ភ្នំពេញ ៖ ឆ្នាំ​២០៣០ គឺជា​ឆ្នាំដែលកម្ពុជា​បានដាក់គោលដៅ​ឱ្យក្លាយជាប្រទេស​មានប្រាក់ចំណូល​មធ្យមកម្រិតខ្ពស់ ហើយនៅឆ្នាំ២០៥០ នឹងក្លាយជាប្រទេសមានប្រាក់ចំណូលខ្ពស់ ជាមួយនឹងផែនការ​បង្កើន​ចំនួនប្រជាជន​ឱ្យបានដល់ ​២០លាន ទៅ ២០,២លាននាក់ និង​​ប្រាក់ចំណូល​ជាតិសម្រាប់​មនុស្ស​ម្នាក់រំពឹងថា​នឹងកើនឡើងដល់ ១៤ ០០០ដុល្លារអាម៉េរិក ។

ផ្អែក​លើ​ផែនការ​យុទ្ធសាស្ត្រ​របស់រាជរដ្ឋាភិបាល​កម្ពុជា​បានបង្ហាញឱ្យឃើញថា ក្នុងឆ្នាំ២០៥០ កម្ពុជា​ដាក់​ផែនការ​ត្រូវ​ធ្វើយ៉ាងណា​ឱ្យ​ទំហំផលិត​ផល​ក្នុងស្រុក​សរុប​កើនឡើង​ ២៧៦,៥ពាន់​លានដុល្លារអាម៉េរិក​ ដោយត្រូវ​ធានា​​ និងរក្សា​កំណើន​សេដ្ឋកិច្ចឱ្យបាន ៧ភាគរយ​ប្រចាំឆ្នាំ ។

លោកបណ្ឌិត​ គី សេរីវឌ្ឍន៍ ប្រធានវិទ្យាស្ថានសិក្សាចិន​ នៃរាជបណ្ឌិត្យ​សភាកម្ពុជា ​បានថ្លែ​ងប្រាប់បណ្ដាញព័ត៌មាន AMS ឱ្យដឹងថា បើតាម​របាយការណ៍នៃផែនការ​របស់រាជរដ្ឋាភិបាលបានឱ្យឃើញថា ក្នុងឆ្នាំ២០៥០ កម្ពុជា​នឹងបង្កើន​ទំហំសេដ្ឋកិច្ច​ឱ្យបានដល់​ជាង ​២៧៦​ពាន់លានដុល្លារអាម៉េរិក និងត្រូវ​ជំរុញកំណើន​សេដ្ឋកិច្ច​ឱ្យបានចន្លោះពីប្រមាណ ៦,៩​ភាគរយ ឬ ៧ភាគរយ​ក្នុងមួយឆ្នាំ ។​

លោក​បណ្ឌិត​បន្តថា​ ៖

«បើតាមរបាយការណ៍នេះ ទំនង​ជា​បានព្យាករ ឬធ្វើឡើងមុនពេល​កម្ពុជា​មាន​សង្គ្រាមជាមួយប្រទេសថៃ ហើយគិតថាកម្ពុជា​នឹងអាចទៅរួច ប៉ុន្តែ​យើងនៅមិនទាន់ដឹងថា តើ​សង្គ្រាម​ខ្មែរ​ថៃ នឹង​ត្រូវ​បញ្ចប់ពេលណា​ ហើយនៅពេល​បញ្ចប់អាច​ធ្វើឱ្យ​ចរន្ត​សេដ្ឋកិច្ច​មានការ​ប្រែប្រួលយ៉ាង​ណានៅឡើយ»។

​អ្វីដែលរាជរដ្ឋាភិបាល​កម្ពុជា​បានខិតខំ​ដើម្បីជំរុញសេដ្ឋកិច្ច​កម្ពុជា គឺការ​បង្កើតឱ្យ​មានមូលធនមនុស្ស​កាន់តែច្រើន​ ដែលជា​មូលដ្ឋាន​សំខាន់​ក្នុងការ​ជំរុញកំណើន​សេដ្ឋកិច្ច ការ​កាត់បន្ថយ​អំពើ​ពុករលួយ​ មានកំណែទម្រង់​ក្នុង​ប្រព័ន្ធរាជការ​ និងការ​គ្រប់គ្រង​ ដែលគេហៅថា​ អភិបាលកិច្ចរបស់រដ្ឋ ។

លោកបន្ថែមថា​ ៖

«ដើម្បី​សម្រេច​ឱ្យបាននូវផែនការ​ចក្ខុវិស័យ​ឆ្នាំ២០៥០​ រដ្ឋ​ត្រូវ​រៀបចំកែទម្រង់​ប្រព័ន្ធអប់រំ ដោយត្រូវចាប់ផ្ដើមពីពេលនេះ ។ ក្មេងៗ​ ដែលអាយុ ​៥ឆ្នាំនៅពេលនេះ ត្រូវតែក្លាយជា​យុវជន​ដែលខ្លាំង​មានចំណេះ ជំនាញ នៅរយៈពេល២៥ឆ្នាំខាងមុខ​ ដូច្នេះ​ នៅរយៈពេល២៥ឆ្នាំទៀត ក្មេង​អាយុ​៥ឆ្នាំនៅពេលនេះ នឹងមានអាយុ​៣០ឆ្នាំ ហើយក៏ត្រូវតែក្លាយជាមូលធនមនុស្ស​ដ៏ពូកែ​ ប៉ុន្តែបើសិនជាមិនរៀបចំពីពេលនេះ ឬក៏ទុកបណ្ដែត​បណ្ដោយឱ្យវិស័យអប់រំ​នៅតែបន្ត​កម្រិត​បែបនេះ នៅក្នុងឆ្នាំ២០៥០ ​នឹងមិនអាច​សម្រេច​បានតាមផែនការ​ឡើយ​» ។

លោក​បណ្ឌិត ​ហុង វណ្ណៈ អ្នកជំនាញសេដ្ឋកិច្ចនៃរាជបណ្ឌិត្យសភាកម្ពុជា​​ បានលើកឡើងផងដែរថា តាមផែនការ​យុទ្ធសាស្ត្ររបស់រាជរដ្ឋាភិបាល​ ​សម្រេច​ឱ្យបាន​ជាប្រទេស​មានប្រាក់ចំណូលខ្ពស់​នៅឆ្នាំ២០៥០នោះ វា​អាច​នឹង​សម្រេច​ទៅបាន ដោយផ្អែកទៅលើ​កត្តា​មួយចំនួន ជាពិសេស​ការ​ខិតខំប្រឹង​ប្រែងរបស់​រាជរដ្ឋាភិបាល​នាពេលបច្ចុប្បន្ន​ ។

លោកបណ្ឌិត​បន្តថា ​៖

«បច្ចុប្បន្ន​នេះ កំណើនសេដ្ឋកិច្ចកម្ពុជាបាន​កើនឡើង​វិញ​ជា​បន្ត​បន្ទាប់ ហើយរាជរដ្ឋាភិបាលកម្ពុជា​ក៏បានកាត់បន្ថយ​នូវកម្ចីពីបរទេស​​ ដោយខំប្រឹង​សង​ត្រលប់ទៅវិញជា​បន្ត​បន្ទាប់ផងដែរ ​ថ្វីត្បិត​តែ​មិនច្រើន​ក៏ដោយ ។ តាមរយៈសកម្មភាព​វិនិយោគថ្មី​ៗលើ​វិស័យឧស្សាហកម្ម​ខ្នាតតូច មធ្យម និងធុន​ធ្ងន់​ជា​បន្តបន្ទាប់ ដែលអាច​ឱ្យផលិតផលដែលផលិត​ពីកម្ពុជា​មានតម្លៃបន្ថែមខ្ពស់ជា​ងមុន ហើយក៏ធ្វើឱ្យមានកម្មករ​ជំនាញ​នៅកម្ពុជា​កាន់តែច្រើន​ និងទទួលបានប្រាក់ចំណូលខ្ពស់ជា​ងមុន​»។

លោកបណ្ឌិត ​ញឹល រដ្ឋា អ្នកជំនាញវិទ្យាសាស្ត្រនយោបាយ និងសេដ្ឋកិច្ច បានមានប្រសាសន៍ថា តាមផែនការ​របស់រដ្ឋាភិបាល​ដែល​កំណត់​ថា​ នឹងជំរុញទំហំសេដ្ឋកិច្ចឱ្យបានជាង ​២៧៦ពាន់លានដុល្លារ​ ហើយ​ប្រាក់ចំណូលប្រចាំឆ្នាំ​សម្រាប់ពលរដ្ឋម្នាក់​ជាមធ្យម​ ១៤ ០០០ដុល្លារ​ ក្នុងឆ្នាំ២០៥០ គឺ​អាច​ទៅរួច ហើយដើម្បីឱ្យផែនការ​នេះសម្រេច​បាន​គឺត្រូវ​ជំរុញកំណើនសេដ្ឋកិច្ចកម្ពុជា​ឱ្យបានចន្លោះពី ៦ ទៅ ៧ ​ភាគរយ​ក្នុងមួយឆ្នាំ រយៈពេល​២៥ឆ្នាំជាប់គ្នា។

លោកបន្តថា ដើម្បីសម្រេច​ឱ្យបាននូវ​កំណើនសេដ្ឋកិច្ច​នេះ កម្ពុជា​ត្រូវ​ផ្លាស់ប្តូរពីកម្លាំង​ពលកម្ម​ដែលមានតម្លៃទាបទៅជា​កម្លាំងពលកម្ម​ដែលមានតម្លៃខ្ពស់ ជាក់ស្ដែង​កម្ពុជា​ត្រូ​វផ្លាស់ប្តូរពីការ​ពឹងលើ​វិស័យកាត់ដេរ​ទៅរក​សេដ្ឋកិច្ចដែលពឹង​ផ្អែកលើបច្ចេកវិទ្យា​ ​រួមមាន​ការផលិត​គ្រឿងបន្លាស់រថយន្ត ផលិតដ្រូន និងការ​ធ្វើកសិកម្ម​បែបទំនើប ។ មួយវិញទៀត​ ដើម្បីឱ្យចំណូលប្រជាជន​កើនឡើងដល់ ​១៤ ០០០ដុល្លារ​ក្នុងមួយឆ្នាំ កម្ពុជា​ត្រូវបង្កើនផលិតភាពកម្លាំងពលកម្ម​ ដោយ​ពលរដ្ឋម្នាក់ៗត្រូវ​បង្កើន​ផលិត​ភាពរបស់ខ្លួនឱ្យបាន ៥ ទៅ ៦ ដង​ ចាប់ពីពេលនេះ​ រហូតដល់​ឆ្នាំ២០៥០ ដោយត្រូវ​ផ្ដោតសំខាន់ទៅលើការអប់រំកម្រិត​ខ្ពស់ ។

លោក​បញ្ជាក់ថា ៖

«ចំណុច​សំខាន់មួយទៀត ដែល​កម្ពុជា​ត្រូវ​ធ្វើឱ្យបាននោះ គឺ​កំណើន​សេដ្ឋកិច្ច​ដែលមានភាពធន់​ ដូច្នេះ បើទោះបីជា​ប្រទេស​ណាមួយមានបញ្ហា​សេដ្ឋកិច្ច ក៏កម្ពុជា​នៅតែ​មានកំណើនសេដ្ឋកិច្ច​ល្អ ដោយកម្ពុជា​ត្រូវធ្វើពិពិធកម្មទីផ្សារ​បន្ថែម​ទៀត​ មិនត្រូវ​ពឹងផ្អែកតែលើប្រទេស​ណាមួយនោះឡើយ​»។

សូមជម្រាបផងដែរថា ក្នុងឆ្នាំ២០២៥ កន្លងទៅនេះ ប្រាក់ចំណូល​ប្រជាជនកម្ពុជាប្រចាំឆ្នាំសម្រាប់មនុស្ស​ម្នាក់ ​ជា​មធ្យម មានចំនួន ២ ៨៥៨ ដុល្លារ អាម៉េរិក ជាមួយ​នឹងទំហំផលិតផល​ក្នុងស្រុកសរុបប្រមាណ ៥១,៩៦ពាន់លានដុល្លារអាម៉េរិក ហើយក្នុងឆ្នាំ២០២៦នេះ កម្ពុជា​រំពឹងថា ​ប្រាក់ចំណូលជាមធ្យម​សម្រាប់​មនុស្ស​ម្នាក់នឹង​​កើនឡើង​ដល់​ ៣ ០២០​ដុល្លារអាម៉េរិក ជាមួយ​នឹង​ទំហំផលិតផល​ក្នុងស្រុក​សរុប​ចំនួនជាង​ ៥៣ពាន់​លានដុល្លារ​អាម៉េរិក ៕ ​