តម្រូវការ និងតម្លៃដីធ្លីនៅក្រុងច្បារមន នឹងមានកំណើនខ្ពស់ ក្រោយរដ្ឋាភិបាលបង្ហើបគម្រោងប្រែក្លាយក្រុងមួយនេះជាមជ្ឈមណ្ឌលពាណិជ្ជកម្មទំនើប

ភ្នំពេញ ៖ តម្រូវការ និងតម្លៃដីធ្លីនៅខេត្តកំពង់ស្ពឺ ជាពិសេសនៅក្រុងច្បារមន អាចនឹងមានកំណើនខ្ពស់បន្ថែមទៀត បន្ទាប់ពីរដ្ឋាភិបាលបានបង្ហើបពីគម្រោងអភិវឌ្ឍន៍ក្រុងច្បារមនទៅជាមជ្ឈមណ្ឌលពាណិជ្ជកម្មទំនើប ដោយនឹងកែលម្អហេដ្ឋារចនាសម្ព័ន្ធនៅក្នុងក្រុងនេះឱ្យកាន់តែទំនើប និងមានសោភ័ណ្ឌភាព ។

ឯកឧត្តម ខ្លូត រតនា រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា ក្រុងច្បារមន នៃខេត្តកំពង់ស្ពឺ នឹងត្រូវកែលម្អហេដ្ឋារចនាសម្ព័ន្ធ ហើយប្រែក្លាយក្រុងមួយនេះ ពីតំបន់ដែលធ្លាប់តែគេទៅហួស-មកហួស ឱ្យទៅជាមជ្ឈមណ្ឌលសេដ្ឋកិច្ច ពាណិជ្ជកម្ម និងឧស្សាហកម្មដ៏ទំនើបមួយ ។

ឯកឧត្តមបន្តថា តាមរយៈគម្រោងអភិវឌ្ឍន៍ក្រុងច្បារមននេះដែរ នឹងក្លាយជាកត្តាទាក់ទាញដ៏សំខាន់សម្រាប់រោងចក្រ សហគ្រាស មកវិនិយោគនៅក្នុងខេត្តកំពង់ស្ពឺ ដែលធ្វើឱ្យប្រជាពលរដ្ឋមានការងារធ្វើ មានជំនាញ និងចំណេះដឹងបន្ថែមពីការវិនិយោគបច្ចេកវិទ្យាថ្មីៗពីបរទេស ។

ឯកឧត្តមបញ្ជាក់ថា ៖

« ការកែលម្អហេដ្ឋារចនាសម្ព័ន្ធ ដូចជា ផ្លូវថ្នល់កាន់តែស្អាត ធំទូលាយ និងមានបំពាក់ភ្លើងបំភ្លឺផ្លូវនេះដែរ នឹងជួយបង្កើនតម្លៃដីធ្លី និងតម្លៃអចលនទ្រព្យនៅក្នុងតំបន់បន្ថែមទៀត ដោយនឹងជួយជំរុញឱ្យមានការអភិវឌ្ឍលំនៅឋាន និងជំរុញសកម្មភាពសេដ្ឋកិច្ចផ្សេងៗនៅក្នុងតំបន់នេះដែរ។ ការអភិវឌ្ឍហេដ្ឋារចនាសម្ព័ន្ធ និងបរិស្ថាននៅក្នុងក្រុងច្បារមន នឹងរួមចំណែកឱ្យប្រជាពលរដ្ឋរស់នៅតំបន់នោះមានភាពថ្លៃថ្នូរ សុភមង្គល ដែលស្របនឹងសមរភូមិរបស់ក្រសួងរៀបចំដែនដី នគរូបនីយកម្ម និងសំណង់ ដោយប្រែក្លាយទៅជាភូមិឋានក្សេមក្សាន្ត ទ្រនុំសភមង្គល »។

អ្នកឧកញ៉ាបណ្ឌិត សំ សុខនឿន ប្រធានក្រុមប្រឹក្សាសម្ព័ន្ធក្រុមហ៊ុន SAM SN Group បានមានប្រសាសន៍ថា ខេត្តកំពង់ស្ពឺ ជាខេត្តមួយដែលមានសក្ដានុពលខ្លាំងលើការអភិវឌ្ឍរោងចក្រ ឧស្សាហកម្ម និងតំបន់សេដ្ឋកិច្ចពិសេសជាដើម

អ្នកឧកញ៉ាបន្តថា ៖

«សម្រាប់ក្រុងច្បារមន ជាតំបន់មួយដែលស្ថិតនៅមិនឆ្ងាយពីរាជធានីភ្នំពេញប៉ុន្មាននោះទេ ដូច្នេះ ដើម្បីទាក់ទាញទេសចរឱ្យទៅកម្សាន្តនៅខេត្តកំពង់ស្ពឺកាន់តែច្រើន ការអភិវឌ្ឍលើហេដ្ឋារចនាសម្ព័ន្ធ គឺជាផ្នែកនៃការទាក់ទាញ ខណៈដែលខេត្តមួយនេះក៏មានតំបន់រមណីយដ្ឋានទេសចរណ៍ជាច្រើនកន្លែងរយចស្រាប់ទៅហើយ» ។

អ្នកឧកញ៉ាបណ្ឌិតបានបន្ថែមថា តាមរយៈគម្រោងអភិវឌ្ឍន៍របស់រាជរដ្ឋាភិបាលនៅក្នុងក្រុងច្បារមនខេត្តកំពង់ស្ពឺ នឹងធ្វើឱ្យតម្លៃដីធ្លីនៅក្នុងតំបន់នោះកាន់តែល្អប្រសើរ ហើយក៏ធ្វើឱ្យវិនិយោគិន ទាំងក្នុង និងក្រៅប្រទេស ស្វែងរកទីតាំងសម្រាប់វិនិយោគលើគម្រោងរបស់ខ្លួនបន្ថែមទៀត ជាពិសេស ការអភិវឌ្ឍក្រុងច្បារមនទៅជាក្រុងទំនើប គឹជាគំរូមួយសម្រាប់បណ្ដាខេត្តដទៃទៀតនៅក្នុងប្រទេសកម្ពុជា ដែលគួរសិក្សា និងអភិវឌ្ឍតាម ពីព្រោះថាការអភិវឌ្ឍនេះ អាចទាក់ទាញវិនិយោគិន ទេសចរជាតិ និងអន្តរជាតិទៅកាន់តំបន់កាន់តែច្រើន ដែលជួយឱ្យប្រជាពលរដ្ឋជាម្ចាស់ស្រុកនៅទីនោះកាន់តែទទួលបានអត្ថប្រយោជន៍ពីការអភិវឌ្ឍ៕

លោក អ៊ិច ណែត | Mr. Ich Neth

ជីវប្រវត្តិ: បានបញ្ចប់ការសិក្សាផ្នែកទំនាក់ទំនងសង្គម និងសារព័ត៌មាននៃសាលាបច្ចេកទេសដុនបូស្កូ ខេត្តព្រះសីហនុ និងមានបទពិសោធន៍ក្នុងវិស័យសារព័ត៌មាន១៣ឆ្នាំ ។ បច្ចុប្បន្នជាអ្នកយកព័ត៌មានសេដ្ឋកិច្ច និងអចលនទ្រព្យ ឱ្យសារព័ត៌មាន AMS Economy ។