វិញ្ញាបនបត្រសម្គាល់ម្ចាស់អចលនវត្ថុចំនួន ៣ ៣៦១បណ្ណ បានប្រគល់ជូនប្រជាពលរដ្ឋមកពីភូមិចំនួន២ក្នុងឃុំខ្នាចរមាស ស្រុកបវេល

បាត់ដំបង ៖ បន្ទាប់ពីបានបញ្ចប់ការវាស់វែងដីធ្លី និងចុះបញ្ជីរួច ក្រុមការងាររបស់ក្រសួងរៀបចំដែនដី នគរូបនីយកម្ម និងសំណង់ និងមន្ត្រីនៃមន្ទីរសុរិយោដីតាមបណ្ដារាជធានី ខេត្ត បានចេញបណ្ណជាបន្តបន្ទាប់ដើម្បីចែកជូនដល់ប្រជាពលរដ្ឋដែលជាម្ចាស់កម្មសិទ្ធិសម្រាប់ប្រើប្រាស់ និងរក្សាទុកជាប្រយោជន៍តកូនចៅ។ ជាក់ស្ដែង បណ្ណកម្មសិទ្ធិចំនួន ៣ ៣៦១បណ្ណត្រូវបានប្រគល់ជូនពលរដ្ឋចំនួន ពលរដ្ឋចំនួន ១,០៤៧ គ្រួសារ មកពីភូមិចំនួន២ ក្នុងឃុំខ្នាចរមាស ស្រុកបវេល ខេត្តបាត់ដំបង។

នៅក្នុងឱកាសអញ្ជើញប្រគល់វិញ្ញាបនបត្រសម្គាល់ម្ចាស់អចលនវត្ថុជូនពលរដ្ឋ កាលពីថ្ងៃទី០៤ ខែមិថុនា ២០២៦ ឯកឧត្តម សុខ លូ អភិបាលនៃគណៈអភិបាលខេត្តបាត់ដំបង បានមានប្រសាសន៍ថា រាជរដ្ឋាភិបាលកម្ពុជា ក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន បន្តមកដល់សម្ដេចមហាបវរធិបតី ហ៊ុន ម៉ាណែត ជានាយករដ្ឋមន្រ្តីបានយកចិត្តទុកដាក់ខ្ពស់ចំពោះការចេញវិញ្ញាបនបត្រសម្គាល់ម្ចាស់អចលនវត្ថុជូនដល់ប្រជាពលរដ្ឋនៅទូទាំងប្រទេស សំដៅសម្រេចឱ្យបានព្រំដីដែលមានភាពច្បាស់លាស់ និងកាត់បន្ថយទំនាស់ដីធ្លី។

ឯកឧត្តម បានណែនាំដល់ប្រជាពលរដ្ឋដែលទទួលបានវិញ្ញាបនបត្រសម្គាល់ម្ចាស់អចលនវត្ថុត្រូវទុកដាក់ឱ្យបានល្អ កុំលក់ដីត្រូវថែរក្សាទុកចែកបន្តដល់កូនចៅជំនាន់ក្រោយ។

ជាមួយគ្នានេះ ឯកឧត្តមក៏បានក្រើនរំឭកដល់មន្រ្តី និងអាជ្ញាធរភូមិ ឃុំ ស្រុក ត្រូវសហការគ្នាពន្លឿនការចែកវិញ្ញាបនបត្រសម្គាល់ម្ចាស់អចលនវត្ថុជូនដល់ប្រជាពលរដ្ឋ និងមិនត្រូវទារកម្រៃសេវាក្រៅផ្លូវការខុសពីគោលការណ៍នោះទេ។

ឯកឧត្តម សាយ សំអាល់ ឧបនាយករដ្ឋមន្ត្រី និងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ តែងតែបានលើកឡើងក្នុងឱកាសលោកចុះប្រគល់វិញ្ញាបនបត្រសម្គាល់ម្ចាស់អចលនវត្ថុជូនពលរដ្ឋជាម្ចាស់កម្មសិទ្ធិ ដោយឯកឧត្តមបានបញ្ជាក់ថា ការបញ្ចប់ការវាស់វែង ចុះបញ្ជី និងចេញបណ្ណកម្មសិទ្ធិជូនពលរដ្ឋចប់សព្វគ្រប់ គឺជាការបញ្ចប់បញ្ហាចម្រូងចម្រាស វិវាទដីធ្លីក្នុងសង្គមកម្ពុជា ។

ឯកឧត្តមបានលើកឡើងថា ក្នុងសង្គមមួយដែលមានសុភមង្គល និងរស់នៅសុខុដុមរមនា គឺជាសង្គមដែលចេះសាមគ្គីគ្នា ដោយមិនចង់ឃើញសង្គមមួយដែលបើកភ្នែកឡើងឮតែសំឡេងទាស់ទែងគ្នារឿងព្រំដី ទាស់ទែងគ្នារឿងបញ្ហាដីនោះឡើយ ដូច្នេះ ក្នុងពេលឆាប់ៗនេះ បញ្ហាទាស់ទែងទាំងនេះនឹងលែងកើតមានក្នុងសង្គមកម្ពុជាទៀតហើយ ។

ឯកឧត្តម តឹក រ៉េតសំរេច រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ ក៏ធ្លាប់បានមានប្រសាសន៍នៅក្នុងវេទិកាអន្តរជាតិមួយកាលពីពេលថ្មីៗនេះថា ចាប់ពីឆ្នាំ២០២៧ តទៅ ការចុះបញ្ជីដីធ្លីនឹងបញ្ចប់ជាស្ថាពរ ហើយនឹងប្រគល់បណ្ណជូនពលរដ្ឋជាម្ចាស់កម្មសិទ្ធិឱ្យបានចប់សព្វគ្រប់ ដូច្នេះ ចាប់ពីពេលនោះតទៅ រាល់បញ្ហាដីអត់ប្លង់ បញ្ហាទំនាស់ព្រំដី បញ្ហាទិញដីជាន់គ្នា ឬដីអត់ប្លង់ នឹងលែងកើតមានឡើងទៀតហើយ ។ ការបញ្ចប់បញ្ហានេះ វានឹងសម្រួលដល់ការវិនិយោគ ទាក់ទាញអ្នកអភិវឌ្ឍន៍ ក្នុងការស្វែងរកទីតាំងដី ដើម្បីអភិវឌ្ឍន៍ ឬវិនិយោគដោយទំនុកចិត្តខ្ពស់ ៕

លោក អ៊ិច ណែត | Mr. Ich Neth

ជីវប្រវត្តិ: បានបញ្ចប់ការសិក្សាផ្នែកទំនាក់ទំនងសង្គម និងសារព័ត៌មាននៃសាលាបច្ចេកទេសដុនបូស្កូ ខេត្តព្រះសីហនុ និងមានបទពិសោធន៍ក្នុងវិស័យសារព័ត៌មាន១៣ឆ្នាំ ។ បច្ចុប្បន្នជាអ្នកយកព័ត៌មានសេដ្ឋកិច្ច និងអចលនទ្រព្យ ឱ្យសារព័ត៌មាន AMS Economy ។