ថ្មីៗនេះក្រុមចម្រៀងបុរស ZEROBASEONE (ZB1) បានបញ្ចប់ការប្រគំតន្ត្រីរយៈពេល ៣ ថ្ងៃដ៏អស្ចារ្យក្រោមចំណងជើងថា ‘HERE AND NOW’ នៅពហុកីឡដ្ឋាន KSPO Dome កាលពីថ្ងៃទី ១៣ ដល់ ១៥ ខែមីនា។ ព្រឹត្តិការណ៍នេះគឺជាការសម្តែងរួមគ្នាជាលើកចុងក្រោយក្នុងសមាសភាពសមាជិកទាំង ៩ នាក់ មុនពេលក្រុមត្រូវរៀបចំរចនាសម្ព័ន្ធថ្មី។

យោងតាមកិច្ចសន្យាសកម្មភាពជាក្រុម ឬ​ Project Group Contract សមាជិក ៥ នាក់រួមមាន Sung Han Bin, Kim Ji Woong, Seok Matthew, Kim Tae Rae និង Park Gun Wook នឹងបន្ដនៅជាក្រុមជា ZEROBASEONE  ខណៈដែល ៤ នាក់ទៀតដូចជា Zhang Hao, Ricky, Kim Gyu Vin និង Han Yu Jin នឹងត្រូវត្រឡប់ទៅកាន់ក្រុមហ៊ុន YH Entertainment វិញ។

សម្រាប់សំបុត្រប្រគំតន្រ្ដីរយៈពេលទាំង ៣ ថ្ងៃត្រូវបានគេរាយការណ៍ថាបានលក់ដាច់អស់គ្មានសល់ដោយបានបិទបញ្ចប់ដំណើរទេសចរណ៍ពិភពលោកឆ្នាំ ២០២៥ ក្នុងនាមក្រុមមានសមាជិក ៩ នាក់ និងទាក់ទាញអ្នកចូលរួមសរុបប្រមាណ ១៥ ម៉ឺននាក់។ ក្នុងនោះក្រៅពីបទចម្រៀងល្បីៗពីកម្មវិធី Boys Planet ក្រុម ZB1 ក៏បានបញ្ចេញបទចម្រៀងថ្មី Love for Calips ជាលើកដំបូង និងបញ្ចប់ដោយបទ In Bloomដែលតំណាងឱ្យការចាប់ផ្តើមជំពូកថ្មី។ នេះបើយោងតាមគេហទំព័រ Allkpop។

គួរឱ្យកត់សម្គាល់ថាចាប់តាំងពីបង្ហាញខ្លួននៅឆ្នាំ ២០២៣ ជាមួយនឹងបទចម្រៀងដែលពោរពេញដោយអត្ថន័យ ZEROBASEONE បានសាងកេរ្តិ៍ឈ្មោះ និងឥទ្ធិពលក្នុងវិស័យ K-pop មិនតិចនោះទេដែលគេឱ្យឈ្មោះថាជាមុខមាត់នៃ K-pop ជំនាន់ទី ៥ ដោយបានបំបែកកំណត់ត្រាពិភពលោកជាក្រុមដំបូងគេដែលលក់អាល់ប៊ុមដំបូងដាច់លើសលានច្បាប់ត្រឹមថ្ងៃដំបូង រហូតឈានដល់ការក្លាយជាម្ចាស់ពានរង្វាន់សិល្បករចំណូលថ្មីឆ្នើម (Rookie Grand Slam) ពីគ្រប់កម្មវិធីប្រគល់ពានធំៗក្នុងប្រទេសកូរ៉េផងដែរ។

គួរបញ្ជាក់ផងដែរថា ZEROBASEONE គឺជាក្រុមដែលបង្កើតឡើងតាមរយៈកម្មវិធី Survival Show  “Boys Planet” របស់ស្ថានីយទូរទស្សន៍ Mnet។ ជាទូទៅក្រុមដែលកើតចេញពីកម្មវិធីបែបនេះមិនមែនជាក្រុមអចិន្ត្រៃយ៍ឡើយ ប៉ុន្តែគឺជាក្រុមដែលធ្វើការរួមគ្នាក្នុងរយៈពេលកំណត់មួយដែលគេហៅថា Project Group៕