ពលរដ្ឋ ១២ ម៉ឺននាក់ ចំណេញលុយប្រហែល ៤,៥ លានដុល្លារ ពីការធ្វើដំណើរទៅលេងស្រុកកំណើតពេលបុណ្យចូលឆ្នាំខ្មែរ

ខណៈដែលប្រេងឥន្ធនៈឡើងថ្លៃ ប្រជាពលរដ្ឋប្រមាណ ១២ ម៉ឺននាក់ បានជ្រើសរើសធ្វើដំណើរតាមរថយន្តក្រុងដោយឥតគិតថ្លៃ ដែលផ្តល់ដោយរាជរដ្ឋាភិបាល សម្រាប់ពិធីបុណ្យចូលឆ្នាំប្រពៃណីខ្មែរ។

មន្ត្រីផ្លូវការរបស់សាលារាជធានីភ្នំពេញ ប៉ាន់ប្រមាណថា ពលរដ្ឋទាំង ១២ ម៉ឺននាក់រួមគ្នា អាចសន្សំប្រាក់បានរហូតដល់ ៤,៥ លានដុល្លារតាមរយៈការធ្វើដំណើរតាមរថយន្តក្រុងរបស់រដ្ឋាភិបាលនេះ។

អ្នកនាំពាក្យសាលារាជធានីភ្នំពេញ លោកស្រី ដោ សម្ផស្ស បានប្រាប់បណ្តាញព័ត៌មាន AMS ថា ជាមធ្យមពលរដ្ឋកម្ពុជាម្នាក់ត្រូវចំណាយចន្លោះពី ១០ ទៅ ១៥ ម៉ឺនរៀល ឬចន្លោះពី ២៥ ទៅ ៣៧,៥ ដុល្លារ សម្រាប់សោហ៊ុយធ្វើដំណើរតាមមធ្យោបាយផ្ទាល់ខ្លួន ឬរថយន្តឈ្នួលក្នុងមួយរដូវបុណ្យទាន។ ដូច្នេះនៅពេលដែលរដ្ឋាភិបាល ដឹកជញ្ជូនពួកគេទៅកាន់ស្រុកកំណើតដោយឥតគិតថ្លៃ ពលរដ្ឋទាំង ១២ ម៉ឺននាក់ អាចសន្សំលុយបានចន្លោះពី ៣ លាន ទៅ ៤,៥ លានដុល្លារ ក្នុងមួយរដូវនេះ។

លោកស្រី ដោ សម្ផស្ស បានថ្លែងថា៖

“១២ម៉ឺននាក់ ហើយម្នាក់គាត់ត្រូវចំណាយក្នុងមួយពេលចូលឆ្នាំនេះសម្រាប់ការធ្វើដំណើរចន្លោះពី ១០ ទៅ១៥ ម៉ឺនរៀល។”

តាមផែនការគ្រោងទុករបស់រដ្ឋបាលរាជធានីភ្នំពេញ គឺបញ្ចេញរថយន្តក្រុងត្រឹមតែ ៦០០ គ្រឿង ប៉ុណ្ណោះ ប៉ុន្តែ ដោយសារតម្រូវការកើនឡើង រដ្ឋបាលរាជធានីភ្នំពេញ សម្រេចបញ្ចេញរថយន្តក្រុងវបន្ថែមរហូតដល់ ៩៤៥ គ្រឿង ឯណោះ។

លោកស្រី ដោ សម្ផស្ស បន្ថែមថា ពលរដ្ឋដែលបានប្រើប្រាស់សេវាកម្មរថយន្តក្រុងដោយឥតគិតថ្លៃរបស់រដ្ឋាភិបាលកើនចំនួន ៤០ ភាគរយក្នុងឆ្នាំនេះ ធៀបនឹងឆ្នាំកន្លងទៅ។

បណ្ឌិត ព្រុំ ទេវី អ្នកជំនាញសេដ្ឋកិច្ច យល់ឃើញថា តម្លៃប្រេងឥន្ធនៈឡើងថ្លៃ គួបផ្សំការរៀបចំកាន់តែប្រសើរ និងការទទួលបានព័ត៌មានកាន់តែទូលំទូលាយជាងមុន ទើបធ្វើឱ្យប្រជាពលរដ្ឋមានចំណាប់អារម្មណ៍ប្រើប្រាស់រថយន្តក្រុងដោយឥតគិតថ្លៃ ដែលរៀបចំដោយរដ្ឋាភិបាលភ្នំពេញច្រើនជាងមុន។

សូមបញ្ជាក់ថា ក្នុងពិធីបុណ្យចូលឆ្នាំថ្មី ឆ្នាំ ២០២៦នេះ រដ្ឋាភិបាលបានដឹកជញ្ជូនប្រជាពលរដ្ឋ កម្មករ កម្មការិនី ដោយឥតគិតថ្លៃរយៈពេល ៦ ថ្ងៃ គិតចាប់ពីថ្ងៃទី ១២ ដល់ថ្ងៃទី ១៧ ខែមេសា សម្រាប់ទិសដៅទូទាំងប្រទេស៕

អត្ថបទ៖ ខន ណារី AMS

លោក ស៊ុំ ម៉ាណេត | Mr. Sum Manet

ជីវប្រវត្តិ: លោកមានបទពិសោធន៍ជិត ១០ឆ្នាំក្នុងប្រព័ន្ធផ្សព្វផ្សាយ និងកាសែតផ្នែកសេដ្ឋកិច្ច ហិរញ្ញវត្ថុ និងអចលនទ្រព្យ។ បច្ចុប្បន្ន លោកជាការីនិពន្ធនៃព័ត៌មានសេដ្ឋកិច្ច AMS Economy។