ទឹកដោះគោស្រស់ពីម៉ាឡេស៊ី កំពុងទាញយកចំណែកទីផ្សារនៅកម្ពុជា

ក្រុមហ៊ុនផលិតទឹកដោះគោស្រស់របស់ប្រទេសម៉ាឡេស៊ី បាននិងកំពុងទាញយកចំណែកទីផ្សារនៅកម្ពុជា និងគ្រោងពង្រីកវត្តមានបន្ថែមនៅប្រទេសមួយនេះ ដែលកំពុងងាកចេញពីការប្រើប្រាស់ផលិតផលពីប្រទេសថៃ ដោយសារជម្លោះព្រំដែនកម្ពុជា-ថៃ។

ការចុះផ្សាយរបស់សារព័ត៌មាន Theedgemalaysia បានឱ្យដឹងថា ចាប់តាំងពីខែសីហា ឆ្នាំ២០២៥ ការនាំចេញទឹកដោះគោប្រចាំខែរបស់ក្រុមហ៊ុនម៉ាឡេស៊ីចូលមកកម្ពុជា បានកើនឡើងគួរឱ្យកត់សម្គាល់។ កំណើននៃការនាំចេញទឹកដោះគោចូលទីផ្សារកម្ពុជា បានធ្វើឱ្យប្រាក់ចំណេញសុទ្ធរបស់ក្រុមហ៊ុន Farm Fresh របស់ប្រទេសម៉ាឡេស៊ី បានកើនឡើងជិត ២៥ ភាគរយ នៅត្រីមាសទី ៣ ឆ្នាំ ២០២៥។

ថ្នាក់ដឹកនាំក្រុមហ៊ុន Farm Fresh បានបញ្ជាក់ថា ការជំរុញយុទ្ធសាស្ត្ររបស់ក្រុមហ៊ុននៅក្នុងប្រទេសកម្ពុជា បានផ្តល់លទ្ធផលវិជ្ជមាន ដូច្នេះក្រុមហ៊ុននឹងពង្រីកវត្តមានរបស់ខ្លួននៅក្នុងប្រទេសកម្ពុជា តាមរយៈការជ្រៀតចូលហាងពាណិជ្ជកម្មទំនើបធំៗនៅក្នុងទីក្រុងភ្នំពេញ និងទូទាំងប្រទេសកម្ពុជា ពិសេសរោងចក្រផលិតទឹកដោះគោក្នុងប្រទេសកម្ពុជា គ្រោងនឹងចាប់ផ្តើមប្រតិបត្តិការនៅពាក់កណ្តាលឆ្នាំ ២០២៦ នេះ។

លោកបណ្ឌិត ហុង វណ្ណៈ អ្នកជំនាញសេដ្ឋកិច្ច យល់ឃើញថា ការនាំចូលទឹកដោះគោពីប្រទេសម៉ាឡេស៊ី ចូលក្នុងទីផ្សារកម្ពុជា ជំនួសទឹកដោះគោនាំចូលពីថៃ ផ្ដល់ផលវិជ្ជមានសម្រាប់កម្ពុជា ព្រោះជាក់ស្ដែង កម្ពុជាមិនទាន់អាចផ្គត់ផ្គង់ទឹកដោះគោខ្លួនឯងបាន ១០០ ភាគរយ នោះទេ។

ប្រទេសកម្ពុជាត្រូវការទឹកដោះគូស្រស់ជាង ៣៦ លានលីត្រ ក្នុងមួយឆ្នាំ ឬស្មើនឹង ១០ ម៉ឺនលីត្រ ក្នុងមួយថ្ងៃ។ ដោយការផលិតក្នុងស្រុកនៅមានកម្រិត ទឹកដោះគោភាគច្រើន ត្រូវនាំចូលពីក្រៅប្រទេសដូចជាប្រទេស ម៉ាឡេស៊ី វៀតណាម អាមេរិក សិង្ហបុរី អូស្រ្តាលី ឥណ្ឌូនេស៊ី ជប៉ុន បារាំង អង់គ្លេស អាល្លឺម៉ង់ ចិន ដាណឺម៉ាក ប្រទេសថៃ និងកូរ៉េខាងត្បូង ជាដើម។

ប្រទេសថៃ គឺជាអ្នកផ្គត់ផ្គង់ទឹកដោះគោស្រស់ច្រើនជាងគេបំផុតដល់ប្រទេសកម្ពុជា នៅមុនការផ្ទុះសង្គ្រាមតាមបណ្តោយព្រំដែន។ ក៏ប៉ុន្តែបន្ទាប់ពីប្រទេសថៃត្រូវមើលឃើញថា បានដឹកនាំសង្គ្រាមឈ្លានពានលើតំបន់ព្រំដែនរបស់ប្រទេសកម្ពុជា ហើយប្រទេសនេះបានសម្រេចបិទច្រកព្រំដែនគោកជាឯកតោភាគី កម្ពុជាបានសម្រេចចិត្តហាមឃាត់ការនាំចូលទំនិញមួយចំនួនពីប្រទេសគូបដិបក្ខនេះ ពិសេសឧស្ម័ន និងប្រេងឥន្ធនៈ។ ដំណាលគ្នានោះ ប្រជាពលរដ្ឋកម្ពុជាចាប់ផ្តើមធ្វើពហិការទំនិញថៃយ៉ាងផុលផុស រាប់ទាំងការធ្វើពហិការប្រេងសាំងរបស់ប្រទេសថៃ PTT ផងដែរ។

ឯកឧត្តម ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បញ្ជាក់ថា ក្រោយមានការបិទច្រកព្រំដែនគោករវាងកម្ពុជា-ថៃ ការដោះដូរទំនិញរបស់ប្រទេសគូជម្លោះនេះ ស្ទើរតែគ្មានសកម្មភាពទាល់តែសោះ លើកលែងតែប្រភេទទំនិញ ដូចជា គ្រឿងបង្គុំ និងគ្រឿងបន្លាស ជាដើម ដែលនាំចូលតាមផ្លូវទឹក។

ឯកឧត្តម បានថ្លែងថា៖

“នៅមានការធ្វើពាណិជ្ជកម្មជាមួយគ្នាមួយចំនួនតាមផ្លូវទឹក។ ដោយសារមានការធ្វើពហិការមិនប្រើប្រាស់ទំនិញថៃ”។

នៅក្នុងពេលនេះ អ្នកវិនិយោគក្នុងស្រុកកំពុងជំរុញការផលិតទឹកដោះគោស្រស់ក្នុងស្រុក ដើម្បីបំពេញតម្រូវការ និងកាត់បន្ថយការនាំចូលពីក្រៅប្រទេស។

របាយការណ៍ផ្លូវការបង្ហាញថា នៅក្នុងខែមករា ឆ្នាំ២០២៦នេះ កម្ពុជា បាននាំចូលទឹកដោះគោស្រស់ ក្នុងទំហំទឹកប្រាក់ជាង ១០ លានដុល្លារ។

លោក សៅ ណារ៉ុង នាយកប្រតិបត្តិស្ដីទីក្រុមហ៊ុន Khmer Fresh Milk ដែលជាក្រុមហ៊ុនផលិត និងផ្គត់ផ្គង់ទឹកដោះគោក្នុងស្រុកធំមួយ បានឱ្យដឹងថា តម្រូវការទីផ្សារទឹកដោះគោ និងសន្ទុះគាំទ្រទឹកដោះគោក្នុងស្រុកពីប្រជាពលរដ្ឋកម្ពុជា បានហក់ឡើងខ្លាំង ក្រោយមានជម្លោះព្រំដែនរវាងកម្ពុជា-ថៃ។

បច្ចុប្បន្ន កសិដ្ឋានគិរីសួគ៌ មានសមត្ថភាពផលិតទឹកដោះគោស្រស់ចន្លោះពី ១ ម៉ឺន ៣ ពាន់លីត្រទៅ ១ម៉ឺន ៥ ពាន់លីត្រ ក្នុងមួយថ្ងៃ ដែលផ្គត់ផ្គង់បានប្រមាណ ២០ ភាគរយ នៃចំណែកទីផ្សារកម្ពុជា។ បើតាមលោក សៅ ណារ៉ុង នៅដើមឆ្នាំ២០២៧ ក្រុមហ៊ុនមានផែនការបង្កើនផលិតកម្មទឹកដោះគោឱ្យបានលើសពី ៣ ម៉ឺនលីត្រ ក្នុង ១ ថ្ងៃ។

លោក សៅ ណារ៉ុង បានថ្លែងដូច្នេះថា៖

“ក្រោយពីមានជម្លោះទឹកដោះរបស់យើងមានការលក់កើនឡើង ប៉ុន្តែការផ្គត់ផ្គង់នៅមានកម្រិត ដោយសារបរិមាណគោរបស់ក្រុមហ៊ុននៅមានកម្រិត”។

យោងតាមរបាយការណ៍ក្រសួងពាណិជ្ជកម្ម ដែលបានផ្ដល់ឱ្យបណ្តាញព័ត៌មាន AMS ក្នុងឆ្នាំ ២០២៥ កម្ពុជា បាននាំចូលទឹកដោះគោស្រស់គិតជាទឹកប្រាក់ជាង ៥៦ លានដុល្លារ កើនឡើង ១៩ លានដុល្លារ ធៀបនឹងឆ្នាំ ២០២៤៕

អត្ថបទ៖ ខន ណារី

លោក ស៊ុំ ម៉ាណេត | Mr. Sum Manet

ជីវប្រវត្តិ: លោកមានបទពិសោធន៍ជិត ១០ឆ្នាំក្នុងប្រព័ន្ធផ្សព្វផ្សាយ និងកាសែតផ្នែកសេដ្ឋកិច្ច ហិរញ្ញវត្ថុ និងអចលនទ្រព្យ។ បច្ចុប្បន្ន លោកជាប្រធានក្រុមអ្នកព័ត៌មានសេដ្ឋកិច្ច AMS Economy។