ការិយាល័យស្រាវជ្រាវម៉ាក្រូសេដ្ឋកិច្ចអាស៊ាន AMRO ព្យាករថា សេដ្ឋកិច្ចកម្ពុជា អាចនឹងសម្រេចបានក្នុងរង្វង់ ៤,៩ ភាគរយ ជាមួយនឹងអតិផរណា បានកើនឡើងក្នុងអត្រា ២,៩ ភាគរយ សម្រាប់ឆ្នាំ ២០២៦ នេះ។

លោកស្រីបណ្ឌិត ព្រុំ ទេវី អ្នកជំនាញវិទ្យាសាស្រ្តសេដ្ឋកិច្ច យល់ឃើញថា ការព្យាករណ៍​នេះ​បង្ហាញថា កម្រិតអតិផរ​ណានៅកម្ពុជា​មានកម្រិតខ្ពស់។

លោកស្រីបណ្ឌិត បានថ្លែងថា៖

“អតិផរណានេះរៀងខ្ពស់បន្តិចហើយ។ តាមធម្មតាត្រឹមតែ ២,៥ ឬ ២,៥ ភាគរយ ហ្នឹងជារឿងធម្មតា។ ២,៩ភាគរយហ្នឹងគឺខ្ពស់បន្តិចហើយ។”

អ្នកជំនាញសេដ្ឋកិច្ចរូបនេះ រំពឹងថាកំណើនសេដ្ឋកិច្ចកម្ពុជា អាចនឹងកើនលើសពី ៤,៩ ភាគរយ ហើយអត្រាអតិផរណាអាចនឹងថយចុះ ក្រោយបញ្ហាភូមិសាស្ត្រនយោបាយ ដែលទាក់ទងនឹងជម្លោះមជ្ឈិមបូព៌ា និងការរំខានការផ្គត់ផ្គង់ថាមពលពិភពលោកបានបញ្ចប់។

យោងតាមរបាយការណ៍ AMRO ដែលចេញផ្សាយនៅថ្ងៃចន្ទ ទី​ ៦ ខែមេសានេះ កម្រិតអតិផរណារបស់​កម្ពុជា​នឹងធ្លាក់មកត្រឹម ២,៥ ភាគរយវិញ នៅឆ្នាំ ២០២៧។

ស្ថាប័នស្រាវជ្រាវសេដ្ឋកិច្ចអាស៊ានដដែល​បង្ហាញថា ប្រទេសមីយ៉ាន់ម៉ា មានអត្រាអតិផរណាខ្ពស់ជាងគេបង្អស់ក្នុងចំណោមបណ្ដាប្រទេសទាំងអស់នៅអាស៊ាន គឺរហូតដល់ ៣៤ ភាគរយ។ បន្ទាប់មកគឺ ប្រទេសឡាវ មានអត្រាអតិផរណា ៧,៨ ភាគរយ។ រីឯ ហ្វីលីពីន មានអត្រាអតិផរណា ៣,៩ ភាគរយ និងវៀតណាម មានអត្រាអតិផរណា ៣,៨ ភាគរយ។

ចំណែក ឥណ្ឌូនេស៊ី មានអតិផរណា ២,៨ ភាគរយ, ម៉ាឡេស៊ី មានអតិផរណា ២ ភាគរយ, សិង្ហបុរី មានអតិផរណា ១,៨ ភាគរយ, ថៃ មានអតិផរណា ១,១ ភាគរយ និងព្រុយណេ មានអតិផរណា ០,៨ ភាគរយ។

បើតាមការព្យាកររបស់ AMRO កំណើនអតិផរណារបស់បណ្ដាប្រទេសក្នុងអាស៊ានសុទ្ធតែរងសម្ពាធ​ពីហានិភ័យភូមិសាស្ត្រនយោបាយ ដែលទាក់ទងនឹងជម្លោះមជ្ឈិមបូព៌ា និងការរំខានការផ្គត់ផ្គង់ថាមពលពិភពលោក។

យ៉ាងណាក៏ដោយ បើយោងតាមរបាយការណ៍​ចុង​ក្រោយ​របស់​ធនាគារ​ជាតិ​នៃ​កម្ពុជា សេដ្ឋកិច្ច​កម្ពុជា អាចនឹង​សម្រេច​បាន​ក្នុង រង្វង់ ៥ ភាគរយ និង​អត្រា​អតិផរណាត្រឹម ២,៣ ភាគរយ ប៉ុណ្ណោះ សម្រាប់ឆ្នាំ ២០២៦ នេះ៕

អត្ថបទ៖ ខន ណារី AMS