តម្រូវការកម្លាំងពលកម្មជំនាញនៅកម្ពុជាកើនឡើងជាលំដាប់ ស្របនឹងកំណើនវិនិយោគថ្មីៗចូលមកជាបន្តបន្ទាប់

ភ្នំពេញ ៖ ក្នុងរយៈពេលប៉ុន្មានឆ្នាំចុងក្រោយនេះ កំណើននៃការវិនិយោគនៅក្នុងប្រទេសកម្ពុជាទាំងការវិនិយោគមកពីបរទេស និងការវិនិយោគពីសំណាក់វិនិយោគិនក្នុងស្រុក បានកើនឡើងជាលំដាប់ ។ តាមរយៈកំណើននៃការវិនិយោគទាំងនេះដែរ បានធ្វើឱ្យតម្រូវការកម្លាំងពលកម្មជំនាញនៅកម្ពុជាកើនឡើងជាបន្តបន្ទាប់ដែរ ស្របគ្នានឹងពលករកម្ពុជាវិលត្រលប់មកពីប្រទេសថៃក៏កាន់តែច្រើន ។

ថ្លែងក្នុងវេទិកាវិនិយោគកម្ពុជាឆ្នាំ២០២៦ នៅព្រឹកថ្ងៃទី០៧ ឧសភា ២០២៦ ឯកឧត្តម ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានមានប្រសាសន៍ថា ការវិនិយោគថ្មីៗមកកាន់ប្រទេសកម្ពុជាមានកំណើនជាលំដាប់ ដូច្នេះតម្រូវការកម្លាំងពលកម្ម ទាំងជំនាញ និងមិនជំនាញ ក៏មានការកើនឡើងស្របគ្នាដែរ ។ ការវិលត្រលប់របស់ពលករកម្ពុជាមកពីប្រទេសថៃ ចូលមកប្រទេសកម្ពុជាវិញនាពេលនេះ ពោលគឺក្នុងពេលកម្ពុជាកំពុងមានតម្រូវការកម្លាំងពលកម្មស្រាប់ គឺជាឱកាសល្អទាំងពលករ និងវិនិយោគិន ។ ឯកឧត្តមបញ្ជាក់ថា ៖

« ការធ្វើមាតុភូមិនិវត្តន៍របស់ពលករកម្ពុជាមកពីថៃ ក្នុងពេលកំណើនវិនិយោគថ្មីៗកើនឡើងជាលំដាប់នេះ បានបំពេញនូវតម្រូវការកម្លាំងពលកម្មដល់សហគ្រាសដែលខ្វះបានមួយផ្នែកធំ » ។

ឯកឧត្តមបន្តថា កន្លងមកឯកឧត្តមមានក្ដីព្រួយបារម្ភខ្លាចខ្វះខាតកម្លាំងពលកម្មនៅពេលមានកំណើនវិនិយោគិនចូលមកវិនិយោគនៅកម្ពុជាកាន់តែច្រើន ប៉ុន្តែនៅពេលមានជម្លោះព្រំដែនជាមួយប្រទេសថៃ ធ្វើឱ្យពលករកម្ពុជាត្រលប់មកពីប្រទេសថៃច្រើន ដែលនាំកម្លាំងពលកម្មក្នុងស្រុកលែងខ្វះខាតទៀត ។ ចំណែកក្រសួងការងារ និងបណ្ដុះបណ្ដាលវិជ្ជាជីវៈ ក៏បានបំពេញភារៈកិច្ចរបស់ខ្លួនបានយ៉ាងល្អឥតខ្ចោះ ជាក់ស្ដែងក្រសួងបានរៀបចំចាំទទួលពលករត្រលប់មកពីប្រទេសថៃ នៅមាត់ច្រកព្រំដែនតែម្ដង និងបាននាំយកឱកាសការងារល្អៗ ដល់ពលករ សម្ភាសន៍នៅនឹងកន្លែង ក្នុងនោះមានពលករខ្លះទទួលបានការងារភ្លាមៗ បន្ទាប់ពីចូលមកកម្ពុជា ដោយមិនទាន់ទាំងបានដល់ផ្ទះផង ហើយពលករខ្លះទៀត រង់ចាំដល់ផ្ទះសិនទើបស្វែងរកការងារធ្វើ ។

ឯកឧត្តមបន្ថែមថា ៖

«កម្ពុជានៅតែបន្តទាក់ទាញវិនិយោគិនបរទេសចូលមកបណ្ដាក់ទុនវិនិយោគនៅកម្ពុជា តាមរយៈការលើកចិត្តពិសេសដល់វិនិយោគិន ដូច្នេះវិនិយោគិនគួរតែចាប់ឱកាសនេះ ក្នុងការបណ្ដាក់ទុនវិនិយោគដើម្បីទទួលបានប្រាក់ចំណេញ និងទាន់ឱកាសមានការលើកទឹកចិត្តពិសេសពីរាជរដ្ឋាភិបាល»។

លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានថ្លែងប្រាប់បណ្ដាញព័ត៌មាន AMS ឱ្យដឹងថា មកដល់ពេលនេះ ពលករកម្ពុជាត្រលប់មកពីប្រទេសថៃ សរុបជាង ៦៥ម៉ឺននាក់ហើយទទួលបានការងារធ្វើ ក្នុងចំណោមពលករសរុបត្រលប់មកវិញប្រមាណ១លាននាក់ ។ ក្នុងចំណោមពលករមកពីថៃជាង៦៥ម៉ឺននាក់ដែលទទួលបានការងារធ្វើក្នុងស្រុកនេះ បានបង្ហាញពីការផ្ដល់កម្លាំងពលកម្មដល់សហគ្រាសនានាទូទាំងប្រទេស និងបានរួមចំណែកបម្រើដល់ខ្សែច្រវាក់ផលិតកម្មនៅកម្ពុជា ។

លោកបន្តថា ឆ្លើយតបទៅនឹងកំណើននៃការវិនិយោគថ្មីៗនៅក្នុងប្រទេសកម្ពុជា ក្រសួងការងារដែលជាសេនាធិការរបស់រាជរដ្ឋាភិបាល បានត្រៀមខ្លួនរួចជាស្រេច ក្នុងការផ្ដល់ជំនាញជូនបងប្អូនកម្ពុជា ទាំងអតីតពលករមកពីប្រទេសថៃ និងយុវជននៅក្នុងស្រុក ដែលពិសេសនោះគឺយុវជនក្រីក្រ និងងាយរងហានិភ័យ តាមរយៈការបណ្ដុះបណ្ដាលជំនាញ ជាពិសេសកម្មវិធី TVET 1.5លាននាក់ ដែលមកដល់ពេលនេះ បានបណ្ដុះបណ្ដាលយុវជនសរុបជាង២៧ម៉ឺននាក់ និងកំពុងត្រៀមខ្លួនបណ្ដុះបណ្ដាលជំនាញបន្ថែមដល់យុវជនកម្ពុជាឱ្យមានជំនាញ ដើម្បីឆ្លើយតបនឹងទីផ្សារការងារនៅពេលបច្ចុប្បន្ននិងអនាគត ។

គួររម្លឹកថា ក្នុងឆ្នាំ២០២៥កន្លងទៅនេះ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងចំនួន ៦៣០គម្រោងជាមួយនឹងទុនវិនិយោគចំនួន ១០ពាន់លានដុល្លារអាម៉េរិក ។ គម្រោងវិនិយោគទាំងនេះ នឹងត្រូវការកម្លាំងពលកម្ម ឬបង្កើតជាឱកាសការងារសរុបចំនួនជិត៤៤ម៉ឺននាក់ ។ ដោយឡែកក្នុងរយៈពេល១ត្រីមាសឆ្នាំ២០២៦នេះ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងវិនិយោគសរុបចំនួន១៤៦គម្រោងជាមួយនឹងទុនវិនិយោគចំនួន២,៥ពាន់លានដុល្លារ ដែលនឹងត្រូវការកម្លាំងពលកម្មចំនួន៨ម៉ឺន២ពាន់នាក់ ៕

លោក អ៊ិច ណែត | Mr. Ich Neth

ជីវប្រវត្តិ: បានបញ្ចប់ការសិក្សាផ្នែកទំនាក់ទំនងសង្គម និងសារព័ត៌មាននៃសាលាបច្ចេកទេសដុនបូស្កូ ខេត្តព្រះសីហនុ និងមានបទពិសោធន៍ក្នុងវិស័យសារព័ត៌មាន១៣ឆ្នាំ ។ បច្ចុប្បន្នជាអ្នកយកព័ត៌មានសេដ្ឋកិច្ច និងអចលនទ្រព្យ ឱ្យសារព័ត៌មាន AMS Economy ។