សំបកកង់ឡានផលិតក្នុងស្រុក នឹងអាចដណ្ដើមទីផ្សារផ្គត់ផ្គង់ក្នុងស្រុកទាំងស្រុងក្នុងពេលឆាប់ៗ

កម្ពុជា បាននិងកំពុងផ្លាស់ប្តូរពីប្រទេសនាំចូលសំបកកង់ឡានពីបរទេសទាំងស្រុង មកជាការផ្គត់ផ្គង់ដោយខ្លួនឯងបណ្ដើរៗ ហើយនឹងអាចជំនួសឱ្យរបស់នាំចូលបានទាំងស្រុង បន្ទាប់ពីរោងចក្រផលិតសំបកកង់ឡាននៅក្នុងប្រទេស បានដាក់ដំណើរការខ្សែច្រវាក់ផលិតកម្មជាបន្តបន្ទាប់ ខណៈអ្នកប្រើប្រាស់កាន់តែច្រើនក៏ងាកមកប្រើរបស់ក្នុងស្រុកជំនួសឱ្យការនាំចូលដែរ។

លោក ស៊ឺន ស៊ីណាន អ្នកគ្រប់គ្រងទូទៅនៃក្រុមហ៊ុនចែកចាយសំបកកង់ឡាន KAVIX Cambodia បានប្រាប់បណ្ដាញព័ត៌មាន AMS ថា ពីមុនក្រុមហ៊ុនបាននាំចូលនិងចែកចាយសំបកកង់ឡានពីបរទេសសុទ្ធសាធ ពោសលគឺ ១០០ ភាគរយតែម្ដង ដោយសារតែកម្ពុជាមិនមានរោងចក្រផលិតសំបកកង់ឡាន ប៉ុន្តែចាប់តាំងពីកម្ពុជាមានរោងចក្រផលិតសំបកកង់ឡាននៅក្នុងប្រទេស ក្រុមហ៊ុនចែកចាយក៏បានទទួលសំបកកង់ឡានដែលផលិតក្នុងស្រុក សម្រាប់ចែកចាយទៅកាន់អតិថិជន និងណែនាំឱ្យអតិថិជនប្រើប្រាស់របស់ក្នុងស្រុកជំនួសវិញ។

លោកបានបន្តថា សម្រាប់គុណភាពនៃសំបកកង់ឡាន ដែលផលិតក្នុងស្រុកក៏មិនចាញ់ផលិតផលនាំចូលប៉ុន្មានដែរ ហើយបើសិនជាគុណភាពអន់ ម្ល៉េះផលិតផលសំបកកង់ឡាននេះ មិនអាចនាំចេញទៅកាន់ទីផ្សារបរទេស និងសុទ្ធតែជាប្រទេសអ្នកមានបានឡើយ។ ដូច្នេះ ការផលិតសំបកកង់នៅក្នុងប្រទេសកម្ពុជា និងនាំចេញទៅក្រៅបាន នោះសបញ្ជាក់ឱ្យឃើញថា គុណភាពផលិតផលរបស់ខ្មែរគឺល្អ ដែលគេអាចទទួលយកបាន។

លោកបានបញ្ជាក់ថា

“ក្នុងពេលឆាប់ៗខាងមុខនេះ ផលិតផលសំបកកង់ឡានដែលផលិតក្នុងស្រុក អាចនឹងដណ្ដើមទីផ្សារផលិតផលនាំចូលបានកាន់តែច្រើន ឬក៏អាចបានទាំងស្រុង ស្របពេលក្រុមហ៊ុនយើងក៏បានណែនាំឱ្យអតិថិជនគួរប្រើផលិតផលក្នុងស្រុក ដែលនឹងចំណេញដល់សេដ្ឋកិច្ចជាតិ បង្កើតការងារនិងប្រាក់ចំណូលដល់ពលរដ្ឋ ជាពិសេសគឺអាចចំណេញដល់អ្នកដំាកៅស៊ូក្នុងស្រុកផងដែរ។”

លោក គិន ឧត្តមមុនីស៊ីណាត នាយកប្រតិបត្តិក្រុមហ៊ុន Sailun Cambodia ដែលជាក្រុមហ៊ុនវិនិយោគលើរោងចក្រផលិតផលសំបកកង់ឡានម៉ាក Sailun បានឱ្យដឹងថា ក្នុងមួយឆ្នាំ រោងចក្រផលិតសំបកកង់ឡាន Sailun បានផលិតសំបកកង់ឡានសរុបជាង ២០ លានគ្រាប់ ហើយក្នុងឆ្នាំ ២០២៦ នេះក្រុមហ៊ុននឹងបង្កើនការផលិតឱ្យបានដល់ជិត ២៣ លានគ្រាប់ ប៉ុន្តែផលិតផលទាំងអស់នេះ គឺភាគច្រើននាំចេញទៅកាន់ទីផ្សារអន្តរជាតិ និងមួយចំនួនគឺសម្រាប់ផ្គត់ផ្គង់លើទីផ្សារក្នុងស្រុក។

លោកបានថ្លែងបន្តថា សម្រាប់ទីផ្សារក្នុងស្រុក កាលពីឆ្នាំ ២០២៥ កន្លងទៅ ក្រុមហ៊ុនបានចែកចាយប្រមាណជាង ២០ ម៉ឺនគ្រាប់ ហើយក្នុងឆ្នាំ ២០២៦ នេះ សំបកកង់ឡានម៉ាក Sailun គ្រោងនឹងដណ្ដើមទីផ្សារឱ្យបាន ៥០ ភាគរយនៃតម្រូវការសរុប ដែលមានត្រឹមប្រមាណជិត ១ លានគ្រាប់។

លោកបានឱ្យដឹងដូច្នេះថា៖

“សម្រាប់ពេលអនាគត ផលិតផលសំបកដែលផលិតនៅក្នុងប្រទេសកម្ពុជានឹងអាចជំនួសផលិតផលសំបកកង់ឡាននាំចូលបានទាំងស្រុង ដូច្នេះ ក្នុងរយៈពេលប៉ុន្មានឆ្នាំខាងមុខទៀត ទោះបីជាមិនមានការនាំចូលពីខាងក្រៅប្រទេស ក៏កម្ពុជាអាចមានលទ្ធភាពផ្គត់ផ្គង់សំបកកង់ឡានដែលផលិតក្នុងស្រុកបានដែរ។”

គួរបញ្ជាក់ថា គិតត្រឹមឆ្នាំ ២០២៦ នេះ នៅក្នុងប្រទេសកម្ពុជាមានរោងចក្រផលិតសំបកកង់រថយន្តចំនួន ៨ រោងចក្រ ដែលបានបោះទីតាំងនៅតំបន់សេដ្ឋកិច្ចចំនួន ៥ នៃខេត្តស្វាយរៀង ព្រះសីហនុ និងខេត្តក្រចេះ ក្នុងនោះរោងចក្រផលិតសំបកកង់ឡានម៉ាក Sailun ជារោងចក្រដែលធំជាងគេមានទុនវិនិយោគរហូតដល់ ១ ពាន់លានដុល្លារអាមេរិក៕

លោក អ៊ិច ណែត | Mr. Ich Neth

ជីវប្រវត្តិ: បានបញ្ចប់ការសិក្សាផ្នែកទំនាក់ទំនងសង្គម និងសារព័ត៌មាននៃសាលាបច្ចេកទេសដុនបូស្កូ ខេត្តព្រះសីហនុ និងមានបទពិសោធន៍ក្នុងវិស័យសារព័ត៌មាន១៣ឆ្នាំ ។ បច្ចុប្បន្នជាអ្នកយកព័ត៌មានសេដ្ឋកិច្ច និងអចលនទ្រព្យ ឱ្យសារព័ត៌មាន AMS Economy ។

សំបក​កង់ឡាន​ផលិត​ក្នុងស្រុក ​នឹងអាច​​ដណ្ដើម​ទីផ្សារផ្គត់ផ្គង់ក្នុងស្រុកទាំងស្រុងក្នុងពេលឆាប់ៗ

លោក អ៊ិច ណែត | Mr. Ich Neth

សំបកកង់ឡានផលិតក្នុងស្រុក នឹងអាចដណ្ដើមទីផ្សារផ្គត់ផ្គង់ក្នុងស្រុកទាំងស្រុងក្នុងពេលឆាប់ៗ