ថ្មីៗនេះ TREASURE ក្រុមចម្រៀងបុរសរបស់ YG Entertainment បានត្រលប់មកវិញជាមួយនឹងអាល់ប៊ុមខ្នាតតូចទី ៤ មានចំណងជើង “NEW WAV” ចេញផ្សាយនៅថ្ងៃទី ១ ខែមិថុនា ដោយមានបទចម្រៀងចំណងជើង “IF I” ជាបទចម្រៀងភាសាអង់គ្លេសដំបូងរបស់ពួកគេ។

ស្របគ្នានេះពួកគេបានបង្កើតកំណត់ត្រាប្រវត្តិសាស្ត្រថ្មីមួយសម្រាប់ខ្លួនឯងដោយបានដណ្តើមចំណាត់ថ្នាក់លេខ ១ ជាលើកដំបូងជាមួយនឹងបទ “IF I” ក្នុងកម្មវិធី ‘M Countdown’ ក្នុងរយៈពេល ៦ ឆ្នាំរាប់ចាប់តាំងពីការបង្ហាញខ្លួនដំបូងរបស់ពួកគេ។ ជ័យជម្នះត្រូវបានរាប់ថាជាភាពជោគជ័យដ៏មានអត្ថន័យបំផុតសម្រាប់ក្រុមទាំងមូល ព្រោះនេះជាលើកដំបូងបង្អស់ដែលសមាជិកទាំងអស់បានឡើងទទួលពានរង្វាន់ដោយផ្ទាល់នៅលើឆាកផ្សាយផ្ទាល់។

យោងតាមសារព័ត៌មាន The Chosun Daily បន្ទាប់ពីទទួលបានពានរង្វាន់ភ្លាមៗសមាជិកក្រុម TREASURE បានសម្តែងក្តីរំភើប និងអារម្មណ៍កំរើកចិត្តនៅលើឆាកថា “ពួកយើងសូមថ្លែងអំណរគុណយ៉ាងជ្រាលជ្រៅចំពោះ TREASURE MAKER (ឈ្មោះអ្នកគាំទ្រផ្លូវការ) ដែលតែងតែនៅក្បែរពួកយើង និងសូមអរគុណដល់ផលិតករប្រតិបត្តិលោក Yang Hyun-suk ដែលបាននិពន្ធបទចម្រៀងដ៏អស្ចារ្យមួយនេះឡើង។ ពួកយើងនឹងបន្តខិតខំប្រឹងប្រែងដើម្បីក្លាយជាក្រុមចម្រៀងមួយដែលស្ថិតក្នុងចងចាំរបស់ប្រជាជនគ្រប់រូបជានិច្ច។”

ការវិលត្រឡប់មកវិញជាមួយអាល់ប៊ុម “NEW WAV” លើកនេះក៏បានបង្ហាញពីភាគជោគជ័យរបស់អ្នកទាំង ១០ ក្នុងការបោះជំហានចូល «ជំពូកទីពីរ» នៅក្នុងវិស័យនេះផងដែរ។ លើសពីនេះអាល់ប៊ុមមួយនេះគឺជាចំណុចរបត់ដ៏សំខាន់មួយរបស់ក្រុម ព្រោះរាល់​បទ​ចម្រៀងទាំងអស់សុទ្ធត្រូវបានផលិតឡើងជាតន្ត្រី Hip-Hop យ៉ាងពិតប្រាកដជារសនិយមរបស់ TREASURE ផ្ទាល់។

គួរបញ្ជាក់ផងដែរថា តាមរយៈអាល់ប៊ុមថ្មីនេះ ក្រុម TREASURE មិនត្រឹមតែទទួលបានជោគជ័យលើកម្មវិធីទូរទស្សន៍ប៉ុណ្ណោះទេ ប៉ុន្តែពួកគេថែមទាំងបានឈានដល់កម្រិតកំពូលថ្មីមួយទៀត ដោយបានក្លាយជា “អ្នកលក់អាល់ប៊ុមបានលានបន្ទះ (Million-Seller)” លើកដំបូង ព្រមទាំងបានគ្រប់គ្រងតំណែងកំពូលរហូតដល់ទៅ ៤ លើតារាងអាល់ប៊ុមប្រចាំសប្តាហ៍ Oricon និង Billboard Japan របស់ប្រទេសជប៉ុនទៀតផង។ មិនត្រឹមប៉ុណ្ណេះ TREASURE បានបង្កើតកំណត់ត្រាសម្រាប់ក្រុមដោយមាន MV ទទួលបានអ្នកទស្សនា 100M លឿនជាងគេ និងជាក្រុមខេប៉ុបជំនាន់ទី ៤ ដែលទទួលបានអ្នកទស្សនា 100M លឿនជាងគេផងដែរ៕

រូបភាព៖ Trouble Maker International