Tiffany សមាជិកក្រុម Girls’ Generation និងតារាសម្តែង Byun Yo Han បានចុះសំបុត្រអាពាហ៍ពិពាហ៍រួចរាល់ ក្លាយជាប្តីប្រពន្ធស្របច្បាប់ នៅថ្ងៃទី២៧ ខែកុ​ម្ភៈនេះ ដ្បិតមិនទាន់បានរៀបចំពិធីមង្គល។  

នៅក្នុងសេចក្តីថ្លែងការណ៍របស់ TEAMHOPE ដែលជាទីភ្នាក់ងាររបស់ Byun Yo Han បានបញ្ជាក់ថា Tiffany និង Byun Yo Han ទើបតែបានចុះសំបុត្រអាពាហ៍ពិពាហ៍ ផ្អែកលើទំនុកចិត្តយ៉ាងជ្រាលជ្រៅ និងសេចក្តីស្រឡាញ់ដែលមានចំពោះគ្នាទៅវិញទៅមក។

ទីភ្នាក់ងារនេះបានឱ្យដឹងបន្ថែមថា៖ “នាពេលបច្ចុប្បន្ន នៅមិនទាន់មានព័ត៌មានលម្អិតច្បាស់លាស់អំពីកាលបរិច្ឆេទ ឬទីកន្លែងរៀបចំពិធីមង្គលការនៅឡើយទេ។ ទោះជាយ៉ាងណាក៏ដោយ ពួកគេកំពុងពិចារណារៀបចំពិធីមង្គលការតូចមួយក្នុងទម្រង់ជាកម្មវិធីសាសនានៅព្រះវិហារ ជាមួយក្រុមគ្រួសារនៅពេលក្រោយ”។

“ក្នុងពេលដែលអ្នកទាំងពីរកំពុងចាប់ផ្តើមជំពូកថ្មីនៃជីវិត ពួកគេនឹងចងចាំនូវរាល់ការគាំទ្រ ការលើកទឹកចិត្ត និងសេចក្តីស្រឡាញ់ដែលពួកគេបានទទួល ហើយនឹងខិតខំតបស្នងទៅវិញតាមរយៈរូបភាពដែលមានភាពចាស់ទុំជាងពេលមុនៗ” TEAMHOPE បន្តដូច្នេះ។

សូមរំឭកថាកាលពីខែធ្នូ ឆ្នាំ ២០២៥ កន្លងទៅថា តារាប្រុសវ័យ ៣៩ឆ្នាំ និងតារាស្រីវ័យ ៣៦ឆ្នាំ បានសម្រេចទម្លាយថា ពួកគេកំពុងទាក់ទងមើលចិត្តគ្នា​ ព្រមទាំងមានគម្រោងរៀបអាពាហ៍ពិពាហ៍ផងដែរ ដោយស្នេហាមួយនេះបានចាប់ផ្ដើមឡើង នៅពេលដែលអ្នកទាំងពីរបានសម្ដែងរួមគ្នាក្នុងរឿង Uncle Samsik នៅឆ្នាំ ២០២៤។

Byun Yo-han ធ្លាប់បានចែករំលែកនៅលើបណ្តាញសង្គមថា៖ “ខ្ញុំចង់ក្លាយជាមនុស្សម្នាក់ដែលល្អជាងមុន នៅពេលដែលខ្ញុំនៅក្បែរនាង ហើយការដែលបានឃើញស្នាមញញឹមរបស់នាង បានធ្វើឱ្យបេះដូងដ៏ហត់នឿយរបស់ខ្ញុំមានភាពកក់ក្តៅឡើងវិញ។ ខ្ញុំបានជួបមនុស្សម្នាក់ដែលខ្ញុំស្រឡាញ់ហើយ”។

ចំណែកឯ Tiffany Young ក៏ធ្លាប់និយាយដែរថា៖ “បច្ចុប្បន្ននេះ ខ្ញុំកំពុងស្ថិតក្នុងទំនាក់ទំនងស្នេហាដ៏មុតមាំជាមួយមនុស្សម្នាក់ដែលខ្ញុំមានគម្រោងនឹងរៀបការជាមួយ ហើយគាត់គឺជាមនុស្សម្នាក់ដែលផ្តល់ឱ្យនាងខ្ញុំនូវភាពកក់ក្តៅក្នុងចិត្ត។ គាត់ជួយឱ្យខ្ញុំមើលឃើញពិភពលោកក្នុងផ្លូវវិជ្ជមាន និងពោរពេញដោយក្តីសង្ឃឹម”។

គួរឱ្យដឹងផងដែរថា Tiffany គឺជាសមាជិកដំបូងគេបង្អស់នៃក្រុម Girls’ Generation ដែលបានរៀបការ ខណៈដែល Sooyoung កំពុងស្ថិតក្នុងទំនាក់ទំនងស្នេហាយូរអង្វែងជាមួយតារាសម្តែង Jung Kyung Ho៕