ទីភ្នាក់ងារគ្រប់គ្រង WakeOne បានប្រកាសនៅថ្ងៃទី១២ ខែកុម្ភៈនេះថា ក្រុមចម្រៀងបុរស ZEROBASEONE នឹងបន្តសកម្មភាពរបស់ក្រុមទៅមុខទៀត តែមានត្រឹមសមាជិក ៥រូបប៉ុណ្ណោះដែលបានរួមដំណើរនេះ។
ទីភ្នាក់ងារនេះបានបញ្ជាក់ក្នុងសេចក្តីថ្លែងការណ៍ថា៖ “Sung Han-bin, Kim Ji-woong, Seok Matthew, Kim Tae-rae និង Park Gun-wook បានសម្រេចចិត្តបន្តធ្វើការងាររួមគ្នាសម្រាប់រដូវកាលថ្មីក្នុងនាមជា ZEROBASEONE ដោយផ្អែកលើទំនុកចិត្តយ៉ាងស៊ីជម្រៅ”។
ចំណែកឯសមាជិក ៤ រូបទៀតគឺ Zhang Hao, Ricky, Kim Gyu-vin និង Han Yu-jin បានបញ្ចប់កិច្ចសន្យាគម្រោងរបស់ពួកគេ ហើយនឹងត្រៀមខ្លួនសម្រាប់សកម្មភាពទោលថ្មីៗរៀងៗខ្លួន។ WakeOne បានបន្ថែមថា៖ “ក្រុមហ៊ុននឹងគាំទ្ររាល់ផ្លូវដែលពួកគេនឹងដើរនាពេលអនាគត ហើយសូមឱ្យអ្នកគាំទ្របន្តផ្តល់ការលើកទឹកចិត្តដល់ពួកគេបន្ថែមទៀត”។
ចាប់កំណើតពីកម្មវិធីប្រកួតប្រជែង Boys Planet ក្រុម ZEROBASEONE បានបង្ហាញខ្លួនជាលើកដំបូង ក្នុងខែកក្កដា ឆ្នាំ ២០២៣។ ដ្បិតមិនមែនជាក្រុមចម្រៀងអចិន្ត្រៃយ៍ ដោយគ្រោងរួមក្រុមត្រឹមតែ ២ឆ្នាំកន្លះក្ដី តែកម្លោះទាំង ៩ ទទួលបានជោគជ័យយ៉ាងឆាប់រហ័ស ដោយទទួលបានពានរង្វាន់ និងលក់អាល់ប៊ុមបានលើសពី ១ លានបន្ទះ សម្រាប់ ៦ អាល់ប៊ុមជាប់ៗគ្នា។
ដោយកិច្ចសន្យាដើមមានកាលបរិច្ឆេទបញ្ចប់នៅក្នុងខែមករា ឆ្នាំ ២០២៦នេះ សមាជិកទាំង ៩ រូបបានព្រមព្រៀងគ្នាកាលពីខែធ្នូកន្លងទៅ ដើម្បីបន្តសកម្មភាពរយៈពេល ២ ខែបន្ថែមទៀត សម្រាប់ការចេញអាល់ប៊ុមនៅខែកុម្ភៈ និងការប្រគំតន្ត្រីចុងក្រោយ Encore concert នៅទីក្រុងសេអ៊ូលក្នុងខែមីនា។
ជាមួយនឹងសេចក្ដីថ្លែងការណ៍ថ្មីនេះ WakeOne បានបញ្ជាក់ថា ខ្លួននឹងផ្តល់ការគាំទ្រពេញទំហឹងដើម្បីធានាឱ្យមានការផ្លាស់ប្តូរដ៏រលូនទៅកាន់ទម្រង់ក្រុមថ្មី និងជួយដល់សមាជិកទាំងអស់ឱ្យអាចបន្តរីកចម្រើនជាមួយគ្នាដូចដើម៕
