលោក។ បច្ចុប្បន្នជាអ្នកបង្កើតមាតិការកំសាន្ត ប្លែកៗ នៃ AMS Infotainment។