នៅល្ងាចថ្ងៃអាទិត្យ ទី១៥ ខែមីនា ចុងសប្តាហ៍នេះ ព្រះសង្ឃ តាជី យាយជី ប្រមាណជា៥០០អង្គ/នាក់ នឹងរួមគ្នាធ្វើសមាធិ​នៅ​ខាងមុខ​ផ្ទាំងគំនូរ “សិល្បៈ ដើម្បីសន្តិភាព” នាសួនវត្តបទុមវតី រាជធានីភ្នំពេញ ដោយ​មានការ​និមន្តចូលរួមពីសម្តេច គូ សុភាព និងអង្គសម្តេច គីម សន។

លោក អ៊ុង ស៊ីយ៉ា ក្រុមការងាររៀបចំកម្មវិធីនេះឱ្យដឹងថា ការធ្វើសមាធិ​នៅថ្ងៃអាទិត្យចុងសប្តាហ៍នេះ ត្រូវបានរៀបចំ​ឡើង​ក្នុងគោលបំណង រំលឹកនឹកគុណដល់បុព្វបុរសខ្មែរ ក៏ដូចជាវរៈកងទ័ពដែលបានពលីជីវិត​ក្នុងបុព្វហេតុ​ការពារជាតិមាតុភូមិ, ជាការឧទ្ទិបុណ្យកុសល និងផ្សាយមេត្តាដល់ពុទ្ធិបរិស័ទ។

បើតាមលោក ស៊ីយ៉ា ការធ្វើសមាធិដើម្បីសន្តិភាពនៅថ្ងៃអាទិត្យនេះ​ ក៏ជាពិធីដើម្បីសុំសេចក្តីសុខដែរ ក្រោយ​ការបើកបង្ហាញផ្ទាំងគំនូរ “សិល្បៈ ដើម្បីសន្តិភាព” ជាសាធារណៈ ​កាលពីដើមខែនេះ។ ហើយសាធារណជនក៏អាចចូល រួម​ក្នុងកម្មវិធី​នេះ​ដែរ ដើម្បីស្វែងយល់ពីមូលដ្ឋាន​នៃការសមាធិ ការអប់រំចិត្ត ធ្វើចិត្តឱ្យស្ងប់​។

ផ្ទាំងគំនូរសិល្បៈ ដើម្បីសន្តិភាព នៅសួនវត្តបទុមវតី រាជធានីភ្នំពេញ ជាផ្ទាំងគំនូរទីពីរ ដែលគូរដោយក្រុមសិល្បករខ្មែរ ដើម្បីបង្ហាញ​អំពីទុក្ខវេទនា​របស់ជនស៊ីវិល និងការ​បំផ្លិចបំផ្លាញ​ហេដ្ឋារចនាសម្ព័ន្ធ និងបេតិកភណ្ឌរបស់កម្ពុជា​ក្នុង​ជម្លោះ​ព្រំដែន​ជាមួយថៃ។ ផ្ទាំងគំនូរនេះ ត្រូវបានបង្ហាញជាសាធារណៈ​កាលពីថ្ងៃទី៣ ខែមីនា ឆ្នាំ២០២៦៕