អ្នកអភិវឌ្ឍន៍លំនៅឋានតម្លៃសមរម្យនៅកម្ពុជា នឹងទទួលបានការលើកទឹកចិត្តខ្ពស់ពីរាជរដ្ឋាភិបាល

ភ្នំពេញ ៖ អ្នកវិនិយោគទាំងក្នុង និងក្រៅប្រទេសដែលផ្ដោតលើការអភិវឌ្ឍលំនៅឋានតម្លៃសមរម្យនៅកម្ពុជា នឹងទទួលបានការលើកចិត្តខ្ពស់រាជរដ្ឋាភិបាល ដើម្បីជំរុញឱ្យការផ្គត់ផ្គង់លំនៅឋានដែលជាតម្រូវការពិតប្រាកដពីប្រជាពលរដ្ឋ។

ឯកឧត្តម សេង ឡូត អគ្គនាយកនៃអគ្គនាយកដ្ឋានរដ្ឋបាល នៃក្រសួងរៀបចំដែនដី នគរូបណីយកម្មនិងសំណង់ បានមានប្រសាសសន៍ថា អ្នកអភិវឌ្ឍន៍លំនៅឋានតម្លៃសមរម្យនៅកម្ពុជា នឹងត្រូវទទួលបានការលើកលែង ឬអនុគ្រោះពន្ធ និងកាតព្វកិច្ចនិយ័តកម្ម រួមទាំងការបង់កម្រៃផ្សេងៗ ដូច្នេះក្រុមហ៊ុនឬអ្នកវិនិយោគដែលបោះទុនវិនិយោគលើលំនៅឋានតម្លៃសមរម្យ នឹងទទួលឱកាសពិសេស និងអត្ថប្រយោជន៍ច្រើនពីរាជរដ្ឋាភិបាល។

ឯកឧត្តមបានបន្តថា ក្រៅពីអត្ថប្រយោជន៍ទាំងនេះ អ្នកវិនិយោគ ឬអ្នកអភិវឌ្ឍន៍លំនៅឋានតម្លៃសមរម្យក៏នឹងទទួលបានការជួយសម្របសម្រួលនីតិវិធីរដ្ឋបាល និងការវិនិយោគហេដ្ឋារចនាសម្ព័ន្ធ សាធារណៈ ដោយក្រសួងរៀបចំដែន នគរូបនីយកម្មនិងសំណង់ នឹងជួយសម្រួលបែបបទនិងការស្នើសុំ អភិវឌ្ឍលំនៅឋានតម្លៃសមរម្យ ដោយក្រសួងនឹងជួយសម្រួលនិងពន្លឿននីតិវិធី ដើម្បីធ្វើយ៉ាងណាឱ្យដំណើរការវិនិយោគរបស់លឿនរហ័ស ដោយរដ្ឋនឹងជួយតភ្ជាប់ហេដ្ឋារចនាសម្ព័ន្ធ ដូចជា ផ្លូវ លូ ទឹក ភ្លើងជាដើម។

បើតាមរបាយការណ៍របស់ក្រសួងរៀបចំដែនដី នគរូបនីយកម្មនិងសំណង់ គិតត្រឹមឆ្នាំ ២០២៥ គម្រោងអភិវឌ្ឍន៍លំនៅឋានតម្លៃសមរម្យមានចំនួន ៦ ដោយក្នុងនោះរួមមាន ១. គម្រោងរបស់ក្រុមហ៊ុន World Bridg Home មានផ្ទះសរុបចំនួន ២ ៤៥៧ គម្រោង ស្ថិតនៅខេត្តកណ្ដាល ២. គម្រោងរបស់ក្រុមហ៊ុន B&BM Development ដោយអភិវឌ្ឍផ្ទះសរុបចំនួន ៧០០ ខ្នង ស្ថិតនៅខេត្តកណ្ដាល ៣. គម្រោងរបស់ក្រុមហ៊ុន អារ៉ាខាវ៉ា ជាប្រភេទអគារសហកម្មសិទ្ធិដែលមានចំនួន ១ ៩២៨ យូនីត ស្ថិតនៅរាជធានីភ្នំពេញ ៤. គម្រោងរបស់ក្រុមហ៊ុន Grand Park ដោយអភិវឌ្ឍផ្ទះសរុបចំនួន ២០០ ខ្នង ស្ថិតនៅរាជធានីភ្នំពេញ ។

ដោយឡែក មានគម្រោងថ្មីចំនួន ២ ទៀត ដែលបានស្នើសុំអភិវឌ្ឍន៍លំនៅឋានតម្លៃសមរម្យរួមមាន ក្រុមហ៊ុនឃុន សៀ អ៊ីមផត អិចផត ដោយទទួលបានគោលការណ៍អនុញ្ញាតវិនិយោគលើផ្ទៃដី ៩១ ៦០៧ហិកតា ជាប្រភេទលំនៅឋានតម្លៃក្រោម ៣ ម៉ឺនដុល្លារ ហើយគ្រោងនឹងសាងសង់ផ្ទះសរុបចំនួន ៦២ ២៩៦ ខ្នង ដែលមានទីតាំងស្ថិតនៅក្រុងអរិយក្សត្រ ខេត្តកណ្ដាល។ គម្រោងមួយទៀតដែលបានស្នើសុំអភិវឌ្ឍលំនៅឋានតម្លៃសមរម្យដែរនោះ គឺក្រុមហ៊ុន ឡេង យី បានស្នើសុំសាងសង់លំនៅឋានសរុបចំនួន ៥០០ ខ្នង ដែលមានទីតាំងស្ថិតនៅខណ្ឌព្រែកព្នៅ រាជធានីភ្នំពេញ។

ឯកឧត្តមសាយ សំអាល់ ឧបនាយករដ្ឋមន្ត្រី និងជារដ្ឋមន្ត្រី ក្រសួងរៀបចំដែនដី នគរូបនីយកម្មនិងសំណង់ ក៏បានលើកឡើងពីការអភិវឌ្ឍលំនៅឋានតម្លៃសមរម្យនៅក្នុងប្រទេសកម្ពុជា ដោយជំរុញ និងលើកទឹកចិត្តដល់អ្នកវិនិយោគ អ្នកអភិវឌ្ឍន៍គួរផ្ដោតលើការអភិវឌ្ឍលំនៅឋានតម្លៃសមរម្យ ខណៈតម្រូវការលើលំនៅឋានប្រភេទនេះនៅតែមានខ្ពស់។

ទាក់ទិននឹងការអភិវឌ្ឍលំនៅឋានតម្លៃសមរម្យនេះដែរ អ្នកស្រី អាន សុធីតា នាយិកាប្រតិបត្តិក្រុមហ៊ុន PropNex Cambodia បានមានប្រសាសន៍ថា តម្រូវការលំនៅឋាននៅក្នុងប្រទេសកម្ពុជានៅតែមាន ជាពិសេសទីផ្សារលំនៅឋានតម្លៃសរម្យ ដូច្នេះសម្រាប់ឆ្នាំ ២០២៦ នេះ អ្នកអភិវឌ្ឍន៍លំនៅឋាន គួរតែផ្ដោតលើលំនៅឋានតម្លៃសមរម្យ និងមធ្យម មិនថាជាប្រភេទបុរី ឬខុនដូ៕

លោក អ៊ិច ណែត | Mr. Ich Neth

ជីវប្រវត្តិ: បានបញ្ចប់ការសិក្សាផ្នែកទំនាក់ទំនងសង្គម និងសារព័ត៌មាននៃសាលាបច្ចេកទេសដុនបូស្កូ ខេត្តព្រះសីហនុ និងមានបទពិសោធន៍ក្នុងវិស័យសារព័ត៌មាន១៣ឆ្នាំ ។ បច្ចុប្បន្នជាអ្នកយកព័ត៌មានសេដ្ឋកិច្ច និងអចលនទ្រព្យ ឱ្យសារព័ត៌មាន AMS Economy ។

អ្នកអភិវឌ្ឍន៍លំនៅឋាន​តម្លៃសមរម្យនៅកម្ពុជា នឹងទទួលបានការលើកទឹកចិត្តខ្ពស់​ពីរាជរដ្ឋាភិបាល​

លោក អ៊ិច ណែត | Mr. Ich Neth

អ្នកអភិវឌ្ឍន៍លំនៅឋានតម្លៃសមរម្យនៅកម្ពុជា នឹងទទួលបានការលើកទឹកចិត្តខ្ពស់ពីរាជរដ្ឋាភិបាល