ភ្នំពេញ ៖ ក្នុងរយៈពេលប៉ុន្មានឆ្នាំមកនេះ និន្នាការនៃការទិញសម្ភារៈដោយបង់រំលស់ ជាពិសេស រថយន្ត និងម៉ូតូ នៅកម្ពុជា ហាក់មានសកម្មភាពផុសផុល ដែលធ្វើឱ្យពលរដ្ឋមានប្រាក់ចំណូលទាប និងមធ្យម មានឱកាសក្នុងការទិញសម្ភារៈទាំងនោះយកមកប្រើប្រាស់ ។ ទន្ទឹមនឹងនោះដែរ ក៏មានពលរដ្ឋជាច្រើនត្រូវបានក្រុមហ៊ុនបង់រំលសដកហូតយកសម្ភារៈប្រើប្រាស់មកវិញដោយសារខ្វះលទ្ធភាពក្នុងការបង់សង់ត្រឡប់បន្ត ខណៈដែលអ្នកជំនាញហិរញ្ញវត្ថុបានក្រើនរំលឹកដល់ពលរដ្ឋដែលមានបំណងចង់ទិញដោយវិធីរំលស់នេះ គប្បីប្រុងប្រយ័ត្ន និងពិចារណាឱ្យបានច្បាស់ទៅលើលទ្ធភាពដែលខ្លួនមាន។
លោក ង៉ែត ជូ អ្នកជំនាញហិរញ្ញវត្ថុកម្ពុជា បានមានប្រសាសន៍ប្រាប់សារព័ត៌មាន AMS Economy ឱ្យដឹងថា កម្ចីសម្រាប់ម៉ូតូ និងរថយន្ត គឺជាការចំណាយដែលមានចរឹតជា Lifestyle មិនមែនជាការខ្ចីសម្រាប់បង្កើនទ្រព្យនោះទេ ដូច្នេះ សម្រាប់ពលរដ្ឋដែលមានចំណូលមិនឋិតថេរ ឬមិនមានប្រាក់សល់ពីការចំណាយប្រចាំថ្ងៃនោះទេ មិនគួរប្រើប្រាស់កម្ចីសម្រាប់ទិញសម្ភារៈដោយបង់រំលស់នោះទេ ជាពិសេសអ្នកដែលមានប្រភពចំណូលតែមួយគួរតែជៀសវាង ព្រោះអ្នកដែលមានចំណូលតែមួយ នៅពេលស្ថានភាពសេដ្ឋកិច្ចធ្លាក់ចុះ ឬការងារបាត់បង់ នឹងធ្វើឱ្យបាត់បង់ប្រាក់ចំណូលទាំងស្រុង និងមិនមានលទ្ធភាពសងត្រលប់ទៅកាន់ក្រុមហ៊ុនកម្ចី ឬធនាគារផ្ដល់សម្រាប់ទិញសម្ភារៈនោះទេ ។
អ្នកជំនាញរូបនេះបញ្ជាក់ថា ៖
« ទាក់ទងនឹងកម្ចីនេះ បើសិនជាអាចគួរតែកុំខ្ចីតែម្ដងក្នុងស្ថានភាពសេដ្ឋកិច្ចដូចបច្ចុប្បន្ននេះ ហើយចាំសន្សំប្រាក់បានចាំទិញ ឬក៏យ៉ាងហោចណាស់ អាចសន្សំបាន៥០ភាគរយនៃតម្លៃសម្ភារៈ ចាំទិញ ដើម្បីឱ្យចំនួនកម្ចីនោះកាន់តែតិច ដែលមិនធ្វើឱ្យមានហានិភ័យនៃការសងត្រលប់ ។ សម្រាប់អ្នកដែលមានតម្រូវការប្រើប្រាស់សម្ភារៈជាចាំបាច់ដោយជៀសមិនបានសម្រាប់មុខរបរ ឬក៏ការងាររកចំណូលប្រចាំថ្ងៃ ប៉ុន្តែមិនមានលទ្ធភាព អាចស្វែងរកម៉ូតូ ឬរថយន្តណាដែលមានតម្លៃទាប មិនចាំបាច់ទិញរបស់ដែលមានតម្លៃខ្ពស់នោះទេ»។
លោកបណ្ឌិត ហុង វណ្ណៈ អ្នកស្រាវជ្រាវសេដ្ឋកិច្ចនៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា បានលើកឡើងថា សម្រាប់ការទិញរថយន្ត ម៉ូតូ ឬសម្ភារៈ ដោយបង់រំលស់មិនមែនជារឿងថ្មីសម្រាប់កម្ពុជានោះទេ ។ នៅលើពិភពលោក និងនៅបណ្ដាប្រទេសរីកចម្រើនគេនៅបន្តប្រើប្រាស់មធ្យោបាយនេះ ដើម្បីទិញសម្ភារៈនៅឡើយ។
លោកបណ្ឌិតបន្តថា នៅពេលមានករណីក្រុមហ៊ុន ឬម្ចាស់បំណុលរឹបអូសយកទ្រព្យសម្បត្តិពីអតិថិជនមកទិញ ដោយសារតែមិនមានលទ្ធភាពសង មនុស្សមួយចំនួនគិតថា ម្ចាស់ទ្រព្យជាអ្នករងគ្រោះទៅវិញ ប៉ុន្តែអ្នកដែលរងគ្រោះពិតប្រាកដគឺក្រុមហ៊ុន ធនាគារ ឬម្ចាស់បំណុលនោះទេដែលជាអ្នករងគ្រោះ ដោយសារតែ មុននឹងផ្ដល់កម្ចីសម្រាប់ទិញសម្ភារៈទាំងនោះ គឺបានព្រមព្រៀងគ្នាថានឹងសងត្រលប់ប្រចាំខែក្នុងរយៈពេលណាមួយ ហើយនៅពេលមិនមានលទ្ធភាពសងគឺខុសនឹងកិច្ចសន្យាដែលអាចឱ្យម្ចាស់បំណុលអនុវត្តតាមកិច្ចសន្យាបាន ។
លោកបណ្ឌិត ហុង វណ្ណៈ បានផ្ដល់ជាយោបល់ថា ៖
«មុនពេលដែលសម្រេចចិត្តទិញរថយន្ត ម៉ូតូ ឬសម្ភារៈមកប្រើប្រាស់ដោយបង់រំលស់ ត្រូវគិតពីប្រាក់ចំណូលរបស់យើង ថាតើអាចមានស្ថិរភាពរយៈពេលណាមួយ និងត្រូវប្រាកដថា ប្រាក់ចំណូល ឬការងារអាចរ៉ាប់រងការចំណាយប្រចាំថ្ងៃបាន រួមជាមួយនឹងការបង់រំលស់ទៅធនាគារ ឬក្រុមហ៊ុនវិញបាន ទើបមិនមានហានិភ័យកើតឡើង»។
យោងតាមរបាយការណ៍របស់ក្រុមហ៊ុន ស៊ីប៊ីស៊ី បានបង្ហាញថា គិតត្រឹមដំណាច់ឆ្នាំ២០២៥ ឥណទានសម្រាប់លក់រាយ ( Retail Loan ) ក្នុងប្រព័ន្ធធនាគារមានរហូតដល់ ២,៥លានគណនី ក្នុងនោះចំនួនអ្នកខ្ចីសម្រាប់ប្រើប្រាស់ផ្ទាល់ខ្លួន ដែលរួមមានការទិញរថយន្ត ម៉ូតូ ផងដែរនោះមានច្រើនជាងគេ រហូតដល់ ៨៤,២៤ភាគរយ ។ ចំណែកទឹកប្រាក់ដែលផ្ដល់ជូនអតិថិជនតាមរយៈឥណទានលក់រាយនេះ Retail Loan នេះមានចំនួន ១៦,៣៩ពាន់លានដុល្លារអាមេរិក ក្នុងនោះកម្ចីសម្រាប់ប្រើប្រាស់ផ្ទាល់ខ្លួនមានរហូតដល់ ៤៩,៦៤ភាគរយ ដែលមានន័យថាទាំងចំនួនអ្នកខ្ចី និងចំនួនឥណទានសម្រាប់ប្រើប្រាស់ផ្ទាល់ខ្លួនមានចំនួនច្រើន ៕
