រយៈពេល១ឆ្នាំ ខេត្តក្រចេះទទួលបានសំណើសុំវិនិយោគចំនួន១៦គម្រោងដែលមានទុនប្រមាណជាង១ពាន់លានដុល្លារ

ភ្នំពេញ ៖ ក្នុងរយៈពេល១ឆ្នាំ កម្មវិធីជំរុញការវិនិយោគក្នុងខេត្តទាំងបួននៅភូមិភាគឦសាន បានទាក់ទាញគម្រោងវិនិយោគជាច្រើនចូលទៅកាន់តំបន់នោះ និងមានគម្រោងជាច្រើនបានដាក់ស្នើសុំលើកទឹកចិត្តដើម្បីអនុវត្តគម្រោងរបស់ខ្លួន ជាក់ស្ដែងក្នុងរយៈពេល១ឆ្នាំកន្លងទៅនេះ សម្រាប់តែខេត្តក្រចេះ ទទួលបានការស្នើសុំវិនិយោគចំនួន ១៦គម្រោង មានដើមទុនសរុបប្រមាណជាង ១,២ពាន់លានដុល្លារអាម៉េរិក ។

យោងតាមរបាយការណ៍របស់ក្រុមការងារជំរុញការវិនិយោគក្នុងខេត្តទាំងបួននៅភូមិភាគឦសាន បានបង្ហាញឱ្យដឹងថា ក្នុងរយៈពេល១ឆ្នាំនេះ ពោលគឺចាប់តាំងខែមេសា ឆ្នាំ២០២៥ ដល់ខែមេសា ឆ្នាំ២០២៦នេះ ខេត្តក្រចេះ ទទួលបានសំណើគម្រោងវិនិយោគចំនួន ១៦គម្រោង ក្រោមទុនវិនិយោគចំនួន ១,២ពាន់លានដុល្លារអាម៉េរិក និងបង្កើតការងារបានជិត ៣ម៉ឺនកន្លែង ។

ឯកឧត្តម វ៉ា ថន អភិបាលខេត្តក្រចេះ បានថ្លែងប្រាប់បណ្ដាញព័ត៌មាន AMS ឱ្យដឹងថា គម្រោងវិនិយោគដែលបានដាក់ស្នើសុំវិនិយោគនៅក្នុងខេត្តក្រចេះ ភាគច្រើនផ្ដោតលើវិស័យកសិកម្ម កសិ-ឧស្សាហកម្ម និងឧស្សាហកម្ម ហើយរដ្ឋបាលខេត្តក៏បានជួយសម្របសម្រួលដល់វិនិយោគិនដែលចូលមកសិក្សាឈ្វេងយល់ពីសក្ដានុពលវិនិយោគទៅតាមអ្វីដែលក្រុមការងារជំរុញការវិនិយោគក្នុងខេត្តទាំងបួននៅភូមិភាគឦសានបានដាក់ចេញ ។

លោក សមុត លីម៉ា នាយកទីចាត់ការផែនការវិនិយោគនៃរដ្ឋបាលខេត្តក្រចេះ បានមានប្រសាសន៍ថា មែនទែនទៅ តាំងពីចាប់ផ្ដើមអនុវត្តកម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសាន សម្រាប់ខេត្តក្រចេះ ទទួលបានគម្រោងស្នើសុំលើកទឹកចិត្តវិនិយោគរហូតដល់ ១៦គម្រោង គិតត្រឹមថ្ងៃទី២៥ ខែមីនា ឆ្នាំ២០២៦ ក្នុងនោះមាន ៦គម្រោង ទទួលបានគោលការណ៍ផ្ដល់ការលើកទឹកចិត្ត ការអនុគ្រោះ និងសម្រួលនីតិវិធីពីក្រុមការងារជំរុញការវិនិយោគក្នុងខេត្តទាំងបួនក្នុងភូមិភាគឦសាន ៥គម្រោងកំពុងស្ថិតនៅក្នុងដំណាក់កាលដែលក្រុមការងារលេខាធិការដ្ឋានបានរៀបចំឆ្លងកាត់កិច្ចប្រជុំអនុម័ត ហើយ៥គម្រោងទៀត ក្រុមការងារលេខាធិការដ្ឋានជំរុញការវិនិយោគក្នុងខេត្តទាំងបួននៅភូមិភាគឦសាន បានចុះពិនិត្យទីតាំងរួចរាល់ ។

លោកបន្តថា បច្ចុប្បន្ននេះ ខេត្តក្រចេះកាន់តែមានសក្ដានុពល ក្រោយស្ពានឆ្លងទន្លេមេគង្គក្រចេះបានដាក់ឱ្យដំណើរការជាផ្លូវការ ហើយក្រុមហ៊ុន ខេភី ស៊ីមេន អ៊ីដាស្ទ្រី ដែលវិនិយោគលើរោងចក្រផលិតស៊ីម៉ង់ត៍ក្នុងខេត្តក្រចេះ ក៏បានសាងសង់ផ្លូវទៅកាន់ទីតាំងរោងចក្ររបស់ខ្លួន ធ្វើឱ្យការធ្វើដំណើរ និងការដឹកជញ្ជូនកាន់តែមានភាពងាយស្រួលដល់ពលរដ្ឋក្នុងតំបន់ ។

ឯកឧត្តមបណ្ឌិតសភាចារ្យ ហ៊ាន សាហ៊ីប រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារជំរុញការវិនិយោគក្នុងភូមិភាគឦសាន តែងណែនាំដល់ភាគីពាក់ព័ន្ធបន្តផ្តល់ការសម្របសម្រួលជូនវិនិយោគិនឱ្យអស់លទ្ធភាព និងតាមភារកិច្ចរៀងៗខ្លួន ក្នុងកាលៈទេសៈដែលពិភពលោកកំពុងជួបប្រទះនឹងវិបត្តិនៃការឡើងថ្លៃប្រេងឥន្ធនៈ ដែលធ្វើឱ្យថ្លៃផលិតកម្ម និងថ្លៃដឹកជញ្ជូនកើនឡើង ។ ជាមួយគ្នានេះដែរ ឯកឧត្តមបណ្ឌិតសភាចារ្យ បានជំរុញធ្វើការផ្សព្វផ្សាយឱ្យបានកាន់តែទូលំទូលាយទៅដល់វិនិយោគិន ដើម្បីផ្តល់ឱកាសឱ្យវិនិយោគិនកាន់តែច្រើនឡើងអាចទទួលបាន «អត្ថប្រយោជន៍ពិសេស» ពី «កម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសាននៃព្រះរាជាណាចក្រកម្ពុជា ឆ្នាំ២០២៥-២០២៨» ៕

លោក អ៊ិច ណែត | Mr. Ich Neth

ជីវប្រវត្តិ: បានបញ្ចប់ការសិក្សាផ្នែកទំនាក់ទំនងសង្គម និងសារព័ត៌មាននៃសាលាបច្ចេកទេសដុនបូស្កូ ខេត្តព្រះសីហនុ និងមានបទពិសោធន៍ក្នុងវិស័យសារព័ត៌មាន១៣ឆ្នាំ ។ បច្ចុប្បន្នជាអ្នកយកព័ត៌មានសេដ្ឋកិច្ច និងអចលនទ្រព្យ ឱ្យសារព័ត៌មាន AMS Economy ។