ភ្នំពេញ ៖ យោងតាមតួលេខសហព័ន្ធស្រូវអង្ករកម្ពុជាបានឱ្យដឹងថា ក្នុងរយៈពេល៤ខែដំបូងនៃឆ្នាំនេះ ប្រទេសកម្ពុជាបាននាំចេញអង្ករចំនួន ១២៩ ៣៣២ តោនទៅកាន់ប្រទេសចិន កើនឡើង ៨៣% បើធៀបនឹងរយៈពេលដូចគ្នាកាលពីឆ្នាំ ២០២៥ មានតម្លៃសរុបចំនួន ៧៥.៨៨ លានដុល្លារអាមេរិក។ ការណ៍នេះបង្ហាញពីតួនាទីដ៏សំខាន់នៃភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់(RCEP) និងកិច្ចព្រមព្រៀងពាណិជ្ជកម្មសេរី ចិន-កម្ពុជា (CCFTA) ក្នុងការលើកកម្ពស់ពាណិជ្ជកម្មកសិកម្មរបស់កម្ពុជា ។

លោក លុន យេង អគ្គលេខាធិការសហព័ន្ធស្រូវអង្ករកម្ពុជាបានទទួលស្គាល់ថា កំណើននៃការនាំចេញអង្ករទៅកាន់ទីផ្សារក្នុងតំបន់អាស៊ី មានការកើនឡើងគួរកត់សម្គាល់ ជាពិសេសប្រទេសចិន និងប្រទេសហ្វីលីពីន ។

លោកថា ការកើនឡើងនេះដោយសារមានកត្តាជាច្រើន រួមមានកិច្ចប្រឹងប្រែងរបស់រដ្ឋាភិបាលក្នុងការស្វែងរកទីផ្សារថ្មីៗសម្រាប់ការនាំចេញកសិផលពីកម្ពុជាទៅកាន់ទីផ្សារអន្តរជាតិ ពិសេសការបង្កើតទំនាក់ទំនងល្អរវាងរដ្ឋាភិបាលកម្ពុជា និងរដ្ឋាភិបាលចិន បង្កើតបាននូ​វបរិយកាសល្អក្នុងសម្រាប់អ្នកវិនិយោគទាំងពីរប្រទេស ខណៈដែលអង្ករកម្ពុជានាំចេញមានគុណភាព និងតម្លៃល្អសម្រាប់ប្រកួតប្រជែងនៅលើទីផ្សារអន្តរជាតិ ។  

តាមតួលេខរបស់សហព័ន្ធស្រូវអង្ករកម្ពុជាបានបង្ហាញថា រយៈពេល០៤ខែ ឆ្នាំ២០២៦ ការនាំចេញអង្ករកម្ពុជាទៅកាន់ប្រទេសក្នុងតំបន់អាស៊ានចំនួន៥ រួមមាន ហ្វីលីពីន វៀតណាម ម៉ាឡេស៊ី ឥណ្ឌូនេស៊ី និងសឹង្ហបូរី មានចំនួនសរុប ១៧៧​ ៧៦១តោន គិតជាទឹកប្រាក់ចំនួន ៧២លានដុល្លារ ការនាំចេញទៅកាន់ទីផ្សារប្រទេសចិន និងតំបន់រដ្ឋបាលស្វយ័តចំនួន ១២៩ ៣៣២តោន គិតជាទឹកប្រាក់ ៧៥,៨៨ លានដុល្លារ។

គួរបញ្ជាក់ថា កម្ពុជា​សម្រេច​បានផែន​ការនាំចេញ​អង្ករ​ចំនួន​ជិត ​៤៧ម៉ឺនតោន ក្នុងរយៈពេល០៤ ខែ ឆ្នាំ២០២៦ ទៅកាន់ទីផ្សារគោលដៅ ៦០ប្រទេស សរុបជាទឹកប្រាក់ប្រមាណជា ២៦៦ លានដុល្លារ ខណៈដែលរយៈពេល ០៤ខែ ដើមឆ្នាំ២០២៥ ការនាំចេញអង្ករទៅកាន់ទីផ្សារអន្តរជាតិ មានចំនួនជាង ២៨ ម៉ឺនតោនប៉ុណ្ណោះ៕