ដំណាំឪឡឹក ងាយស្រួលដាំ ចំណាយតិច និងរួមចំណែកផ្គត់ផ្គង់ដល់ទីផ្សារកសិផលខ្មែរ

ដំណាំឪឡឹកជាដំណាំមួយងាយស្រួលដាំ និងចំណាយពេលតិច ដោយប្រើប្រាស់រយៈពេលត្រឹមតែ ៥៨ ថ្ងៃ នោះឪឡឹកអាចប្រមូលផលបាន ហើយផលដែលទទួលបានមកវិញគឺសមល្មមអាចទទួលយកបាន ដោយអាចផ្គត់ផ្គង់ដល់ទីផ្សារ ពិសេសជាដំណាំបានរួមចំណែក សម្រាប់ទីផ្សារកសិផលក្នុងស្រុក។

សហគមន៍កសិករ ចំប៉ាសែនជ័យ ជាសហគមន៍ ឯកទេសខាងដាំដុះបន្លែផ្លែ ដ៏មានសក្តានុពលមួយ ស្ថិតនៅភូមិចំប៉ា ឃុំចំប៉ា ស្រុកព្រៃកប្បាស ខេត្តតាកែវ ក៏ជាសហគមន៍ដែលបានដាំឪឡឹក នៅពេលដែលត្រូរដូវវដាំ ពិសេសក្រោយរដូវច្រូតកាត់រួច។

លោក គង់ វ៉ុង ប្រធានសហគមន៍កសិករ ចំប៉ាសែនជ័យ បានប្រាប់បណ្តាញព័ត៌មានAMS ថា ឪឡឹកក្នុង ១ ឆ្នាំគេអាចដាំបាន ២ ដង ប៉ុន្តែបើដល់ខែ កសិករតែងតែនាំគ្នាដាំ ទាន់ពេលដែលអាកាសធាតុអំណោយផល ដំណាំនេះ ក៏នឹងហុចផលល្អ នេះបើតាមអ្វីដែលកសិករនៅតបន់របស់លោកបានធ្វើ។ លោកបានបញ្ជាក់ថា ដោយសារតែសហគមន៍ មានឯកទេសខាងដាំដុះបន្លែផ្លែ ដ៏មានសក្តានុពលមួយនៅ ខេត្តតាកែវ ទើបការដាំឪឡឹកបានក្លាយជាដំណាំទីពីរសម្រាប់សហគមន៍។

លោក គង់ វ៉ុង បានបញ្ជាក់ថា៖

“ការដែលកសិករ គាត់នាំគ្នាដាំឪឡឹកនេះ គឺគាត់ចង់នាំចូលបន្លែផ្លែជាដំណាំឪឡឹកចូលទីផ្សារ តែមិនទាន់ពេញលេញទេ ព្រោះបច្ចេកទេសដាំដុះ គឺប្រើតែក្នុងក្នុងរដូវ ក្រោយពីច្រូតកាត់រួច ដោយសារតែកសិករសហគមន៍ គាត់ជាប់ដៃដាំបន្លែផ្លែមួយចំនួនទៀត ផងដែរ។”

លោកប្រធានសហគមន៍ បានឱ្យដឹងទៀតថា នៅលើផ្ទៃដីដែលសហគមន៍ប្រមាណជិត ២០ គ្រួសារបានដាំដុះសព្វថ្ងៃ និងប្រមូលផល គឺលើផ្ទៃដីប្រមាណតែជាង ១៥ ហិកតាប៉ុណ្ណោះ តែបានធ្វើឱ្យដំណាំឪឡឹកនៅទីនេះល្បីឈ្មោះ ហើយអាចចូលផ្គត់ផ្គង់ទីផ្សារបានមួយចំណែក។ តែក៏មានកសិករចំនួន ៧ ទៅ ៨ គ្រួសារ បានដាំឪឡឹកវិលជុំ ដែលធ្វើឱ្យឪឡឹកទទួលផលខុសខែគ្នា នឹងធ្វើឱ្យគេអាចប្រមូលផលបានជាបន្តគ្នាពុំដាច់ទេ។

ចំណែករឿងតម្លៃនៅលើទីផ្សារ លោក គង់ វ៉ុង បានប្រាប់ឱ្យដឹងថា៖

“ឪឡឹក គឺជាផ្លែឈើដែលមានតម្លៃមិនសូវជាថ្លៃប៉ុន្មានទេ ដោយយើងអាចលក់បានក្នុងតម្លៃតែ៨ 00 ទៅ ១,២00 រៀលប៉ុណ្ណោះ ក្នុងផ្លែឪឡឹក ១ គីឡូក្រាម តែដោយសារតែការជ្រើសរើសពូជ ប៉ុន្មានឆ្នាំមកនេះ យើងអាចលក់បានថ្លៃជាងមុនបន្តិចគឺ ១,២០០ ទៅ ២,០០០ រៀលក្នុង ១ គីឡូក្រាម។”

បច្ចុប្បន្ន ដំណាំឪឡឹកបាន ឱ្យផលមិនស្មើដៃទេ ដោយសារតែពីមុនយើងដាំលក្ខណៈប្រពៃណី ជាឪឡឹកសាច់ក្រហម ផ្លែរាងតូច ហើយការដាំឥឡូវ គឺបានពូជពីតៃវ៉ាន់ ដែលប្រភេទសាច់វាមានពណ៌លៀង និពណ៌ការ៉ុត និងទំហំផ្លែរាងធំ ដែលប្រភេទនេះ ជួនកាលមានទម្ងន់ពី ៣,៥ ដល់ទៅ ៧ គីឡូ។ នេះបើតាមលោក គង់ វ៉ុង។

បើតាម កសិករដាំឪឡឹកប្រដេញរដូវ ដាំវិលជុំ ឈ្មោះឯក វ៉ាត បានឱ្យដឹងថា ឪឡឹកគាត់ភាគច្រើន គឺឪឡឹក ដែលគាត់បានដាំវិលជុំ ដើម្បីបំពេញម្រូវការទីផ្សារមិនឱ្យដាច់។ ប៉ុន្តែលោកបានបញ្ជាក់ថា ក្នុងរដូវកម្រ និងដាំតាមបច្ចេកទេសថ្មី ឪឡឹកនេះលក់បានថ្លៃ ក្នុងតម្លៃពី ២,០០០ រៀល ទៅ ២,៥០០ រៀល ព្រោះទិន្នផលវាហុចផលល្អ និងមានទម្ងន់ធ្ងន់។ លោក បានលើកឧទាហរណ៍បញ្ជាក់ថា ក្នុងដី ៤០ អា លោកទទួលផលឪឡឹកចំនួនជាង ១៨ តោន ដែលចំនួននេះលោកបានចាត់ទុកថាជាជោគជ័យ។

លោកប្រធានសហគមន៍ បានមានប្រសាសន៍ថា លោកក៏បានត្រៀមខ្លួនខ្លួន ក្នុងការដាំដុះឪឡឹកតាមបច្ចេកទេសថ្មីក្នុងរដូវដែលកម្រ ដើម្បីបំពេញការផ្គត់ផ្គង់ទីផ្សារក្នុងស្រុកឱ្យបានគ្រប់គ្រាន់ ពិសេសរដូវបុណ្យទានផ្សេងៗដែលមានតម្រូវការ ហើយទោះបីជាសហគមន៍លោកបានចាត់ទុកឪឡឹកជាដំណាំទីពីរ ក៏ពិតមែន តែយ៉ាងណា ក៏បានរួមចំណែកពង្រីកទីផ្សារកសិផលផងដែរ៕

លោក កែ ផុស | Mr. Ker Phors

ជីវប្រវត្តិ: បានបញ្ចប់ការសិក្សាថ្នាកអនុបណ្ឌិតផ្នែកប្រព័ន្ធផ្សព្វផ្សាយមកពីសហភាពសូវៀត និងមានបទពិសោធន៍ជាង ២០ឆ្នាំក្នុងវិស័យសារព័ត៌មាន។ បច្ចុប្បន្ន លោកជាអ្នកយកព័ត៌មានសេដ្ឋកិច្ចឱ្យសារព័ត៌មាន AMS Economy ។