ស្ពានឆ្លងទន្លេទាំង ៧ ក្នុងរាជធានីភ្នំពេញ បាននិងកំពុងចូលរួមចំណែកជំរុញចរន្តសេដ្ឋកិច្ចកម្ពុជាយ៉ាងសំខាន់

ភ្នំពេញ៖ ស្ពានឆ្លងទន្លេទាំង ៧ នៅក្នុងរាជធានីភ្នំពេញ បាននិងកំពុងចូលរួមចំណែកជំរុញចរន្តសេដ្ឋកិច្ចយ៉ាងសំខាន់ ដោយបានសម្រួលដល់ការធ្វើដំណើរផង សម្រួលដល់ការដឹកជញ្ជូនទំនិញរបស់ពលរដ្ឋឆ្លងកាត់ផង និងបន្ថយការកកស្ទះក្នុងរាជធានីភ្នំពេញ ក៏ដូចជាជំរុញចរន្តសេដ្ឋកិច្ចទូទាំងប្រទេសផងដែរ។

ស្ពានសំខាន់ៗទាំងនេះ ត្រូវសាងសង់ឡើងជាបន្តបន្ទាប់គ្នាស្របទៅតាមកំណើនប្រជាពលរដ្ឋ និងកំណើនសេដ្ឋកិច្ចកម្ពុជាដែលបានកើនឡើងជាបន្តបន្ទាប់។ ថ្ងៃនេះ បណ្ដាញព័ត៌មាន AMS នឹងរៀបរាប់ពីស្ពានសំខាន់ទាំង ៧ មកចែកជូនប្រិយមិត្តអ្នកអាន និងអ្នកស្ដាប់ឱ្យបានជ្រាប។

១. ស្ពានមិត្តភាពកម្ពុជា-ជប៉ុន ឬហៅថាស្ពានជ្រោយចង្វារទី ១។ ស្ពាននេះ ត្រូវបានកសាងឡើងនៅឆ្នាំ ១៩៦៣ ក្នុងសម័យសង្គមរាស្ត្រនិយម។ វាជាស្ពានឆ្លងទន្លេសាបដំបូងគេក្នុងរាជធានីភ្នំពេញ ក៏ដូជជាប្រទេសកម្ពុជា ដែលតភ្ជាប់រាជធានីភ្នំពេញទៅកាន់បណ្ដាខេត្តនានានៅប៉ែកខាងនិងខាងជើង។

២. ស្ពានមិត្តភាពកម្ពុជា-ចិន ឬហៅថា ស្ពានជ្រោយចង្វារទី ២។ ស្ពាននេះ ត្រូវបានសាងសង់ឡើងនៅអំឡុងឆ្នាំ ២០១១ និងបានដាក់ឱ្យប្រើប្រាស់នៅឆ្នា២០១៥។ ក្រោយពេលស្ពានជ្រោយចង្វារទាំងពីរបានសាងសង់និងដាក់ឱ្យប្រើប្រាស់ អាជ្ញាធរក៏បានកំណត់ឱ្យធ្វើចរាចរណ៍លើស្ពានទាំងនេះជាឯកទិស ដោយស្ពានជ្រោយចង្វារទី ១ ប្រើសម្រាប់ទិសដៅចេញពីរាជធានី និងស្ពានជ្រោយចង្វារទី ២ ប្រើសម្រាប់ទិសដៅចូលរាជធានី ដើម្បីកាត់បន្ថយគ្រោះថ្នាក់ និងការកកស្ទះ។

៣. ស្ពានព្រះមុនីវង្សចាស់ឬស្ពានច្បារអំពៅចាស់៖ ត្រូវបានសាងសង់ឡើងតាំងពីឆ្នាំ១៩២៨ ក្នុងរជ្ជកាលព្រះបាទស៊ីសុវត្ថិមុនីវង្ស ដែលអាចចាត់ទុកថាជា ស្ពានដំបូងគេឆ្លងកាត់ទន្លេក្នុងរាជធានីភ្នំពេញ។ ស្ពាននេះ ក៏បានជួសជុលជាច្រើនដងមកហើយ ដើម្បីអាចទ្រទម្ងន់និងប្រើប្រាស់បានយូរអង្វែង។ វានត្រូវបានសាងសង់ឡើងតភ្ជាប់រាជធានីភ្នំពេញទៅតំបន់ច្បារអំពៅ និងបន្តទៅកាន់តំបន់ផ្សេងៗទៀត។

៤. ស្ពានព្រះមុនីវង្សថ្មី ឬស្ពានច្បារអំពៅថ្មី៖ ស្ពាននេះដែរ ត្រូវបានសាងសង់ឡើងក្នុងពេលដែលស្ពានព្រះមុនីវង្សចាស់ មានការកកស្ទះខ្លាំង ដោយសារតែពលរដ្ឋកាន់តែច្រើនបានចូលមករស់នៅក្នុងតំបន់ច្បារអំពៅនិងត្រូវការឆ្លងកាត់ទៅមករាជធានីភ្នំពេញ។ ស្ពាននេះ សាងសង់ឡើងនៅចុងឆ្នាំ ២០០៦ និងបានដាក់ឱ្យប្រើប្រាស់នៅឆ្នាំ ២០០៩ ដើម្បីរំដោះចរាចរណ៍ដែលមានការកកស្ទះខ្លាំងនៅលើស្ពានព្រះមុនីវង្សចាស់។

៥. ស្ពាន ព្រែកព្នៅ ឬពលរដ្ឋមួយចំនួនហៅថា ស្ពានលីយ៉ុងផាត់ ៖ ស្ពាននេះ ត្រូវបានសាងសង់ឡើងដើម្បីរំដោះ ចរាចរណ៍ដែលកកស្ទះនៅភ្នំពេញ ជាពិសេសរថយន្តធំៗ ដោយមិនចាំបាច់ឆ្លងកាត់រាជធានីភ្នំពេញ។ ស្ពានកសាងឡើងនៅឆ្នាំ ២០០៨ និងបានដាក់ឱ្យប្រើប្រាស់នៅឆ្នាំ ២០១០។ ក្រោយពេលស្ពាននេះ សាងសង់និងដាក់ឱ្យប្រើប្រាស់ ការដឹកជញ្ជូនទំនិញ ការធ្វើដំណើរមានភាពងាយស្រួលជាងមុន ដោយពលរដ្ឋមិនចាំបាច់ចូលកាន់ក្នុងក្រុងភ្នំពេញ ដែលធ្វើការកកស្ទះកាន់តែខ្លាំង ដូច្នេះ ការដឹកជញ្ជូននិងការធ្វើដំណើរត្រូវបានកាត់បន្ថយពេលវេលាជាងមុន។ បច្ចុប្បន្ន តាមរយៈស្ពានព្រែកព្នៅ បានធ្វើឱ្យតំបន់ក្បែរនោះមានការអភិវឌ្ឍយ៉ាងរីកចម្រើន មានសំណង់ធំៗនិងប្រវត្តិសាស្ត្រជាច្រើននៅតំបន់ជុំវិញនោះ។

៦. ស្ពានឆ្លងទន្លេសាបឬស្សីកែវ ៖ ស្ពាននេះសាងសង់ឡើងដើម្បីតភ្ជាប់តំបន់ឬស្សីកែវ ត្រើយខាងលិចទៅកាន់តំបន់អភិវឌ្ឍន៍អូស៊ីអាយស៊ី ជ្រោយចង្វារ។ ស្ពានឬស្សីកែវ ជ្រោយចង្វារ បានចាប់ផ្ដើមសាងសង់ឡើងនៅឆ្នាំ ២០១៧ និងបានដាក់ឱ្យប្រើប្រាស់នៅឆ្នាំ ២០២៣។ ពេលដែលស្ពាននេះសាងសង់រួច ពលរដ្ឋរស់នៅតំបន់ឬស្សីកែវ លែងធ្វើដំណើរវាងទៅឆ្លងនៅស្ពានជ្រោយចង្វារទៀតហើយ។ ការធ្វើចរាចរណ៍រវាងពលរដ្ឋនៅត្រើយខាងទន្លេ និងត្រើយខាងលិចក៏កាន់តែមានភាពងាយស្រួលជាមុន។

៧ ស្ពានឆ្លងទន្លេបាសាក់កោះពេជ្រ កោះនរា៖ ស្ពាននេះសាងសង់ឡើង ដើម្បីតភ្ជាប់តំបន់អភិវឌ្ឍន៍កោះពេជ្រ និងកោះនរា ហើយក៏បានរួមចំណែកក្នុងការកាត់បន្ថយការកកស្ទះនៅស្ពានព្រះមុនីវង្សទាំងពីរផងដែរ។ ស្ពានកោះពេជ្រ កោះនរា ត្រូវបានសាងសង់ឡើងនៅឆ្នាំអំឡុងចុងឆ្នាំ ២០២០ និងបានសាងសង់រួចរាល់ដាក់ឱ្យប្រើនៅឆ្នាំចុងឆ្នាំ ២០២៣។

ក្រៅពីស្ពានទាំង ៧ នេះ ដែលបានសាងសង់និងកំពុងប្រើប្រាស់ រាជរដ្ឋាភិបាលក៏បាននិងកំពុងសាងសង់ស្ពានឆ្លងទន្លេចំនួនពីរទៀតនៅរាជធានីភ្នំពេញ រួមមានស្ពានឆ្លងទន្លេបាសាក់ចាក់អង្រែក្រោម-ច្បារអំពៅ និងស្ពានឆ្លងទន្លេមេគង្គដីឥដ្ឋ-ថ្មគរ ដោយរំពឹងថា ក្រោយពេលស្ពានទាំងពីរនេះ សាងសង់រួចរាល់ជាស្ថាពរ នឹងកាត់បន្ថយការកកស្ទះ ក៏ដូចជាសម្រួលដល់ការធ្វើដំណើររបស់ពលរដ្ឋកាន់តែងាយស្រួលជាមុនបន្ថែមទៀ។

បើតាមអ្នកជំនាញនៃវិស័យអចលនទ្រព្យជាច្រើនដែលអ្នកសារព័ត៌មានAMS ធ្លាប់បានសម្ភាសន៍បានលើកឡើងថា ការសាងសង់ស្ពានឆ្លងកាត់ទន្លេ នៅក្នុងភូមិសាស្ត្ររាជធានីភ្នំពេញ មិនត្រឹមតែបានជួយសម្រួលដល់ការធ្វើដំណើរលឿនរហ័ស និងកាត់បន្ថយការកកស្ទះចរាចរណ៍ទេ តែថែមទាំងបានជំរុញសក្ដានុពលដីធ្លី និងការអភិវឌ្ឍនៅតំបន់បានមួយកម្រិតទៀតផងដែរ ជាក់ស្ដែងគម្រោងស្ពានដែលបានសាងសង់និងបានដាក់ឱ្យប្រើទាំងអស់ បានទាក់ទាញការអភិវឌ្ឍកាន់តែខ្លាំង ធ្វើឱ្យតំបន់នោះកាន់តែរីកចម្រើនមនុស្សរស់នៅកាន់តែច្រើន៕

លោក អ៊ិច ណែត | Mr. Ich Neth

ជីវប្រវត្តិ: បានបញ្ចប់ការសិក្សាផ្នែកទំនាក់ទំនងសង្គម និងសារព័ត៌មាននៃសាលាបច្ចេកទេសដុនបូស្កូ ខេត្តព្រះសីហនុ និងមានបទពិសោធន៍ក្នុងវិស័យសារព័ត៌មាន១៣ឆ្នាំ ។ បច្ចុប្បន្នជាអ្នកយកព័ត៌មានសេដ្ឋកិច្ច និងអចលនទ្រព្យ ឱ្យសារព័ត៌មាន AMS Economy ។