ការដោះដូរពាណិជ្ជកម្មកម្ពុជា ជាមួយ ឥណ្ឌូនេស៊ី សិង្ហបុរី និងម៉ាឡេស៊ី កើនឡើងខ្លាំង ក្រោយបិទព្រំដែនកម្ពុជា-ថៃ

ភ្នំពេញ៖ ការដោះដូរទំនិញរវាងកម្ពុជា-ឥណ្ឌូនេស៊ី សម្រេចបាននូវទំហំទឹកប្រាក់ជាង ៥៥១ លានដុល្លារ នៅក្នុងរយៈពេល ៥ ខែ ២០២៦ កើនឡើង ១៧,៤ ភាគរយ ធៀបនឹងរយៈពេលដូចគ្នា កាលពីឆ្នាំមុន ក្នុងនោះកម្ពុជានាំចេញទៅឥណ្ឌូនេស៊ីមានតម្លៃ ៤៧ លានដុល្លារ កើន ៤៣,៤ ភាគរយ ចំណែកឥណ្ឌូនេស៊ីនាំចូលមកវិញមានតម្លៃ ៥០៣ លានដុល្លារ កើន ១៥,៥ ភាគរយ។

ផលិតផលនាំចេញទៅឥណ្ឌូនេស៊ីមាន ផលិតផលកសិកម្ម អាហារកែច្នៃ សម្លៀកបំពាក់ និងទំនិញផ្សេងទៀតដែលជាវិស័យដើរតួនាទីសំខាន់ក្នុងការអនុវត្តពាណិជ្ជកម្មខាងក្រៅរបស់កម្ពុជា។ឥណ្ឌូនេស៊ីនាំចូលមកវិញមានផលិតផល ប្រេងឥន្ធនៈគ្រឿងចក្រ ម្ហូបអាហារ សម្ភារៈសំណង់និងទំនិញប្រើប្រាស់។ នេះបើយោងតាមរបាយការណ៍របស់អគ្គនាយករដ្ឋានគយ និងរដ្ឋាករកម្ពុជា (GDCE)។

ចំណែកការដោះដូរទំនិញរវាងកម្ពុជា-សិង្ហបុរី សម្រេចបាននូវទំហំទឹកប្រាក់ជាង១ពាន់លានដុល្លារ នៅក្នុងរយៈពេល ៥ ខែ ២០២៦ កើនឡើង ២៤២ ភាគរយ ធៀបនឹងរយៈពេលដូចគ្នាឆ្នាំ២០២៥ ក្នុងនោះកម្ពុជានាំចេញមានតម្លៃ ៣២ លានដុល្លារ កើនជាង ៣១ ភាគរយ ចំណែកសិង្ហបុរី នាំចូលមកវិញមានតម្លៃ ប្រមាណ ១ ពាន់លានដុល្លារកើនជាង ២៦០ ភាគរយ។ ចំណែកការដោះដូរទំនិញរវាងកម្ពុជា-ម៉ាឡេស៊ីមានតម្លៃ ៦៥៩ លានដុល្លារ ក្នុងនោះកម្ពុជានាំចេញ ៨៧ លានដុល្លារកើន ៥២ ភាគរយ ម៉ាឡេស៊ីនាំចូល ៥៧១ លានដុល្លារកើន៥៣.៨ ភាគរយ។

លោកបណ្ឌិត ហុង វណ្ណៈ អ្នកជំនាញផ្នែកសេដ្ឋកិច្ចនៅរាជ្យបណ្ឌិត្យសភាកម្ពុជាបានប្រាប់ AMS Economy ថា៖ ដោយសារមានតម្រូវការកើនឡើង ជំរុញឱ្យមានការបង្កើនការនាំចេញ ឬក៏បង្កើតចរន្តឱ្យមានការទិញ-លក់ ដើម្បីបំពេញតម្រូវការឱ្យអ្នកប្រើប្រាស់។ លោកបណ្ឌិតបន្ថែមថា តម្រូវការកើនឡើង កើតចេញពីភាពត្រូវរ៉ូវគ្នា រវាងរដ្ឋ និងរដ្ឋ ដែលកើតចេញពីគោលនយោបាយការបរទេស និងទំនាក់ទំនងទ្វេភាគីជាមួលដ្ឋាន។

ទាក់ទងនឹងទំហំពាណិជ្ជកម្មរវាងកម្ពុជានិងប្រទេសម៉ាឡេស៊ី ដែលជាដៃគូពាណិជ្ជកម្មធំជាងគេទី៧ របស់កម្ពុជា បន្ទាប់ពីប្រទេសចិន សហរដ្ឋអាមេរិក វៀតណាម ថៃ ជប៉ុន និងសិង្ហបុរី លោកបណ្ឌិត ជ័យ តិច អ្នកតាមដានភូមិសាស្ត្រនយោបាយ និងសេដ្ឋកិច្ច មានប្រសាសន៍ថា កម្ពុជាបានបង្វែរមកទិញទំនិញមួយចំនួនពីប្រទេសម៉ាឡេស៊ី បន្ទាប់ពីមានបញ្ហាព្រំដែនជាមួយថៃជាមួយនឹងការធ្វើពហិកាទំនិញថៃពីប្រជាជនកម្ពុជា។

លោក ញ៉ិល រដ្ឋា អ្នកជំនាញភូមិសាស្ត្រនយោបាយ និងសេដ្ឋកិច្ច បានប្រាប់ AMS Economy ថា៖វិបត្តិព្រំដែនកម្ពុជា-ថៃ បានបង្ខំឱ្យកម្ពុជាផ្លាស់ប្តូរប្រភពនាំចូលថាមពល និងទំនិញប្រើប្រាស់មកពី សិង្ហបុរី និងម៉ាឡេស៊ី វិញ ដែលបណ្តាលឱ្យកំណើននាំចូលពីប្រទេសទាំងពីរនេះកើនដល់ទៅ ៥២.១ ភាគរយ (ម៉ាឡេស៊ី) និងជាង ២០០ ភាគរយ (សិង្ហបុរី)។ នេះឆ្លុះបញ្ចាំងពីភាពផុយស្រួយនៃការពឹងផ្អែកលើច្រករបៀងគោកតែមួយ និងតម្រូវការបន្ទាន់ក្នុងការធ្វើពិពិធកម្មប្រភពផ្គត់ផ្គង់។

លោក ឌុច ដារិន្ទ អ្នកវិភាគសេដ្ឋកិច្ច បានប្រាប់ AMS Economy ថា ការកើនឡើងនៃការនាំចូលពីសិង្ហបុរី ម៉ាឡេស៊ី និងឥណ្ឌូនេស៊ីនៅក្នុងរយៈពេល ៥ ខែដំបូងឆ្នាំនេះ គឺឆ្លុះបញ្ចាំងពីសកម្មភាពសេដ្ឋកិច្ចការវិនិយោគនិងការផលិតសម្រាប់នាំចេញដែលកំពុងមានសន្ទុះនៅកម្ពុជា។

លោកបានថ្លែងបន្តថា ជាក់ស្តែង កម្ពុជាទទួលបានគម្រោងវិនិយោគផ្ទាល់ពីបរទេសកើនឡើង និងការនាំចេញក៏បន្តកើនឡើងផងដែរ ដែលធ្វើឱ្យតម្រូវការនាំចូលវត្ថុធាតុដើម គ្រឿងម៉ាស៊ីន បរិក្ខារផលិតកម្ម និងប្រេងឥន្ធនៈកើនឡើងតាម។ ជាពិសេស សិង្ហបុរីគឺជាមជ្ឈមណ្ឌលពាណិជ្ជកម្ម និងចែកចាយទំនិញដ៏សំខាន់ក្នុងតំបន់ ដូច្នេះការកើនឡើងនៃការនាំចូលពីសិង្ហបុរី អាចពាក់ព័ន្ធនឹងប្រេងឥន្ធនៈ និងទំនិញមូលធនផ្សេងៗ។ រីឯម៉ាឡេស៊ីនិងឥណ្ឌូនេស៊ីក៏ជាប្រភពសំខាន់នៃវត្ថុធាតុដើម និងសម្ភារៈបម្រើដល់វិស័យឧស្សាហកម្ម។

ទំហំពាណិជ្ជកម្មកម្ពុជា រយៈពេល ៥ ខែឆ្នាំ២០២៦ មានទំហំទឹកប្រាក់ ៣០,០៨ ពាន់លានដុល្លារអាម៉េរិក កើនឡើង ១៩ ភាគរយ បើធៀបនឹងរយៈពេលដូចគ្នាឆ្នាំ២០២៥។ ការនាំចេញទំនិញកម្ពុជា មានទឹកប្រាក់ ១៤,០៤ ពាន់លានដុល្លារអាម៉េរិក និងទំនិញនាំចូលមានទឹកប្រាក់ ១៦,០៤ ពាន់លានដុល្លារអាម៉េរិក ក្នុងនោះប្រទេសជាដៃគូពាណិជ្ជកម្មសំខាន់ជាងគេរួមមាន ចិន អាម៉េរិក វៀតណាម និង ជប៉ុន ខណៈជញ្ជីងពាណិជ្ជកម្មកម្ពុជា មានអតុល្យភាពជិត ១,៩៩ ពាន់លានដុល្លារអាម៉េរិក។ នេះបើយោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា។

ឯកឧត្តម ប៉ែន សុវិជាតិ អ្នកនាំពាក្យក្រសួងពាណិជ្ជកម្ម មានប្រសាសន៍ថា ទំហំពាណិជ្ជកម្មកម្ពុជាមានកំណើន ឆ្លុះបញ្ចាំងថា កម្ពុជានៅរក្សាបានទីផ្សារសំខាន់ៗរបស់ខ្លួន ដែលជាទីផ្សារពិភពលោក ធានានូវការផ្គត់ផ្គង់ បង្កើតសក្ដានុភាពកម្ពុជា ក្នុងខ្សែច្រវាក់តម្លៃ និងខ្សែច្រវាក់ផ្គត់ផ្គង់ និងរក្សាបាននូវជំនឿចិត្តពីអ្នកបញ្ជាទិញ៕

លោក ញ៉ែម សុផល | Mr. NHEM SOPHAL

ជីវប្រវត្តិ: លោក ញ៉ែម សុផល ចាប់ផ្តើមអាជីពសារព័ត៌មាននៅឆ្នាំ១៩៩៣និងធ្លាប់មានបទពិសោធន៍ជិត៣០ឆ្នាំក្នុងវិស័យសារព័ត៌មាន ផ្នែកសេដ្ឋកិច្ច ពាណិជ្ជកម្ម អប់រំ វប្បធម៌ សង្គម និង បកប្រែភាសាអង់គ្លេស ។ ធ្លាប់បម្រើការក្នុងស្ថាប័នសារព័ត៌មានធំៗជាច្រើន ដូចជា ស្ថានីយទូរទស្សន៍ កាសែត ទស្សនាវដ្តី និងគេហទំព័រ ដោយទទួលបានការបណ្តុះបណ្តាលវិជ្ជាជីវៈទាំងនៅក្នុងស្រុកនិងក្រៅប្រទេស។ លោកបានបញ្ចប់ការសិក្សាថ្នាក់បរិញ្ញាបត្រជំនាញភាសាអង់គ្លេស។បច្ចុប្បន្នជាអ្នកយកព័ត៌មានជាន់ខ្ពស់ផ្នែកសេដ្ឋកិច្ចនិងផ្សព្វផ្សាយនៅ AMS Economy ៕